ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის დირექტორის, ქიმიის მეცნიერებათა დოქტორ რაულ გოცირიძის 60 წლისადმი მიძღვნილი საიუბილეო სხდომა გაიმართა შოთა რუსთაველის დარბაზში. ბატონ რაულ გოცირიძეს მნიშვნელოვანი წვლილი მიუძღვის საქართველოში მემბრანული ტექნოლოგიების განვითარებაში. მკვლევარი ავტორია 74 სამეცნიერო ნაშრომისა და მონოგრაფიისა: „ადამიანის ყოფიერება და წყალი”. მეცნიერს მიღებული აქვს 11 საავტორო მოწმობა და 4 პატენტი.
ბათუმის შოთა რუსთაველის სახელმწიფო უნივერსიტეტში რექტორის არჩევნები გაიმართა. უნივერსიტეტის საარჩევნო კომისიის ოქმის საფუძველზე, ვერცერთმა კანდიდატმა აკადემიური საბჭოს სიითი შემადგენლობის უმრავლესობის - 5 ხმა ვერ დააგროვა, არ გამოვლინდა საუკეთესო შედეგების მქონე 2 კანდიდატი და შესაბამისად არ ჩატარდა მეორე ტური. აკადემიურმა საბჭომ მიიღო გადაწყვეტილება რექტორის განმეორებითი არჩევნების გამოცხადების შესახებ. საარჩევნო კომისიაში 8 კანდიდატი იყო დარეგისტრირებული: რამაზ ხალვაში, ირაკლი ბარამიძე, მალხაზ ნაკაშიძე, მანუჩარ ლორია, ბესიკ ბერიძე, ანთაზ ქიქავა, მარინა გიორგაძე, როსტომ ბერიძე. კენჭისყრაში მონაწილეობა მხოლოდ 6-მა კანდიდატმა მიიღო. კონკურსანტმა როსტომ ბერიძემ 13 მარტს საარჩევნო კომისიას კანდიდატურის მოხსნის განცხადებით მიმართა, ხოლო ბესიკ ბერიძემ - არჩევნების დაწყებამდე.
ბათუმში, ხულოში, შუახევში, ქედაში, ხელვაჩაურში, ქობულეთში, ოზურგეთში, ლანჩხუთში, ჩოხატაურში და ფოთში ბათუმის შოთა რუსთაველის სახელმწიფო უნივერსიტეტის ღია კარის დღეები გაიმართა. უმაღლესი საგანმანათლებლო დაწესებულების პროფესორ-მასწავლებლებმა და სტუდენტებმა კერძო და საჯარო სკოლების აბიტურიენტებისათვის უნივერსიტეტის წარდგინება გამართეს. მეთორმეტე კლასის მოსწავლეებს უნივერსიტეტში სწავლების პირობები, სერვისები, სამეცნიერო-კვლევითი საქმიანობა, სტუდენტური ცხოვრება და პრიორიტეტები გააცნეს. მომავალ სტუდენტებს უნივერსიტეტის შესახებ დეტალური ინფორმაციის მისაღებად ბუკლეტები, საჩუქრები გადასცეს და აქტუალურ შეკითხვებს უპასუხეს. ღია კარის დღეები პროექტ ,,უნივერსიტეტი ფართო საზოგადოებისთვის“ ფარგლებში ჩატარდა.
ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის რიტორიკის სკოლა გაიხსნა. სამსაფეხურიანი პროგრამის ფარგლებში სხვადასხვა ასაკის მსურველები ორატორული ხელოვნების საფუძვლებს დაეუფლებიან. პირველ ეტაპზე ყურადღება დაეთმობა მეტყველების ტექნიკის დახვეწას, მეტყველების ენერგეტიკას, ხმაზე მუშაობას, სხეულის მართვას, პოზას, ჟესტს, მოძრაობას, აუდიტორიის შიშის დაძლევას და სხვა (საჭიროების შემთხვევაში - ფსიქოთერაპიას). მეორე საფეხური ითვალისწინებს შეძენილი ჩვევების გაღრმავებას, აუდიტორიის მართვას, მხედველობით კონტაქტს, სამეტყველო პაუზას, საჯარო გამოსვლის ტექსტის მომზადებას, სამეტყველო იმპროვიზაციას. მესამე ეტაპზე რთული აუდიტორიის მართვა, კითხვა-პასუხისა და დებატის ხელოვნების დაუფლება და ეფექტური პრეზენტაცია არის დაგეგმილი. სკოლის წარდგინების დასასრულს, მალხაზ ბალაძემ მასტერკლასი ჩაატარა აუდიტორიასთან ურთიერთობის ხელოვნებაზე.
ბათუმის შოთა რუსთაველის სახელმწიფო უნივერსიტეტში აბიტურიენტებისათვის ღია კარის დღე და კონცერტი გაიმართა. უმაღლესი საგანმანათლებლო დაწესებულების რექტორის მოადგილემ ირაკლი ბარამიძემ და სტუდენტებმა: ქრისტინე თოფურიამ და გიგა ფარტენაძემ ახალგაზრდებს უნივერსიტეტის 80-წლიანი ისტორია, საგანმანათლებლო პროგრამები, სტიპენდიები, სოციალური პროგრამები, გაცვლითი პროგრამები და სიახლეები გააცნეს. 2015-2016 სასწავლო წელს ბსუ-ში 1380 პირველკურსელი ჩაირიცხება. 40-მდე საბაკალავრო საგანმანათლებლო პროგრამიდან 10 სრული სახელმწიფო დაფინანსებით განხორციელდება. წარდგინების დასასრულს მომავალ სტუდენტებს უნივერსიტეტის საინფორმაციო ბუკლეტებთან ერთად, სამახსოვრო საჩუქრები დაურიგდათ. ღია კარის დღის ფარგლებში უნივერსიტეტისა და სკოლების თანამშრომლობის ეგიდით გამართული ფუტსალის აჭარის რეგიონული სასკოლო ჩემპიონატის მონაწილე 38 გუნდს სერტიფიკატები გადაეცათ.
