ბათუმის შოთა რუსთაველის სახელმწიფო უნივერსიტეტში პოეტ დავით მაღრაძის ლექსების ახალი კრებულის ,,ექო“ პრეზენტაცია გაიმართა. წიგნი სხვადასხვა პერიოდში შექმნილ ლექსებსა და პოემებს აერთიანებს. პოეტმა სტუდენტებსა და პროფესორ-მასწავლებლებს საკუთარი ლექსები წარუდგინა და ახალგაზრდების შეკითხვებს უპასუხა. დავით მაღრაძე საქართველოს ჰიმნის ავტორი, ებოლიში გამართული პოეზიის მეხუთე საერთაშორისო კონკურსის გამარჯვებული და ლიტერატურაში ნობელის პრემიის ნომინანტია.
ბათუმის შოთა რუსთაველის სახელმწიფო უნივერსიტეტში საბჭოთა ოკუპაციის დღესთან დაკავშირებით საქართველოს სახელმწიფო დროშა დაუშვეს. ცერემონიაზე უმაღლესი საგანმანათლებლო დაწესებულების რექტორის მოვალეობის შემსრულებელმა ირაკლი ბარამიძემ, ადმინისტრაციის ხელმძღვანელმა ედიშერ ჩავლეიშვილმა, პროფესორ-მასწავლებლებმა და სტუდენტებმა საქართველოს დამოუკიდებლობისათვის დაღუპული გმირები გაიხსენეს და წუთიერი დუმილით მათ ხსოვნას პატივი მიაგეს. ღონისძიების ფარგლებში სტუდენტთა სამეცნიერო ცენტრისა და სტუდენტთა მხარდაჭერისა და მომსახურების სამსახურის ორგანიზებით სესია გაიმართა თემაზე: „25 თებერვალი - საქართველოს ოკუპაციის დღე“. კონფერენციის დასასრულს გაიმართა 25 თებერვლის ამსახველი ისტორიული კადრების ჩვენება და დისკუსია.
ცნობილი ქართველი მეცნიერისა და საზოგადო მოღვაწის, საქართველოს მეცნიერებათა ეროვნული აკადემიის წვერ-კორესპოდენტ ვანო პაპუნიძის 75 წლისადმი მიძღვნილი საიუბილეო სხდომა გაიმართა ბათუმის შოთა რუსთაველის სახელმწიფო უნივერსიტეტში. ბიოლოგიის მეცნიერებათა დოქტორს, პროფესორ ვანო პაპუნიძეს მნიშვნელოვანი წვლილი მიუძღვის საქართველოში აგროსატყეო და ზოგადი ბიოლოგიური მეცნიერების დარგების განვითარებაში, გამოქვეყნებული აქვს 120-მდე სამეცნიერო ნაშრომი, მათ შორის 21 მონოგრაფიული ხასიათის წიგნი. მკვლევარს იუბილე მიულოცეს და წარმატებები უსურვეს უნივერსიტეტის რექტორის მოადგილეებმა ირაკლი ბარამიძემ, ნათია წიკლაშვილმა, საქართველოს მეცნიერებათა ეროვნული აკადემიის პრეზიდენტმა, აკადემიკოსმა გიორგი კვესიტაძემ, აღმასრულებელი და საკანონმდებლო ხელისუფლების წარმომადგენლებმა, კოლეგებმა და მეგობრებმა.
საქართველოს მეცნიერებათა ეროვნული აკადემიის პრეზიდენტმა, აკადემიკოსმა გიორგი კვესიტაძემ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა აგრობიოლოგიის დარგის სიახლეებსა და აქტუალურ საკითხებზე. მომხსენებელმა უმაღლესი საგანმანათლებლო დაწესებულების პროფესორ-მასწავლებლებსა და მკვლევარებს საერთაშორისო სამეცნიერო პროექტები: „ბიოეთანოლი, როგორც ბიოსაწვავი“, „ცილის პროდუქტის წარმოება“ და „სიმინდის სპირტის წარმოება“ წარუდგინა. ლექცია დიალოგის რეჟიმში წარიმართა და აკადემიკოსმა გიორგი კვესიტაძემ შეკითხვებს უპასუხა.
ბათუმის შოთა რუსთაველის სახელმწიფო უნივერსიტეტის იურიდიულ ფაკულტეტთან კრიმინალისტიკის სასწავლო კაბინეტ-ლაბორატორია გაიხსნა. სასწავლო-პრაქტიკული სამუშაოები წარიმართება კრიმინალისტიკური ტექნიკის ძირითად მიმართულებაში - ტრასოლოგიაში (მოძღვრება კვალთა შესახებ). ბაკალავრიატისა და მაგისტრატურის სტუდენტები დაეუფლებიან ხილვადი, ნაკლებად ხილვადი და უხილავი კვალის აღმოჩენის, კვალის ფიქსირების, ამოღების, შეფუთვის, მის პროცესუალურ გაფორმებისა და გამოკვლევის უნარ-ჩვევებს. სასწავლო პროცესში გამოიყენება მეთოდი „სწავლება კეთებით“. კრიმინალისტიკის სასწავლო კაბინეტ-ლაბორატორიის ბაზაზე ასევე განხორციელდება ორი მოკლევადიანი საგანმანათლებლო პროგრამა: ჟურნალისტური გამოძიება და დეტექტივ-კრიმინალისტი.
