ბათუმის შოთა რუსთაველის სახელმწიფო უნივერსიტეტის თეატრალურმა დასმა პარიზში ფრანგულ-ქართული კულტურის დღეების ღონისძიებაში მიიღო მონაწილეობა. უნივერსიტეტის სტუდენტები ფრანგი მაყურებლის წინაშე კომედიური ჟანრის სპექტაკლით - ,,ნაფტალინი“ წარსდგნენ. სპექტაკლი ლაშა ბუღაძის პიესის მიხედვით რეჟისორებმა: როინ დვალმა და გიორგი ფირცხალაიშვილმა დადგეს. პრემიერამ უცხოეთში წარმატებით ჩაიარა და ფრანგული პრესის დადებითი შეფასება დაიმსახურა.
ჰუმანიტარულ მეცნიერებათა ფაკულტეტის თურქული ფილოლოგიისა და თურქეთის მცოდნეობის სტუდენტებმა თეატრალიზებული წარმოდგენა გამართეს თემაზე: „ოჯახი“. 2014-2015 სასწავლო წლის შემაჯამებელ ღონისძიებაზე ახალგაზრდებმა ქართული და თურქული ოჯახების ტრადიციები წარმოადგინეს და მათ მნიშვნელობაზე ისაუბრეს. თურქეთის გენერალურმა კონსულმა ბათუმში იასინ თემიზ ქანიმ წარმოდგენის მონაწილეები სერტიფიკატებითა და კაპადოკიის ხუთდღიანი ტურით დააჯილდოვა.
უნივერსიტეტის 80 წლის იუბილესადმი მიძღვნილი პირველობა დაიწყო სტუდენტებისა და პროფესორ-მასწავლებლების მონაწილეობით სპორტის სხვადასხვა სახეობაში. საუკეთესო მონაწილეები გამოვლინდნენ დარტსში, გირების აჭიმვასა და ძალოსნობაში. დარტსში ქალთა შორის განათლების ფაკულტეტის ასისტენტ პროფესორმა დარეჯან გელაძემ გაიმარჯვა, ხოლო მამაკაცებს შორის - ბსუ-ს ადამიანური რესურსებს მართვის სამსახურის მთავარმა სპეციალისტმა კობა ჭანტურიამ. გირების აჭიმვაში გოგონათა შორის I ადგილი დაიკავა ინგლისური ფილოლოგიის III კურსის სტუდენტმა ანანო დვალიშვილმა, ვაჟებს შორის - სპორტის სპეციალობის IV კურსის სტუდენტმა მამუკა ჯორბენაძემ. ძალოსნობის გამარჯვებული სამართალმცოდნეობის სპეციალობის II კურსის სტუდენტი ზაზა ანანიძეა.
ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა და ზუგდიდის სასწავლო უნივერსიტეტის ევროპული აკადემიის რექტორმა ლაშა ნარსიამ თანამშრომლობის მემორანდუმს მოაწერეს ხელი. ხელშეკრულება მიზნად ისახავს ერთობლივი საგანმანათლებლო პროგრამების შემუშავებას, სამეცნიერო კვლევების წარმოებას, პროფესორ-მასწავლებლების სტაჟირებასა და სტუდენტების გაცვლითი პროგრამების განხორციელებას. მემორანდუმის ფარგლებში გაიმართება კონფერენციები, სემინარები, ტრენინგები და საზაფხულო სკოლები
სტუდენტური თვითმმართველობის არჩევნები დაიწყო ბათუმის შოთა რუსთაველის სახელმწიფო უნივერსიტეტში. ხუთი დღის განმავლობაში უმაღლესი საგანმანათლებლო დაწესებულების ბაკალავრიატის, მაგისტრატურისა და დოქტორანტურის 5150-მდე სტუდენტი 94-წევრიან სტუდენტთა წარმომადგენლობით ორგანოს 2 წლის ვადით აირჩევს. სტუდენტური თვითმმართველობის არჩევნები ფარული კენჭისყრით იმართება და მასში 174 კანდიდატი მონაწილეობს.
