ახალი ამბები

უნივერსიტეტში ნიკო ბერძენიშვილის ინსტიტუტის უფროსი მეცნიერ-თანამშრომლის ოთარ თურმანიძის წიგნის „აჭარის პოლიტიკური და ეკონომიკური ისტორია (1921-1940)“ წიგნის წარდგინება გაიმართა. მონოგრაფია აჭარის XX საუკუნის 20-30-იან წლების პოლიტიკური და სოციალურ-ეკონომიკური ისტორიის საკითხებს ეძღვნება. ნაშრომში აღწერილია საოლქო რევკომის ფორმირება, საბჭოთა ხელისუფლების გამოცხადება, ბრძოლა თურქი ოკუპანტების წინააღმდეგ, ავტონომიური რესპუბლიკის შექმნა, სახელმწიფო ორგანოების ჩამოყალიბება. ასევე განხილულია ეკონომიკური გარდაქმნები: წარმოების ძირითად საშუალებათა ნაციონალიზაცია, სამრეწველო-ეკონომიკური და აგრარული რეფორმები. ავტორი განიხილავს მრეწველობის, ტრანსპორტისა და სოფლის მეურნეობის ძირითად დარგებს. ნაშრომი განკუთვნილია სპეციალისტების, სტუდენტებისა და მკითხველთა ფართო წრისათვის.

ღია კარის დღეები - 2014 ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებმა და სტუდენტებმა ხულოში, შუახევში, ქედაში, ხელვაჩაურში, ქობულეთში, ფოთში, ოზურგეთში, ლანჩხუთსა და ჩოხატაურში გამართული შეხვედრებით დაასრულეს. უნივერსიტეტის წარმომადგენლებმა უმაღლესი საგანმანათლებლო დაწესებულების პრეზენტაცია გამართეს. მეთორმეტე კლასის მოსწავლეები და აბიტურიენტები უნივერსიტეტის ფაკულტეტებს, სახელმწიფოს მიერ დაფინანსებულ და აკრედიტებულ საგანმანათლებლო პროგრამებს, პრიორიტეტებს, სოციალური პროგრამებს, სტიპენდიებს, უცხოეთის გაცვლით პროგრამებსა და სიახლეებს გაეცნენ. შეხვედრის მონაწილეებს ტრადიციულად, ბსუ-ს საინფორმაციო ბუკლეტები და სამახსოვრო საჩუქრები გადაეცათ.

სააქტო დარბაზში სტუდენტური ლიტერატურული ჟურნალ “ინტეგრალის” წარდგინება და ლიტერატურული საღამო გაიმართა. მოწვეულმა დეკლამატორებმა სტუდენტებს, პროფესორ-მასწავლებლებს, მწერლებსა და საზოგადოების წარმომადგენლებს პირველ ნომერში დაბეჭდილი ლექსები წაუკითხეს. ალმანახი ბათუმის შოთა რუსთაველის სახელმწიფო უნივერსიტეტის ინიციატივითა და ფინანსური მხარდაჭერით სტუდენტებმა: მინდია ცეცხლაძემ, ირაკლი ყურუამ, ლაშა მიქელაძემ დაარსეს. „ინტეგრალი“ წელიწადში ორჯერ გამოვა და მიზნად ისახავს საზოგადოებისათვის შემოქმედებითი ნიჭის მქონე სტუდენტების გაცნობას. სადებიუტო ნომერში საქართველოს რვა უნივერსიტეტის ცამეტი სტუდენტის ლექსი დაიბეჭდა. შემდეგ ნომრებში მკითხველი იხილავს სხვადასხვა ჟანრის მხატვრულ ნაწარმოებებს. ჟურნალი საქველმოქმედო ხასიათისაა და გაყიდვით შემოსული თანხა სოციალურად დაუცველი და წარმატებული სტუდენტების დასახმარებლად გადაირიცხება. ახალგაზრდებს ალმანახში საკუთარი შემოქმედების გამოსაქვეყნებლად შეუძლიათ დაუკავშირდნენ სარედაქციო ჯგუფს შემდეგ ელექტრონულ მისამართზე: lit.integrali@gmail.com; lit.integrali@mail.ru

შოთა რუსთაველის ეროვნულმა სამეცნიერო ფონდმა ფუნდამენტური კვლევებისთვის სახელმწიფო სამეცნიერო გრანტების კონკურსის შედეგები გამოაქვეყნა. 2013 წლის საგრანტო კონკურსში გამარჯვება მოიპოვა ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებისა და მკვლევარების სამმა სამეცნიერო პროექტმა: „სარფი“ (FR/339/1-10/13, სამეცნიერო პროექტის ხელმძღვანელი პროფესორი მალხაზ ჩოხარაძე), „პონტოელი ბერძნები აჭარაში - წარსული და თანამედროვეობა“ (FR/491/2-153/13, სამეცნიერო პროექტის ხელმძღვანელი პროფესორი მარინა გიორგაძე) და „თხევადი კვების პროდუქტების წარმოებებში მემბრანული ტექნოლოგიის მრავალჯერადად გამოყენებისთვის მემბრანების რეგენერაციის ტექნოლოგიური პროცესების და სარეგენერაციო ხსნარების ნორმატიულ-ტექნიკური დოკუმენტაციის შემუშავება“ (FR/164/3-200/13, სამეცნიერო პროექტის ხელმძღვანელი რაულ გოცირიძე).

ბათუმის შოთა რუსთაველის სახელმწიფო უნივერსიტეტში ფრანკოფონიის დღეების ფარგლებში ფრანგული ენის ტესტირება - ,,Bonjour la France”, გაცვლითი პროგრამის „ევროოდისეას“ პრეზენტაცია და კონფერენცია - „საფრანგეთის ისტორია, კულტურა და ცივილიზაცია“ გაიმართა. აჭარის ა.რ. განათლების, კულტურისა და სპორტის სამინისტროს ევროპის გაცვლითი პროგრამების კოორდინატორმა ნინო ბერაძემ ახალგაზრდებს გაცვლითი პროგრამები წარუდგინა და პროექტებში მონაწილეობის პირობები გააცნო. კონფერენციაზე სტუდენტებმა მოსწავლეებთან ერთად, ქართულ-ფრანგული ურთიერთობისადმი მიძღვნილი მოხსენებები წარმოადგინეს და აქტუალურ საკითხებზე იმსჯელეს.