ახალი ამბები

ბათუმის სასპორტო სკოლის საკალათბურთო დარბაზში კალათბურთში სუპერლიგის მე-4 ტურის მატჩი გაიმართა. პირველობისთვის ერთმანეთს ბათუმის შოთა რუსთაველის სახელმწიფო უნივერსიტეტის საკალათბურთო გუნდი და ქუთაისის საკალათბურთო გუნდი დაუპირისპირდნენ. შეხვედრა ანგარიშით 87:85 ბათუმის შოთა რუსთაველის სახელმწიფო უნივერსიტეტის საკალათბურთო გუნდის გამარჯვებით დასრულდა. ეროვნული ჩემპიონატი 19 ოქტომბერს დაიწყო და მასში 9 გუნდი მონაწილეობს: "შსს აკადემია", "ოლიმპი", "არმია", "ქუთაისი", "დინამო", "სოხუმი", "რუსთავი", "ბათუმი", "მაკაბი".

სტუდენტური მოძრაობა „ალტერნატივა“-ს ორგანიზებით ბათუმის შოთა რუსთაველის სახელმწიფო უნივერსიტეტში დისკუსია გაიმართა თემაზე: „2007 წლის 8 ნოემბერი - ბათუმის სახელმწიფო უნივერსიტეტის დარბევა“. სტუდენტებმა, პროფესორ-მასწავლებლებმა, არასამთავრობო ორგანიზაციებისა და საზოგადოების წარმომადგენლებმა უმაღლეს საგანმანათლებლო დაწესებულებაში ექვსი წლის წინ განვითარებული მოვლენები გაიხსენეს და სპეცრაზმელების მიერ უნივერსიტეტის დარბევის ფაქტი დაგმეს. დისკუსიის ორგანიზატორებმა ბსუ-ს დარბევის ამსახველი ვიდეო კადრები და მასმედიის საშუალებებით გავრცელებული მასალები წარმოადგინეს. შეხვედრაზე სტუდენტური მოძრაობის წევრმა გოჩა სურგულაძემ მოხსენება წარმოადგინა თემაზე: „უნივერსიტეტის ავტონომია (სტუდენტური მოძრაობა „ალტერნატივა“-ს გეგმები 2007 წლის უნივერსიტეტის დარბევის გამოძიებასთან დაკავშირებით)“, ხოლო აქციის მონაწილემ ცოტნე ანანიძემ ისაუბრა საკითხზე: „რა სურდათ სტუდენტებს აღნიშნული პროტესტის გამოხატვით და მისი სამართლებრივი შეფასება“. დისკუსიის მონაწილეებმა კიდევ ერთხელ მოითხოვეს დამნაშავეთა გამოვლენა და შესაბამისი ღონისძიებების გატარება.

ბათუმის შოთა რუსთაველის სახელმწიფო უნივერსიტეტს პრაღა 1-ის დელეგაცია ეწვია. პრაღა 1-ის მერი ოლდრიჩ ლიმეცკი დელეგაციის წარმომადგენლებთან ერთად, უმაღლესი საგანმანათლებლო დაწესებულების რექტორის მოადგილეებს, ადმინისტრაციის ხელმძღვანელსა და დეკანებს შეხვდა. მხარეები სამომავლო თანამშრომლობის მიმართულებებზე, ერთობლივი პროექტების შემუშავებასა და განხორციელებაზე შეთანხმდნენ. შეხვედრაზე სტუმრები უნივერსიტეტის ისტორიას, საგანმანათლებლო პროგრამებს, სტრუქტურას, ბიბლიოთეკასა და მატერიალურ-ტექნიკურ ბაზას გაეცნენ.

საქართველოს უნივერსიადის ფარგლებში, 2013-2014 წლის სტუდენტურის ლიგის შესარჩევი ეტაპის I ტური გაიმართა ფუტსალში. პირველობის მოსაპოვებლად ერთმანეთს ბათუმის შოთა რუსთაველის სახელმწიფო უნივერსიტეტისა და ბათუმის სახელმწიფო საზღვაო აკადემიის გუნდები დაუპირისპირდნენ. შეხვედრა ანგარიშით 4:2, უნივერსიტეტელების გამარჯვებით დასრულდა. ტურნირის შემდეგი შესარჩევი ეტაპები 15 ნოემბერს ზუგდიდში, შოთა მესხიას სახელობის უნივერსიტეტსა და 3 დეკემბერს ქუთაისში, აკაკი წერეთლის სახელმწიფო უნივერსიტეტში გაიმართება. შეჯიბრი საქართველოს საუნივერსიტეტო სპორტის ფედერაციის, საქართველოს ფუტსალის ასოციაციის, საქართველოს სპორტისა და ახალგაზრდობის საქმეთა სამინისტროს ორგანიზებითა და კომპანია „ბილაინის“ მხარდაჭერით ტარდება. ტურნირში ქვეყნის ყველა აკრედიტებული უმაღლესი საგანმანათლებლო დაწესებულების ნაკრები მონაწილეობს.

ტემპუსის საგრანტო პროექტის „უნივერსიტეტის მართვის ინტეგრირებული სისტემის შექმნა ევროკავშირის გამოცდილების მიხედვით“ ფარგლებში უნივერსიტეტს პარტნიორი დაწესებულებების წარმომადგენლები ეწვივნენ გერმანიიდან, პოლონეთიდან, ჰოლანდიიდან, უკრაინიდან, მოლდოვადან და ბელორუსიიდან. ორი დღის განმავლობაში პროექტის მონაწილეები შესრულებული სამუშაოს შედეგებს გაეცნობიან, ცალკეული დაწესებულების მართვის თავისებურების გათვალისწინებით წამოჭრილ პრობლემებს განიხილავენ და მათ გადასაჭრელად საჭირო რეკომენდაციებს შეიმუშავებენ. ტემპუსის საგრანტო პროექტის მიზანია უნივერსიტეტის მართვის ინტეგრირებული სისტემის შექმნა და დანერგვა უკრაინაში, ბელორუსიაში, მოლდოვასა და საქართველოში ევროპული გამოცდილების საფუძველზე. პროგრამა ითვალისწინებს უნივერსიტეტის ეფექტური მენეჯმენტისთვის აუცილებელი ინფორმაციული ნაკადის აღრიცხვას, მართვას, შენახვასა და დაცვას კომპიუტერული ტექნოლოგიების გამოყენებით.