ბათუმის შოთა რუსთაველის სახელმწიფო უნივერსიტეტისა და საერთაშორისო სტომატოლოგიური განათლების აკადემიის ურთიერთთანამშრომლობის მემორანდუმის ფარგლებში, ბსუ-ში ჩატარდა სწავლების კურსი „სტომატოლოგიური კლინიკების ტექნიკური რეგლამენტი“. კურსს უძღვებოდა ჯანდაცვის ექსპერტი თამარ ციხისელი. სწავლებაში მონაწილეობა მიიღეს ბსუ-ს სტუდენტებმა, სტომატოლოგიის დეპარტამენტის პროფესორ-მასწავლებლებმა და რეგიონის სტომატოლოგიური კლინიკების ხელმძღვანელებმა.
ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და ესთეტიკური მედიცინის კლინიკა „ტოტალ შარმის“ დირექტორმა კონსტანტინე სულამანიძემ თანამშრომლობის მემორანდუმს მოაწერეს ხელი. ხელშეკრულება მიზნად ისახავს ერთობლივი საგანმანათლებო-სამეცნიერო პროექტების განხორციელებას. მემორანდუმის ფარგლებში ჩატარდება კონფერენციები, საზაფხულო სკოლები, ტრენინგები და სემინარები. დოკუმენტი ასევე ითვალისწინებს სტუდენტთა სასწავლო პრაქტიკის გავლას და საგანმანათლებლო და სამეცნიერო-კვლევითი მენეჯმენტის გამოცდილების გაზიარებას.
ცნობილმა პლასტიკურმა ქირურგმა, კლინიკა „ტოტალ შარმის“ მფლობელმა კონსტანტინე სულამანიძემ ბსუ-ს საბუნებისმეტყველო მეცნიერებათა და ჯანდაცვის ფაკულტეტის ქართველი და უცხოელი სტუდენტებისათვის საჯარო ლექცია წაიკითხა თემაზე: „პლასტიკური ქირურგიის ხელოვნება“. ქირურგმა ყურადღება გაამახვილა პლასტიკური ქირურგიის პოპულარიზაციაში სოციალური მედიის მნიშვნელობაზე, ახალგარზდებს დარგში განხორციელებული და მიმდინარე მიღწევები გააცნო და საკუთარი გამოცდილება გაუზიარა. კონსტანტინე სულამანიძე არის აპტოს ძაფების და მეთოდების იდეის თანაავტორი, საერთაშორისო სასწავლო კურსებისა და საჩვენებელი ოპერაციების ორგანიზატორი, რომელსაც ჩატარებული აქვს მრავალი რეკონსტრუქციულ-პლასტიკური და ესტეტიკური ოპერაცია. ლექციის დასრულების შემდეგ კონსტანტინე სულამანიძემ სტუდენტების შეკითხვებს უპასუხა.
საქართველოს გარემოს დაცვისა და სოფლის მეურნეობის მინისტრის მოადგილემ სოლომონ პავლიაშვილმა, გარემოსდაცვითი ინფორმაციისა და განათლების ცენტრის დირექტორმა თამარ ალადაშვილმა და სხვა წარმომადგენლებმა ბსუ-ს სტუდენტებს „მწვანე სტიპენდიების” პროგრამა წარუდგინეს. „მწვანე სტიპენდიების” პროგრამას ცენტრი გაეროს განვითარების პროგრამასთან (UNDP) თანამშრომლობით, პროექტის „კლიმატის ცვლილებით გამოწვეული კატასტროფების რისკის შემცირება საქართველოში” ფარგლებში ახორციელებს, რომელიც მაღალი აკადემიური მოსწრების მაგისტრატურის სტუდენტებს შესაძლებლობას აძლევს, მიიღონ ერთჯერადი სტიპენდია 1500 ლარის ოდენობით.
ბსუ-ს სოფლის მეურნეობის ექსტენციის პროექტის ფარგლებში, აშშ-ის სოფლის მეურნეობის დეპარტამენტის (USDA) ვაშინგტონისა და თბილისის ოფისის წარმომადგენლები, აშშ-ის აიდაჰოსა და მისისიპის უნივერსიტეტების ექსპერტები და ორგანიზაცია „მომავლის ფერმერის” წარმომადგენლები ეწვივნენ. ბსუ-ს რექტორთან მერაბ ხალვაშთან და პროფსორ-მასწავლებლებთან გამართულ შეხვედრაზე დელეგაციის წევრებმა ამერიკის სოფლის მეურნეობის დეპარტამეტის წარმომადგენელმა ბენჯამინ კაირნმა, აიდაჰოს უნივერსიტეტის პროფესორმა ბრაინ სმოლმა, მისისიპის უნივერსიტეტის პროფესორმა სტივენ რაიკლმა, აშშ-ის სოფლის მეურნეობის დეპარტამენტის (USDA) თბილისის ოფისის წარმომადგენლებმა გოჩა შაინძემ და დემნა ძირკვაძემ ისაუბრეს პროექტში უნივერსიტეტის ჩართულობასა და სამომავლო გეგმებზე. დაიგეგმა გრძელვადიანი პროფესიული საგანმანათლებლო პროგრამის შემუშევება, თევზის კვებისა და ჯანმრთელობის კვლევებში ბსუ-ს ჩართვა და ტრენინგებში სტუდენტების მონაწილეობა.
