23 ოქტომბერს ბსუ-ს საბუნებისმეტყველო მეცნიერებათა და ჯანდაცვის ფაკულტეტის ეკოლოგიის სპეციალობის II კურსის სტუდენტებმა მონაწილეობა მიიღეს ბათუმის ბოტანიკურ ბაღის მიერ ორგანიზებულ ხის დარგვის საერთაშორისო დღისადმი მიძღვნილ ღონისძიებაში. სტუდენტებს ამ დღის მნიშვნელობასა და ბაღის ფლორისტულ სიმდიდრეზე ბაღის დირექტორი ირაკლი არჩაია ესაუბრა. ახალგაზრდებმა მოისმინეს ლექცია კლიმატის გლობალური ცვლილებების შესახებ, შემდეგ კი ბოტანიკური ბაღის ფლორისტულ განყოფილებებსა და საკოლექციო ნაკვეთებზე ნერგები დარგეს. ღონისძიების მიზანი იყო მწვანე ნარგაობის მნიშვნელობის შესახებ ცნობიერების ამაღლება, აქტიური მოქალაქეობრივი პოზიციის ჩამოყალიბება, ბაღის მერქნიან მცენარეთა კოლექციების შევსება-განახლებასა და გაზრდაში სტუდენტ-ახალგაზრდობის აქტიური ჩართვა.

გერონტოლოგიისა და გერიატრიის საერთაშორისო სკოლა გაიხსნა ბათუმის შოთა რუსთაველის სახელმწიფო უნივერსიტეტში. ღონისძიების მიზანია დაბერების პროცესისა და მექანიზმის შესახებ არსებული თანამედროვე მიღწევების გაცნობა და პოპულარიზაცია. ოთხდღიანი სკოლა ითვალისწინებს ასაკთან ასოცირებული დაავადებების მკურნალობის ახალი მეთოდების სწავლებასა და გამოცდილების გაზიარებას. ბიოლოგიის, მედიცინის, სოციალური მეცნიერებების, ასაკოვან ადამიანთა მოვლა-მომსახურების დარგის მკვლევარები, სპეციალისტები, სტუდენტები გაეცნობიან გერონტოლოგიის ფუნდამენტური კონცეფციებს, სხვადასხვა ქვეყნის ხანდაზმული მოსახლეობის სოციალური მდგომარეობის საკითხებსა და სოციალურ პაკეტებს. სწავლებას უძღვებიან დარგის წამყვანი ქართველი, ავსტრიელი, მალტელი მეცნიერები და ექსპერტები. სეზონური სკოლის ფარგლებში 25 ოქტომბერს, ხულოს ჰოსპიტალში გაიმართება საქველმოქმედო სამედიცინო აქცია.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტუდენტთა და ქ.ბათუმის № 1 საჯარო სკოლის ეკოკლუბის მოსწავლეთა მონაწილეობით მოეწყო ეკოტური მტირალას ეროვნულ პარკში. ეკოტურის მიზანი იყო გარემოსდაცვითი მიმართულებით ახალგაზრდობის ცნობიერების ამაღლება. ვიზიტორთა ცენტრში, მტირალას ეროვნული პარკის ადმინისტრაციის ბუნებრივი რესურსების უფროსი სპეციალისტი თორნიკე ტაბატაძე ეკოტურის მონაწილეებს ესაუბრა, დაცული ტერიტორიების როლსა და მნიშვნელობაზე და მტირალას ეროვნული პარკის შესაძლებლობაზე ეკოტურიზმის განვითარების კუთხით აჭარის რეგიონში, რის შემდეგ სტუდენტები და მოსწავლეები გაეცნენ ეკოტურისტულ ბილიკზე არსებულ ინფრასტრქუტურას და ბიომრავალფეროვნებას.

კლაიპედას უნივერსიტეტსა და ბათუმის შოთა რუსთაველის სახელმწიფო უნივერსიტეტს შორის გაფორმებული მემორანდუმის ფარგლებში საბუნებისმეტყველო მეცნიერებათა და ჯანდაცვის ფაკულტეტის 13 სტუდენტმა 2018 წლის 1-30 სექტემბერს კლაიპედას უნივერსიტეტის ჰოსპიტალში სტაჟირება გაიარეს. მომავალმა ექიმებმა პრაქტიკა მიიღეს ზოგადი ქირურგიის, მეან-გინეკოლოგიის, რადიოლოგიის, ტრავმატოლოგიის, რეანიმაცია-ანესთეზიოლოგიისა და კლინიკური ლაბორატორიის მიმართულებით.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და ივანე ბერიტაშვილის ექსპერიმენტული ბიომედიცინის ცენტრის დირექტორმა დავით ნადარეიშვილმა ბათუმის სამეცნიერო პიკნიკის ფარგლებში მემორანდუმს მოაწერეს ხელს. ხელშეკრულება ითვალისწინებს თანამშრომლობას ბიოლოგია-ეკოლოგიის მიმართულებით, სამეცნიერო-ტექნოლოგიური და ინოვაციური პოტენციალის საერთო სივრცეში ინტეგრაციას. მემორანდუმის ფარგლებში დაიგეგმა მაღალი კვალიფიკაციის სპეციალისტების მომზადება, ერთობლივი საგანმანათლებლო, სამეცნიერო პროექტების განხორციელება, სამეცნიერო კონფერენციების, სემინარების, საკვალიფიკაციო კურსების ჩატარება და გამოცდილების გაზიარება.