10 ივნისიდან 10 ოქტომბრის ჩათვლით ტურიზმის ფაკულტეტის 78 სტუდენტი 2 ეტაპად, სასწავლო პრაქტიკას გერმანიის მაღალი კლასის სასტუმროებში გაივლიან. 2 თვის განმავლობაში მათ საშუალება ექნებათ გაეცნონ სასტუმროს ყველა ძირითად სტრუქტურულ ერთეულს. თეორიულ ცოდნის მიღებასთან ერთად ჩაერთონ სასტუმროს ყოველდღიურ საქმიანობაში, მიიღონ პრაქტიკული უნარ-ჩვევები და კომპეტენციები, რაც სამომავლოდ, საერთაშორისო ტურისტული მომსახურების ბაზარზე წარმატებით დასაქმების საშუალებას მისცემს. პრაქტიკა უზრუნველყოფილია გერმანიის შვერინის ბალტიკის კოლეჯთან გაფორმებული მემორანდუმის საფუძველზე. ფინანსური მხარდამჭერები კი არიან ქ. ბათუმის მერია და აჭარის სპორტისა და ახალგაზრდულ საქმეთა დეპარტამენტი.

ახალი ეკონომიკური სკოლის (NESG), ავსტრიის ეკონომიკური ცენტრისა და ფრიდრიხ ნაუმანის თავისუფლების ფონდის წარმომადგენლებმა ტურიზმის ფაკულტეტის სტუდენტებისთვის საჯარო ლექცია გამართეს თემაზე: „ საქართველოს პერსპექტივები გლობალური ეკონომიკური ცვლილებების პირობებში’’. უცხოელმა პროფესორებმა ახალგაზრდებს გლობალური და ტრანსფორმირებადი ეკონომიკის პირობებში ახალი გამოწვევები გააცნეს, სახელმწიფოს როლსა და მნიშვნელობაზე ესაუბრეს.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებმა საერთაშორისო ტურისტულ გამოფენაში „ექსპობათუმი - 2016” მიიღეს მონაწილეობა. უმაღლესი საგანმანათლებლო დაწესებულების სტუდენტები ჩართული იყვნენ საორგანიზაციო საკითხებში, გაეცნენ საერთაშორისო გამოფენების მნიშვნელობას, გაიარეს პრაქტიკა და მიიღეს გამოცდილება, რომელიც მათ სამომავლო კარიერულ წინსვლაში დაეხმარება. საერთაშორისო ტურისტული გამოფენა „ექსპობათუმი - 2016” 13-15 მაისს, სასტუმრო „შერატონ ბათუმში“ გაიმართა და მასში 8 ქვეყნის 70-მდე კომპანია იყო წარმოდგენილი.

სასწავლო-პრაქტიკული ხასიათის ტური ისტორიულ ტაო-კლარჯეთში - ასე ეწოდა ტურიზმის ფაკულტეტის სტუდენტთა ორდღიან მოგზაურობას ისტორიულ ტაოში. ფაკულტეტის 50 სტუდენტმა იშხნის, ოშკის, ხახულის, ოთხთას, პარხალის, დოლისყანის ტაძრები და სამონასტრო კომპლექსები მოინახულეს, კულტურულ ტურიზმსა და საექსკურსიო საქმეში პროფესიული უნარ-ჩვევების პირველი გამოცდა იქ, ისტორიულ საქართველოში ჩააბარეს.

2016 წლის 29 მაისიდან 6 ივნისის ჩათვლით, ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტისა და გერმანიის ევროპული ბიზნესის სკოლის ორგანიზებით II საერთაშორისო საზაფხულო სკოლა „ტურიზმი: ეკონომიკა და ბიზნესი“ გერმანიაში ქ. ბერლინში ჩატარდება. სწავლება მიზნად ისახავს ტურიზმის ინდუსტრიის სიახლეების გაცნობასა და გერმანელი კოლეგების გამოცდილების გაზიარებას. საერთაშორისო საზაფხულო სკოლაში ტურიზმის ფაკულტეტის 10 სტუდენტი მიიღებს მონაწილეობას.