დღეს, ბათუმის შოთა რუსთაველის სახელმწიფო უნივერსიტეტის იურიდიულ ფაკულტეტზე კონსიტუციონალისტებმა კოტე ჩოკორაიამ და ალიკა კეშელავამ საჯარო ლექცია გამართეს თემაზე: „საქართველოს კონსტიტუციის თანამედროვე გამოწვევები’’. შეხვედრა ინსტიტუციური განვითარების ცენტრის პროექტის „ კონსტიტუცია ყველასია’’ ფარგლებში ჩატარდა და პრეზიდენტის არჩევის წესს, საარჩევნო სისტემასთან დაკავშირებულ ცვლილებებს და სხვა აქტუალური საკითხებს ეხებოდა. საჯარო ლექციას იურიდიული ფაკულტეტის სხვადასხვა კურსის სტუდენტი ესწრებოდნენ. შეხვედრა კითხვა-პასუხის რეჟიმში დასრულდა.

საქართველოს პროკურატურის წარმომადგენლებმა ბსუ-ს იურიდიული ფაკულტეტის სტუდენტებთან საინფორმაციო შეხვედრა გამართეს პროკურატურაში გამოცხადებულ სტაჟირების კონკურსთან დაკავშირებით. სტუდენტებს საშუალება ჰქონდათ საჭირო ინფორმაცია მიეღოთ როგორც კონკურსის შესახებ, ასევე პროკურატურის ორგანიზაციული სტრუქტურის, საქმიანობის ძირითადი მიმართულებებისა და ღირებულებების შესახებ.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტებისათვის საქართველოს საკონსტიტუციო სასამართლოს მოსამართლემ, თბილის ივ. ჯავახიშვილის უნივერსიტეტის პროფესორმა მაია კოპალეიშვილმა საჯარო ლექცია გამართა თემაზე „საკონსტიტუციო სასამართლოს როლი ქართულ მართლმსაჯულებაში“.

საქართველო-უკრაინას შორის დიპლომატიური ურთიერთობების დამყარების 25 წლისადმი მიძღვნილი ერთობლივი საერთაშორისო სამეცნიერო კონფერენცია გაიხსნა თემაზე: „უკრაინა და საქართველო, დიპლომატიური ურთიერთობები, საერთაშორისო კავშირები, კულტურული დიპლომატია“. ორდღიან სამეცნიერო სესიაზე ქართველი, უკრაინელი, პოლონელი, რუმინელი პროფესორ-მასწავლებლები და დიპლომატიური კორპუსის წარმომადგენლები დარგის აქტუალურ საკითხებს განიხილავენ. სამეცნიერო კონფერენციის მუშაობა სამ სექციაში წარიმართება და წარმოდგენილი იქნება 40-მდე სამეცნიერო მოხსენება.

ტელეკომუნიკაციების ომბუდსმენი თამთა ტეფნაძემ ბათუმის შოთა რუსთაველის სახელმწიფო უნივერსიტეტის სტუდენტებთან შეხვედრა გამართა თემაზე: „გაიცანი ტელეკომუნიკაციების ომბუდსმენი“. ღონისძიება მიზნად ისახავდა ახალგაზრდებში ცნობიერების ამაღლებასა და კანონმდებლობით მინიჭებული უფლებების, კომპანიების ვალდებულებების, საჩივრის, განცხადების განხილვის წესებისა და ვადების გაცნობას. საქართველოს კომუნიკაციების ეროვნულ კომისიასთან მოქმედი მომხმარებელთა ინტერესების საზოგადოებრივი დამცველის სამსახური „ეროვნული მარეგულირებელი ორგანოების შესახებ“ მომხმარებელთა ინტერესების დაცვის დამატებითი გარანტიების შესაქმნელად მარეგულირებელ ორგანოსთან, მარეგულირებელი კომისიის აპარატისაგან დამოუკიდებლად ჩამოყალიბდა. მომხმარებელთა ინტერესების საზოგადოებრივი დამცველის სამსახურის ფუნქციონირების მიზანია ელექტრონული კომუნიკაციებისა და მაუწყებლობის სფეროში მომხმარებელთა უფლებებისა და კანონიერი ინტერესების დაცვა.