ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტს ფულბრაიტის აკადემიური გაცვლის პროგრამით ეწვია პორტლანდის უნივერსიტეტის (აშშ) პროფესორი, ენდრიუ ნუქსოლი. გარდა საგანმანათლებლო პროგრამებში ჩართულობისა, ვიზიტორი პროფესორი ბსუ-ს აკადემიური პერსონალისა და სტუდენტებისთვის ჩაატარებს სემინარებს ინოვაციური ტექნოლოგიების გამოყენების შესაძლებლობებზე (სამუშაო ენაა ინგლისური). სემინარზე დამსწრეთა რაოდენობა შეზღუდულია.

„ერაზმუს+“–ის პროექტის „ინოვაციები კურიკულუმში სოციალური ჩართულობის მხარდასაჭერად" (Curriculum Innovation for Social Inclusion – CISI) ფარგლებში, ბათუმის შოთა რუსთაველის სახელმწიფო უნივერსიტეტში, ჰიბრიდულ რეჟიმში მოკლევადიანი ტრენინგი ჩატარდა თემაზე: „ემოციური და ქცევითი დარღვევების მქონე მოსწავლეთა სწავლება“. ტრენინგზე მასწავლებლები, სტუდენტები და სსსმ მოსწავლეთა მშობლები გაეცნენ მოსწავლეებში ემოციური და ქცევითი დარღვევების გამოვლინებების, მახასიათებლების, მიზეზების, შეფასების მეთოდოლოგიის, სასკოლო გარემოში მათი ადაპტაციისთვის შესაბამისი ინტერვენციების დაგეგმვა-გამოყენებისა და ქცევითი დარღვევების მქონე მოსწავლეთა სწავლების სტრატეგიებს.

9-10 თებერვალს, ევროკავშირის „Erasmus+”-ის პროექტის DITECH-ის (Developing and Implementing Technology-Enhanced Teaching and Learning at Georgian HEIs/ ტექნოლოგიებით გაძლიერებული სწავლება და სწავლა საქართველოს უნივერსიტეტებში) ფარგლებში, გაიმართა მეორე 6-საათიანი ტრენინგ-ვორკშოპი „საგანმანათლებლო ტექნოლოგიების და პლატფორმების გამოყენება სწავლა-სწავლების პროცესში“. ტრენინგს უძღვებოდა ზუსტ მეცნიერებათა და განათლების ფაკულტეტის ასისტენტ პროფესორი ელზა ჯინჭარაძე. მონაწილეები გაეცნენ საგანმანათლებლო ვიდეობის შექმნის პედაგოგიკურ და ტექნოლოგიურ ასპექტებს, ტექნოლოგიებით გამდიდრებული სწავლების ინოვაციურ სტრატეგიებსა და ციფრული სასწავლო გარემოს შექმნის გზებს.

ევროკავშირის კვლევისა და ინოვაციის პროგრამის „ჰორიზონტი 2020“ ფარგლებში დაფინანსებული პროექტშის „ციფრული ინოვაციების დანერგვა სკოლებში რეგიონული ინოვაციური ჰაბებისა და მენტორინგის მოდელის საშუალებით“ („iHubs4Schools - Accelerating Digital Innovation in Schools through Regional Innovation Hubs and a Whole-School Mentoring Model“) ფარგლებში, ბსუ-ს პერსონალმა შეხვედრა გამართა პროექტში ჩართული საპილოტე სკოლების მასწავლებლებთან. შეხვედრის მიზანი იყო პროექტის ფარგლებში შემუშავებული მენტორინგის მოდელის პილოტირების პროცესის შეფასება და უკუკავშირი. მენტორინგის მოდელი გულისხმობს სკოლების უწყვეტ მეთოდოლოგიურ მხარდაჭერას შეფასების უახლესი მიდგომებისა და სწავლის ანალიტიკური სტრატეგიების გამოყენებით. პროექტის ფარგლებში დაგეგმილმა აქტივობებმა ასევე ხელი შეუწყო სკოლებს შორის ურთიერთთანამშრომლობის გაძლიერებას ციფრული ინოვაციების დანერგვის კუთხით.

ბათუმის შოთა რუსთაველის სახელმწიფო უნივერსიტეტის ბავშვთა უფლებების ცენტრში იუნისეფის წარმომადგენელებთან შეხვედრა გაიმართა. გაეროს ბავშვთა ფონდის წარმომადგენელმა საქართველოში ღასან ხალილმა და ბსუ-ს რექტორმა, პროფესორმა მერაბ ხალვაშმა ბსუ-ს ბავშვთა უფლებების ცენტრის საქმიანობა შეაჯამეს და სამომავლო გეგმებზე ისაუბრეს. ღონისძიების ფარგლებში ასევე გაიმართა დისკუსია ცენტრის განვითარების და მდგრადობის სტრატეგიის შესახებ. ბავშვთა უფლებების ცენტრი ბათუმის სახელმწიფო უნივერსიტეტში 2021 წელს დაარსდა, სადაც შემუშავდა საგანმანათლებლო მასალები და იმართება ტრენინგები, საჯარო ლექციები და დისკუსიები ბავშვთა უფლებების საკითხებზე.