იურიდიული და სოციალურ მეცნიერებათა ფაკულტეტის ასისტენტი ეთერ ვარშანიძე ქალაქ ბათუმის ალექსანდრე დიუმას სახელობის ქართულ-ფრანგული სკოლის VII-X კლასის მოსწავლეებს შეხვდა და საჯარო ლექცია წაიკითხა თემაზე -“ეფექტური გზები მიზნის დასახვისა და ამოცანების შესასრულებლად “. ეთერ ვარშანიძემ მოსწავლეებს მიაწოდა ინფორმაცია თუ რას უნდა მიექცეს ყურადღება მიზნის დასახვისა და განხორციელებისთვის და როგორ უნდა დავძლიოთ სირთულეები. შეხვედრა კითხვა - პასუხის რეჟიმში წარიმართა.

21-22 დეკემბერს, ბათუმის შოთა რუსთაველის სახელმწიფო უნივერსიტეტში, საქართველოს ოკუპირებული ტერიტორიიდან დევნილთა,შრომის, ჯანმრთელობისა და სოციალური დაცვის სამინისტროს პროფესიული განვითარების საბჭოს მიერ აკრედიტირებული უწყვეტი სამედიცინო განათლების პროგრამის „პაროდონტის დაავადებათა დიაგნოსტიკის თანამედროვე ასპექტები“ ფარგლებში, სერტიფიცირებული ექიმ-სტომატოლოგებისათვის ტრენინგი ჩატარდა.

ბსუ უკვე მესამე წელია მაღალმთიან აჭარაში მცხოვრებ აბიტურიენტებს ერთიანი ეროვნული გამოცდებისთვის - მათემატიკაში, ინგლისურ ენაში, ქართულ ენასა და ლიტერატურაში უფასოდ ამზადებს. 1-ელ დეკემბერს უნივერსიტეტმა განაახლა აბიტურიენტთა მომზადების მოკლევადიანი მიზნობრივი საგანმანათლებლო პროგრამების განხორციელება შუახევისა და ხულოს მუნიციპალიტეტის მე-12 კლასის მოსწავლეებისთვის. ბსუ-ს რექტორის მოადგილე თამარ სირაძე მუნიციპალიტეტებში იმყოფებოდა, აბიტურიენტებს შეხვდა და ადგილზე გაეცნო პროგრამის მიმდინარეობას.

ჩოხატაურის რაიონის სოფელ ქვემობნისა და ბუკნარის სკოლის მოსწავლეები ბათუმის შოთა რუსთაველის სახელმწიფო უნივერსიტეტს ეწვივნენ. ბსუ-ს რექტორის მოადგილემ, პროფესორმა თამარ სირაძემ სტუმრებს საუნივერსიტეტო ცხოვრება, საგანმანთლებლო პროგრამები და სტუდენტური პროექტები გააცნო. მოსწავლეებმა დაათვალიერეს უნივერსიტეტის მატერიალურ-ტექნიკური ბაზა, ბიბლიოთეკა, სასამართლო საიმიტაციო დარბაზი, სადაც როლური თამაშების ფორმატში იმიტირებული სასამართლო პროცესი გაითამაშეს, ასევე ქიმიის ლაბორატორიაში სახალისო ცდებში მიიღეს მონაწილეობა. შეხვედრისას სკოლის მოსწავლეებს სამახსოვრო საჩუქრები გადაეცათ.

31 ოქტომბერს შოთა რუსთაველის სახელმწიფო უნივერსიტეტში საბუნებისმეტყველო მეცნიერებათა და ჯანდაცვის ფაკულტეტის და გარემოს დაცვის ეროვნული სააგენტოს ორგანიზებით გაიმართა კონკურსი „შავი ზღვის ხმა“, რომელშიც მონაწილეობდნენ მოსწავლეები ექვსი სკოლიდან: სარფის საჯარო სკოლა; ბათუმის მე-2 საჯარო სკოლა, ბათუმის მე-6 საჯარო სკოლა, ქობულეთის მე-6 საჯარო სკოლა, ფოთის მე-4 საჯარო სკოლა და ანაკლიის საჯარო სკოლა.