ახალი ამბები

აჭარის ა.რ. დასაქმების სააგენტომ პარტნიორ ორგანიზაციებთან ერთად, ბათუმის შოთა რუსთაველის სახელმწიფო უნივერსიტეტის სტუდენტებს „სტუდენტების დასაქმების“ პროექტი წარუდგინა. პროექტი ახალგაზრდების დროებით სამუშაო ადგილებზე დასაქმებას, მოტივაციის ამაღლებას, პიროვნული პოტენციალის რეალიზებას, პრაქტიკული უნარ-ჩვევების შეძენასა და გამოცდილების მიღებას ითვალისწინებს. პირველ ეტაპზე დამსაქმებელთა საჭიროებების კვლევა ჩატარდება, რომლის შედეგების ანალიზის საფუძველზე, სტუდენტების გადასამზადებლად შემუშავდება მოკლევადიანი არაფორმალური განათლების მოდულები. პრეზენტაციაზე ბათუმის მერიის სპორტისა და ახალგაზრდობის განყოფილების წარომადგენელმა დასაქმების მსურველებს პროექტი „სტუდენტური საზაფხულო დასაქმება“ გააცნო.

დღეს, საქართველოს პრეზიდენტი გიორგი მარგველაშვილი ბათუმის შოთა რუსთაველის სახელმწიფო უნივერსიტეტში კამპანიის „კონსტიტუცია ყველასია“ ფარგლებში სტუდენტებს და პროფესორ-მასწავლებლებს შეხვდა. პრეზიდენტის ინიციატივა საკონსტიტუციო ცვლილებების განხილვის პროცესში საზოგადოების ჩართულობას გულისხმობს.ქვეყნის პირველმა პირმა კონსტიტუციაში შესატან ცვლილებებთან დაკავშირებით სტუდენტების და საზოგადოების სხვადასხვა ჯგუფების მოსაზრებები მოისმინა და შეკითხვებს უპასუხა.

დედაენის დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. ჩატარდა სტუდენტური აქცია და მოეწყო ექსპოზიცია “არა ბარბარიზმებს“, სადაც ახალგაზრდებმა ასი სიტყვა გამოფინეს. პროექტი მიზნად ისახავდა ქართულ ენაში მომრავლებული უცხოენოვანი ბარბარიზმების ნაცვლად საზოგადოებისთვის ქართული შესატყვისების შეთავაზებას. შოთა რუსთაველის დარბაზში პროფესორ-მასწავლებლებმა მოხსენებები წარმოადგინეს ქართული ენის სიწმინდეზე, მისი სწავლებისა და უფლებების დაცვის საკითხებზე. საჯარო ლექციების ციკლის დასასრულს, სტუდენტებმა და პროფესორ-მასწავლებლებმა ილია ჭავჭავაძის ძეგლი გვირგვინით შეამკეს.

ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში, რექტორის მოადგილეები ნათია წიკლაშვილი, თამარ სირაძე საერთაშორისო სადოქტორო სკოლის „დიგიტალური ჰუმანიტარიის“ გამარჯვებულ დოქტორანტებს შეხვდნენ და წარმატება მიულოცეს. საერთაშორისო პროექტს გოეთეს სახელობის უნივერსიტეტი ბათუმის შოთა რუსთაველის სახელმწიფო უნივერსიტეტთან და ივანე ჯავახიშვილის სახელობის თბილისის სახელმწიფო უნივერსიტეტთან ერთად ახორციელებს.

9 აპრილის მოვლენებიდან 28 წელი გავიდა. ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა ტრადიციულად, 1989 წლის 9 აპრილს მთავრობის სასახლესთან საქართველოს დამოუკიდებისათვის დაღუპული გმირების ხსოვნას პატივი მიაგეს.