ახალი ამბები

ბათუმის შოთა რუსთველის სახელმწიფო უნივერსიტეტსა და ყაზახეთის ჰუმანიტარულ-იურიდიულ უნივერსიტეტს (ყაზგუ) შორის გაფორმებული მემორანდუმის ფარგლებში, სტუდენტები სასწავლებლად ყაზახეთში მიემგზავრებიან. 7 თებერვალიდან ერთსემესტრიან სასწავლო კურსს ყაზგუში ბსუ-ს იურიდიული ფაკულტეტის 5 და ჰუმანიტარულ მეცნიერებათა ფაკულტეტის 1 სტუდენტი გაივლის. კომპეტენტურმა ჟიურიმ გაცვლით პროგრამის მონაწილეები ინგლისური ენის ცოდნითა და აკადემიური მოსწრების გათვალისწინებით გამოავლინა. პარალელურად მოკლევადიანი სასწავლო პროგრამით ბსუ-ში ისწავლის სამართალმცოდნეობის მიმართულების 15 ყაზახი სტუდენტი. ორი წლის განმავლობაში ბათუმში სასწავლებლად იმყოფებოდა 20-მდე ყაზახი.

დღეს, ბათუმის შოთა რუსთაველის სახელმწიფო უნივერსიტეტში განათლების საერთაშორისო ცენტრმა ფრანგულ ინსტიტუტთან ერთად, სასტიპენდიო პროგრამების „სამაგისტრო პროგრამები საფრანგეთში 2017-2018’’ პრეზენტაცია გამართა.
შეხვედრის ფარგლებში, საფრანგეთში სწავლის გაგრძელების მსურველმა სტუდენტებმა დაწვრილებითი ინფორმაცია მიიღეს საგრანტო კონკურსის პირობებსა და პროცედურებზე. განათლების საერთაშორისო ცენტრის სასტიპენდიო პროგრამა „სამაგისტრო პროგრამები საფრანგეთში 2017-2018“ - ის კონკურსის ფარგლებში გამარჯვებულ საქართველოს 15 მოქალაქეს სწავლას საფრანგეთში, განათლების საერთაშორისო ცენტრი, საფრანგეთის საელჩო საქართველოში და კამპუსს ფრანსი ფინანსურად ერთობლივად უზრუნველყოფენ.

ბათუმის შოთა რუსთველის სახელმწიფო უნივერსიტეტში ევროკავშირის კვლევისა და ინოვაციის ჩარჩო პროგრამის - ჰორიზონტი 2020 ფარგლებში, პროექტის KEAC-BSR - „ცოდნისა და აკადემიური კულტურის გაცვლა ჰუმანიტარულ სფეროში: ევროპა და შავი ზღვის აუზი, XVIII-XXI სს“ („KEAC-BSR Knowledge Exchange and Academic Cultures in the Humanities: Europe and the Black Sea Region, late 18th – 21st Centuries“) პირველი სამუშაო შეხვედრა გაიმართა. ახალი საგრანტო პროექტის მიზანია XVIII-XXI საუკუნეების ევროპისა და შავი ზღვის აუზის ქვეყნების ცოდნისა და აკადემიური კულტურის დინამიკის შესწავლა. ოთხი წლის განმავლობაში კორსორციუმის თორმეტი ქვეყნის (საქართველო, ავსტრია, მაკედონია, რუმინეთი, ბულგარეთი, თურქეთი, საბერძნეთ, მოლდოვა, უკრაინა, რუსეთი, სომხეთი, აზერბაიჯანი) წარმომადგენელები ინტერდისციპლინარული კვლევებს ჩაატარებენ.

გაეროში საქართველოს ახალგაზრდობის წარმომადგენელი თათია დოლიძე ბათუმის შოთა რუსთაველის სახელმწიფო უნივერსიტეტის სტუდენტებს შეხვდა. სტუმარი ახალგაზრდებს არაფორმალური განათლების მიღების, საზღვარგარეთ სწავლის და სტაჟირების მნიშვნელობაზე ესაუბრა. თათია დოლიძემ,ასევე, ყურადღება გაამახვილა უმუშევრობის, ეკონომიკური და სოციალური პრობლემების დაძლევის, ხარისხიანი განათლების ხელმისაწვდომობის საკითხებსა და ეკლესიის როლზე ახალგაზრდების არაფორმალურ განათლებაში.

დღეს, ბათუმის შოთა რუსთაველის სახელმწიფო უნივერსიტეტმა წმინდა მოწამე ეკატერინეს სახელობის სათნოების სავანეში საქველმოქმედო აქცია გამართა სახელწოდებით „ერთი დღე მოხუცთა თავშესაფარში“. კამპანიის ფარგლებში ბსუ-ს საბუნებისმეტყველო მეცნიერებათა და ჯანდაცვის ფაკულტეტის პროფესორებმა ბენეფიციარებს სამედიცინო მომსახურება გაუწიეს, ხოლო სტუდენტები მოწყალების დებთან ერთად, დღის განმავლობაში მოხუცებულებზე ზრუნავდნენ.აქციის ფარგლებში, უნივერსიტეტის ადმინისტრაციამ სათნოების სახლის მაცხოვრებლებს საჩუქრად ტკბილეული, საყოფაცხოვრებო და ჰიგიენური პროდუქცია გადასცა.