დღეს, აჭარის მთავრობის თავმჯდომარემ ზურაბ პატარაძემ უნივერსიტეტის რექტორთან მერაბ ხალვაშთან და აჭარის განათლების კულტურისა და სპორტის მინისტრთან ინგა შამილიშვილთან ერთად, ქობულეთში ფიტოპათოლოგიის და ბიომრავალფეროვნების კვლევითი ინსტიტუტისთვის გამოყოფილი ტერიტორია დაათვალიერა, ინსტიტუტის მეცნიერ-თანამშრომლებს გაესაუბრა და მათი საქმიანობის შესახებ ინფორმაცია მოისმინა.
სოფელ ნასაკირალში საჯარო სკოლის მოსწავლეებისა და საზოგადოების წარმომადგენლებისათვის ბათუმის შოთა რუსთაველის სახელმწიფო უნივერსიტეტის ღია კარის დღე გაიმართა. უნივერსიტეტის რექტორმა მერაბ ხალვაშმა მოსწავლეებს ინფორმაცია მიაწოდა სტუდენტური სერვისების, დაფინანსების, სტიპენდიების, გაცვლითი პროგრამებისა და სასკოლო ოლიმპიადების შესახებ. გაიმართა პრეზენტაცია, სადაც ახალგაზრდებმა დეტალური ინფორმაცია მიიღეს სასწავლო პროგრამებზე, ლაბორატორიებსა და საუნივერსიტეტო ცხოვრებაზე.
2017 წლის 3-8 აპრილს, საერთაშორისო სამეცნიერო-პრაქტიკული კონფერენცია «Ukraine-EU. Modern Technology, Bussines and Law» გაიმართა სამი ქვეყნის - სლოვაკეთის, უნგრეთისა და ავსტრიის უნივერსიტეტებში.ღონისძიება საგანმანათლებლო-სამეცნიერო თანამშრომლობის საერთაშორისო კონსორციუმის ფარგლებში ჩატარდა და ბათუმის შოთა რუსთაველის სახელმწიფო უნივერსიტეტი ორგანიზატორი და აქტიური მონაწილე იყო.
ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა ნატოს დღეებში მიიღეს მონაწილეობა. ბსუ-ს ფაბლაბის სამეწარმეო ინოვაციების ლაბორატორიაში ტექნოლოგიური ფაკულტეტის სტუდენტების მიერ ნატოს დღეების ფარგლებში დამზადებული თემატური ნამუშევრების გამოფენა-კონკურსი გაიმართა. საუკეთესო ესეკიზის ავტორად ტექნოლოგიური ფაკულტეტის არქიტექტურის სპეციალობის მეორე კურსის სტუდენტი ნანა პატარიძე დასახელდა. ნატოს დღეები საქართველოში წელს 2-11 აპრილს მეათედ აღინიშნება.
მისი მიზანია საქართველოს მოქალაქეების ინფორმირება ჩრდილო-ატლანტიკური ალიანსის, საქართველოსა და ნატოს შორის არსებული თანამშრომლობის მექანიზმების, პერსპექტივებისა და გამოწვევების შესახებ.
აჭარის ფინანსთა და ეკონომიკის მინისტრი რამაზ ბოლქვაძე ბათუმის შოთა რუსთაველის სახელმწიფო უნივერსიტეტის სტუდენტებს შეხვდა. ეკონომიკის, ტურიზმის და სამართალმცოდნეობის მიმართულების სტუდენტებთან მინისტრმა აჭარის ეკონომიკურ და საინვესტიციო გარემოზე, მიმდინარე და დაგეგმილ პროექტებზე ისაუბრა. შეხვედრაზე რამაზ ბოლქვაძემ სტუდენტებს საინიციატივო ჯგუფის შექმნა შესთავაზა, სადაც ახალგაზრდებს თავიანთი იდეებისა და პროექტების განხორციელების შესაძლებლობა ექნებათ.
