სტუდენტური ჩემპიონატი კალათბურთში ბსუ-ს ნაკრების წარმატებით დაიწყო. უმაღლესი საგანმანათლებლო დაწესებულების ნაკრებმა დავით ტვილდიანის სახელობის სამედიცინო უნივერსიტეტის ნაკრები გასვლით შეხვედრაზე ანგარიშით 72:53 დაამარცხა. მორიგი შეხვედრა თბილისში, 22 მაისს, ბსუ-ს ნაკრებსა და ქართულ უნივერსიტეტს შორის გაიმართება. სტუდენტური ჩემპიონატი კალათბურთში, ყოველწლიურად, საუნივერსიტეტო სპორტის ფედერაციის ორგანიზებით ტარდება.
ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ თანამშრომლობის მემორანდუმს მოაწერეს ხელი. ორმხრივი შეთანხმების მიზანია ხელი შეუწყოს ნატოსა და ევროკავშირში საქართველოს ინტეგრაციას და საქართველოს მოსახლეობის ინფორმირებულობისა და ცნობადობის გაზრდას.
ბათუმის შოთა რუსთაველის სახელმწიფო უნივერსიტეტმა იელის უნივერსიტეტის (YALE) კურსდამთავრებულთა საინიციატივო დელეგაციას უმასპინძლა. შეხვედრაზე იელის უნივერსიტეტის კურსდამთავრებულებმა სტუდენტებს აშშ–ის ლიბერალური განათლების სისტემის ღირებულებები, შესაძლებლობები, დასაქმება, სტუდენტური ცხოვრება და უნივერსიტეტში ჩარიცხვის აუცილებელი კრიტერიუმები გააცნეს. ვიზიტის ფარგლებში ამერიკული უნივერსიტეტების რეგიონული საგანმანათლებლო გამოფენა გაიმართა. ფორუმზე ამერიკული უმაღლესი საგანმანათლებლო დაწესებულებები და პროგრამები იყო წარმოდგენილი.
უნივერსიტეტში საერთაშორისო კონფერენცია „ჩვენი სულიერების ბალავარი“ გაიხსნა. რიგით მერვე სამეცნიერო კონფერენციაში 60-მდე ქართველი და უცხოელი მეცნიერი მონაწილეობს. მკვლევრები ორი დღის განმავლობაში მოხსენებებს წარმოადგენენ ქრისტიანობის ისტორიის და ქართული მართლმადიდებლური ეკლესიის აქტუალურ საკითხებზე. კონფერენციის მოხსენებები კრებულის სახით უკვე დაიბეჭდა. საერთაშორისო სამეცნიერო კონფერენცია ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის კვლევითი ინსტიტუტის ორგანიზებით ტარდება.
ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა და საქართველოს სოფლის მეურნეობის მეცნიერებათა აკადემიის პრეზიდენტმა გურამ ალექსიძემ თანამშრომლობის მემორანდუმს მოაწერეს ხელი. მხარეები აგრარული მიმართულებით ერთობლივი პროგრამებისა და პროექტების განხორციელებაზე შეთანხმდნენ. დოკუმენტი ასევე ითვალისწინებს დარგში არსებული აქტუალური პრობლემების გადაწყვეტისათვის ერთობლივი შემოქმედებითი ჯგუფების ჩამოყალიბებას, სპეციალისტთა კვალიფიკაციის ამაღლებას, სამეცნიერო მიღწევებისა და ინოვაციური ტექნოლოგიების სფეროში გამოცდილების გაზიარებას.
