ახალი ამბები

გაეროს ბავშვთა ფონდის წარმომადგენელმა საქართველოში იესპერ მოლერმა, აჭარის განათლების, კულტურისა და სპორტის მინისტრმა მაია ხაჯიშვილმა და ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა ადრეული განათლებისა და ზრუნვის შესახებ მესამე საერთაშორისო კონფერენციის თარიღი გამოაცხადეს. კონფერენცია, რომელიც საქართველოს განათლების, მეცნიერებისა და სპორტის სამინისტროს, აჭარის განათლების, კულტურისა და სპორტის სამინისტროს, გაეროს ბავშვთა ფონდისა და ბათუმის შოთა რუსთაველის სახელმწიფო უნივერსიტეტის ორგანიზებით ტარდება, 26-27 სექტემბერს ბათუმში გაიმართება.

გაეროს ბავშვთა ფონდის (UNICEF) წარმომადგენელი საქართველოში იასპერ მოლერი ბათუმის შოთა რუსთაველის სახელმწიფო უნივერსიტეტს ფონდის თანამშრომლებთან ერთად ეწვია. შეხვედრაზე ბსუ-ს რექტორმა მერაბ ხალვაშმა და იასპერ მოლერმა ბსუ-ს ბავშვთა უფლებების ცოდნის ცენტრის მიღწევებსა და სამომავლო გეგმებზე ისაუბრეს. ვიზიტის ფარგლებში შედგა შეხვედრა ბსუ-ს ბავშვის უფლებათა ცოდნის ცენტრის წარმომადგენლებთან, სადაც დაიგეგმა საქართველოს უნივერსიტეტში მოქმედი ბავშვთა უფლებების ცოდნის ცენტრების ერთიანი ქსელის შექმნა.

პროექტის - „ჩვენი ჯარი“ ფარგლებში, ეროვნული გვარდიის უფროსი, ბრიგადის გენერალი რომან ჯოხაძე ბსუ-ს რექტორთან, პროფესორ მერაბ ხალვაშთან და თავდაცვის ძალების წარმომადგენლებთან ერთად, ბათუმის შოთა რუსთაველის სახელმწიფო უნივერსიტეტის სტუდენტებს შეხვდა. შეხვედრა მიზნად ისახავდა ახალგაზრდებში პატრიოტული სულისკვეთების ამაღლებას, სამხედრო-სამოქალაქო ურთიერთობების ხელშეწყობას, ჯანსაღი ცხოვრების წესისა და საქართველოს თავდაცვის ძალების პოპულარიზაციას. თავდაცვის ძალების წარმომადგენლებმა სტუდენტებს გააცნეს ინფორმაცია საქართველოს თავდაცვის ძალების ისტორიის, მისი ღირებულებების, სამხედრო ამოცანების, თავდაცვის სფეროში მიმდინარე რეფორმების, განათლების მიღების და თავდაცვის ძალებში დასაქმების შესაძლებლობის შესახებ. შეხვედრაზე რექტორის ინიციატივით დაიგეგმა სტუდენტებთან ერთად ქართულ ჯარში ერთი დღის გატარება.

ბათუმის შოთა რუსთაველის სახელმწიფო უნივერსიტეტში გაცვლითი პროგრამების წარდგენა გაიმართა. ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსმა მარინე გიორგაძემ, დეპარტამენტის უფროსის მოადგილემ, „ერაზმუს+“-ის კოორდინატორმა ნანა ყურშუბაძემ სხვადასხვა ფაკულტეტის საბაკალავრო, სამაგისტრო და სადოქტორო პროგრამების სტუდენტებს 2024-2025 სასწავლო წლისთვის გამოცხადებული გაცვლითი პროგრამები გააცნეს.

ბსუ-ს კლიმატგონივრული სოფლის მეურნეობის ექსტენციის პროექტის ფარგლებში აშშ-ის სოფლის მეურნეობის დეპარტამენტის და „მომავლის ფერმერის“ წარმომადგენლები ეწვივნენ. USDA-ის ვაშინგტონის ოფისის პროექტის ხელმძღვანელები: ქრეიგ ტენი, რაფაელ გუტიარესი, ოფისის წარმომადგენელი საქართველოში დემნა ძირკვაძე და „მომავლის ფერმერის" პროექტების მენეჯერი ნატალი კლდიაშვილი ბსუ-ს რექტორს მერაბ ხალვაშს და ადმინისტრაციის ხელმძღვანელს მერაბ დიასამიძეს შეხვდნენ. მხარეებმა შეხვედრაზე განხორციელებული პროექტები განიხილეს და სამომავლო თანამშრომლობის მიმართულებებზე იმსჯელეს. მიმდინარე წელს უნივერსიტეტის ჩართულობით კლიმატგონივრული სოფლის მეურნეობის მიმართულებით დაიგეგმა კონკრეტული ღონისძიებების განხორცილება.