ახალი ამბები

ახალგაზრდობის მომსახურების მსოფლიო დღეს მიეძღვნა ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის სტუდენტებისათვის გამართული „თანატოლთა მენტორობის პროგრამის“ წარდგინება. მშვიდობის კორპუსის ამერიკელმა მოხალისეებმა ელისონ სტივენსმა და რიჩარდ ლეტენდრემ ახალგაზრდებს პროგრამის მნიშვნელობასა და მასში მონაწილეობის პირობებზე ესაუბრენ. პროგრამაში ჩართულობა სტუდენტებს ერთი მხრივ, დაეხმარება სწავლა-სწავლების უნარების გაუმჯობესებასა და დასაქმებაში, მეორე მხრივ, ახალგაზრდები თავის წვლილს შეიტანენ „ათასწლეულის გამოწვევის ფონდი-საქართველოს“ მიერ გამოცხადებულ კონკურსში ფაკულტეტის წარმატების მიღწევაში.

ბათუმის შოთა რუსთაველის სახელმწიფო უნივერსიტეტში ქრისტიანული კვლევის ცენტრისა და ნიკო ბერძენიშვილის ინსტიტუტის ისტორიისა და არქეოლოგიის განყოფილების ორგანიზებით გაიხსნა რიგით მეხუთე საერთაშორისო სამეცნიერო კონფერენცია: „ჩვენი სულიერების ბალავარი“. ორი დღის განმავლობაში ქართველი, რუსი, სომეხი მკვლევრები და საქართველოს საპატრიარქოს წარმომადგენლები 41 მოხსენებას წარმოადგენენ ქართული მართლმადიდებლური ეკლესიის ისტორიაზე, ქრისტიანული სარწმუნოების წიაღში განვითარებულ კულტურასა და ხელოვნებაზე, ეთნიკურ და რელიგიურ ტოლერანტობაზე, კულტურათა დიალოგზე, სწავლებასა და აღზრდაზე. საერთაშორისო სამეცნიერო კონფერენციის მოხსენებები კრებულის სახით უკვე დაიბეჭდა.

შოთა რუსთაველის ეროვნული სამეცნიერო ფონდის დირექტორმა სულხან სისაურმა ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებისა და მეცნიერ-თანამშრომლებისათვის 2013 წლის საგრანტო სამეცნიერო კონკურსების თემაზე სემინარი ჩაატარა. სამეცნიერო ფონდის ხელმძღვანელმა მკვლევრებს „გამოყენებითი კვლევებისათვის სახელმწიფო სამეცნიერო გრანტების“, „ფუნდამენტური კვლევებისათვის სახელმწიფო სამეცნიერო გრანტების“ და „უცხოეთში მოღვაწე თანამემამულეთა მონაწილეობით ერთობლივი კვლევებისათვის სახელმწიფო გრანტის“ კონკურსების განხორციელების წესი და მათში მონაწილეობის პირობები გააცნო.

შოთა რუსთაველის დარბაზში ნ. ბერძენიშვილის ინსტიტუტის მკვლევრებმა პროფესორ-მასწავლებლებსა და საზოგადოების წარმომადგენლებს „სამხრეთ-დასავლეთ საქართველოს ისტორიის ნარკვევების (აჭარა)“ IV ტომი და 2012 წლის სამეცნიერო მუშაობის შედეგები წარუდგინეს. ნარკვევში აჭარის 1921-1990 წლების საზოგადეობრივ-პოლიტიკური, სოციალური, ეროვნულ-განმათავისუფლებელი მოძრაობის, ეკონომიკის, განათლებისა და კულტურის საკითხებია განხილული. ნაშრომში წარმოდგენილია უნიკალური საარქივო მასალა და საზოგადოებისათვის უცნობი ფაქტები. ნარკვევის IV ტომი გამოსაცემად ნ. ბერძენიშვილის ინსტიტუტის მეცნიერთა ჯგუფმა მოამზადა.

ტემპუსის საგრანტო პროექტის ფარგლებში - „სტუდენტთა კარიერული განათლების ცენტრის შექმნა საქართველოში“ ბათუმის შოთა რუსთაველის სახელმწიფო უნივერსიტეტში შეხვედრა გაიმართა. პარტნიორი უნივერსიტეტებისა და ორგანიზაციების წარმომადგენლები, ქართველი, ინგლისელი, უნგრელი და ლიტველი ექსპერტები სამი დღის განმავლობაში სტუდენტების სასწავლო პროგრამასა და პერსონალის ტრენინგის პროგრამას გაეცნობიან. შედგება „ეროვნული დისკუსია“, სადაც პროექტის მონაწილეები პროგრამების საბოლოო ვარიანტზე შეთანხმდებიან. საგრანტო პროექტი ორწლიანია და მიზნად ისახავს სტუდენტთა კარიერული განვითარების ხელშეწყობას. ასევე ითვალისწინებს უმაღლესი განათლების რეფორმასა და მოდერნიზაციის ხელშეწყობას პარტნიორი ქვეყნების უმაღლესი სასწავლებლების საუნივერსიტეტო მენეჯმენტისა და სტუდენტთა მომსახურების სფეროებში. პროგრამის ფარგლებში უმაღლესი საგანმანათლებლო დაწესებულების ბაზაზე მომზადდებიან ტრენერები, რომლებიც სტუდენტებს დაეხმარებიან სამსახურის არა ერთჯერადად მოძებნაში, არამედ დამსაქმებლებთან სწორი კომუნიკაციის წარმოებაში, საკუთარი შესაძლებლობების წარმოჩენაში, კარიერის უკეთ დაგეგმვაში, გუნდური მუშაობის და გასაუბრებისათვის საჭირო უნარ-ჩვევების შეძენაში.