11-12 ივნისს საბუნებისმეტყველო მეცნიერებათა და ჯანდაცვის ფაკულტეტის ეკოლოგიისა და ბიოლოგიის სპეციალობების სტუდენტები და აკადემიური პერსონალი ართვინის ჭოროხის უნივერსიტეტს ეწვივნენ. ვიზიტის ფარგლებში სტუდენტები შეხვდნენ უნივერსიტეტის ხელმძღვანელობას, პრორექტორ აიდინ თუფექჩიოღლუს, აკადემიურ პერსონალს და შავშეთის სატყეო სამმართველოს ხელმძღვანელობს. ახალგაზრდებს პროფესორმა თემელ გოქთურქმა ჩაუტარა პრაქტიკული მეცადინეობა მცენარეთა მავნებელ-დაავადებებზე.

ბსუ-ში საბუნებისმეტყველო მეცნიერებათა და ჯანდაცვის ფაკულტეტის ფარმაციის საგანმანათლებლო პროგრამის სტუდენტებს ფარმაცევტული კომპანია „იმპექსფარმის“ წარმომადგენლები - ადამიანური რესურსების განვითარების მენეჯერი გვანცა კუჭავა და ადამიანური კაპიტალის შერჩევის სპეციალისტი შეხვდნენ. ღონისძიებაში მონაწილეობდნენ აგრეთვე, ფაკულტეტის დეკანი, პროფესორი მარინა ქორიძე და ფარმაციის პროგრამის ხელმძღვანელი, ასოცირებული პროფესორი ეთერ ჯაყელი. „იმპექსფარმის“ წარმომადგენლებმა სტუდენტებს გააცნეს კომპანიის სტრატეგიული მიზნები, დასაქმებისა და სტაჟირების პროგრამები. შეხვედრაზე დაიგეგმა ბათუმის შოთა რუსთაველის სახელმწიფო უნივერსიტეტსა და ფარმაცევტულ კომპანია „იმპექსფარმს“ შორის თანამშრომლობის მემორანდუმის გაფორმება.

საბუნებისმეტყველო მეცნიერებათა და ჯანდაცის ფაკულტეტის სტუდენტები აჭარის ა. რ სოფლის მეურნეობის სამინისტროს ლაბორატორიულ კვლევით ცენტრს ეწვივნენ. დირექტორის მოადგილე ვახტანგ გოგუაძე ახალგაზრდებს ესაუბრა ლაბორატორიული კვლევითი ცენტრის მიღწევებსა და სამომავლო გეგმებზე. სტუდენტები გაეცნენ ფიტოსანიტარიული, ქიმიური, მიკრობიოლოგიური, რადიობიოლოგიური, ქრომატოგრაფიული ლაბორატორიების მუშაობის პრინციპებს და კვლევის მეთოდებს, კერძოდ, ნიადაგის პარაზიტების ფიტოპათოლოგიური კვლევის; წყალსა და საკვებ პროდუქტებში ატომურ-აბსორბციულ სპექტრომეტრზე მძიმე მეტალების კვლევის; მცენარეულ და ცხოველურ პროდუქტებში (ცეზიუმ 137, სტრონციუმ 90, კალიუმ 40) რადიობიოლოგიური კვლევის; წყალში პარაზიტების კვლევის, წყალში ჰაერსა და ნიადაგში კოლიმორფების, E.coli-ის, პოლიფაგების, სალმონელას და შიგელას კვლევის; წყალში ნიტრატების, ნიტრიტების, ქლორიდების კვლევის; საკვებ პროდუქტებში (თხილი, რძე, ბურღულეული) მიკოტოქსინების კვლევის მეთოდებს.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის გეოგრაფიის დეპარტამენტი ორგანიზებით, გარემოს დაცვის მსოფლიო დღე რამდენიმე ღონისძიებით აღინიშნა. პროფესორ-მასწავლებლების, სტუდენტებისა და მოსწავლეების მონაწილეობით გაიმართა ვორკშოფი. სტუდენტებმა და მოსწავლეებმა წარმოადგინეს მოხსენებები გარემოს დაცვის საკითხებზე და მოაწყვეს სასწავლო ტური მტირალას ეროვნული პარკში. ღონისძიების მიზანი იყო ახალგაზრდების ცნობიერების ამაღლება და მათი აქტიური ჩართულობა გარემოს დაცვით საკითხებში.

„უნივერსიტეტი - სკოლისათვის“ პროექტის ფარგლებში, ბსუ-ს ზუსტ მეცნიერებათა და ჯანდაცვის ფაკულტეტის პროფესორ-მასწავლებლებმა ერთი თვის განმავლობაში საჯარო ლექციები ჩაატარეს სხვადასხვა რეგიონის სკოლების მოსწავლეებისათვის. პროექტი მიზნად ისახავდა ბათუმის შოთა რუსთაველის სახელმწიფო უნივერსიტეტსა და სკოლებს შორის თანამშრომლობის გაღრმავებას, ბსუ-ს საგანმანათლებლო პროგრამების პოპულარიზაციას და მოსწავლეების ჩართვას საუნივერსიტეტო პროექტებში. ასოცირებულმა პროფესორმა ეთერ ჯაყელმა ხელვაჩაურის მუნიციპალიტეტის ჭარნალის საჯარო სკოლის მოსწავლეებისათვის ლექცია წაიკითხა თემაზე: „სამკურნალო მცენარეების შეგროვებისა და გამოშრობის წესები“, ხოლო ასოცირებულმა პროფესორმა ნინო ლომთათიძემ ბათუმის 1-ელ საჯარო სკოლაში მოხსენება წარადგინა თემაზე: „ადამიანის ჯანმრთელობა და გარემოს დაბინძურება“.