რესპირაციულ დაავადებათა შესწავლის პროექტის ფარგლებში ბათუმის შოთა რუსთაველის სახელმწიფო უნივერსიტეტს კანადელი მკვლევარი, ეპიდემიოლოგი, პროფესორი ჯოშუა ლოვსონი ეწვია. უცხოელი ექსპერტი რექტორის მოვალეობის შემსრულებელს მერაბ ხალვაშს, საბუნებისმეტყველო მეცნიერებათა და ჯანდაცვის ფაკულტეტის დეკანს მარინა ქორიძეს და პროექტის კოორდინატორს, ბსუ-ს პროფესორს ვახტანგ ბერიძეს შეხვდა. უცხოელი ექსპერტის ვიტის მიზანია ქ. ბათუმის ბავშვთა ასაკის კონტიგენტში ასთმის გავრცელების შესწავლისა და წამყვანი რისკ-ფაქტორების იდენტიფიცირების მიმდინარე ანალიზი და ერთობლივი კვლევების განხორციელება. ასთმის დიაგნოსტირების გაუმჯობესება რეგიონში პოლონეთის სილეზიის უნიერსიტეტის ინიციატივით გასული წლის შემოდგომაზე დაიწყო და უკვე გამოკითხულია ბათუმისა და ახლომდებარე რაიონების 6000-მდე მოსწავლე. მკვლევარი საქართველოში ბათუმის შოთა რუსთაველის სახელმწიფო უნივერსიტეტის მოწვევით იმყოფება.

ბიოლოგიის დეპარტამენტის ასოცირებული პროფესორები: ნანი გვარიშვილი, ნინო ლომთათიძე და ასისტენტ პროფესორი გუგული დუმბაძე თურქეთის რესპუბლიკის უმაღლესი განათლების აღმასრულებელი საბჭოს მიერ დაფინანსებული გაცვლითი პროგრამით - MEVLANA ართვინის ჭოროხის უნივერსიტეტში იმყოფებოდნენ. პროგრამის ფარგლებში პროფესორებმა ჩაატარეს ვორქშოპები თემაზე: „აჭარის ძირითადი ეკოსისტემები“, „საქართველოს ძირითადი ეკოლოგიური პრობლემები“, „ბიორიტმების გავლენა ადამიანზე“ და ჩატარდა ტესტირება სტუდენტთა ქრონოტიპების დასადგენად. პროფესორები ასევე გაეცნენ ართვინის ჭოროხის უნივერსიტეტის სამეცნიერო-კვლევით ლაბორატორიებს და თურქი კოლეგების სამეცნიერო მუშაობის მიმართულებებს.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ეკოლოგიის სპეციალობის სტუდენტები დედამიწის დაცვის დღესთან დაკავშირებით მიძღვნილ ღონისძიებაში მონაწილეობდნენ. ბათუმის ბოტანიკურ ბაღში გამართულ შეხვედრაზე სტუდენტებმა ღია ლექცია მოისმინეს თემაზე: „ბოტანიკური ბაღების მნიშვნელობა და მათი როლი ბიომრავალფეროვნების შენარჩუნებაში“, ასევე დარგეს მცენარეები ავსტრალიის ფიტოგეოგრაფიულ განყოფილებაში.

„დედამიწის საათის“ საერთაშორისო აქციის ეგიდით, ბათუმის შოთა რუსთაველის სახელმწიფო უნივერსიტეტის ბიოლოგიის დეპარტამენტმა და აჭარის გარემოს დაცვისა და ბუნებრივი რესურსების სამმართველომ საინფორმაციო შეხვედრა ჩაატარეს. ღონისძიება მიზნად ისახავდა საზოგადოებაში პასუხისმგებლობის ცნობიერების ამაღლებას კლიმატის გლობალური ცვლილების გამომწვევ მიზეზებზე. ბიოლოგიის სპეციალობის სტუდენტებმა შეხვედრაზე კლიმატის ცვლილებების აქტუალურ საკითხებზე მოხსენებები წარმოადგინეს, კინოჩვენება მოაწყეს და დისკუსია გამართეს. საერთაშორისო აქციის ფარგლებში სასტუმრო ,,შერატონ ბათუმმა“ აჭარის გარემოს დაცვისა და ბუნებრივი რესურსების სამმართველოსთან ერთად სტუდენტებსა და მოსწავლე-ახალგაზრდობის სასახლის აღსაზრდელებს უმასპინძლა. „დედამიწის საათის“ მეცხრე რაუნდი მსოფლიოში - 2015 წლის 28 მარტს, ადგილობრივი დროით საღამოს 20:30-21:30-მდე აღინიშნა. 20:30 საათზე გამოირთო ქალაქის არასასიცოცხლო ობიექტები, გარე განათებები და ,,შერატონ ბათუმის“ ფოიეში სანთლის შუქზე ტორტი გაიჭრა.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის ეკოლოგიისა და ტექნოლოგიური ფაკულტეტის სატყეო საქმის სპეციალობის სტუდენტები პროფესორ–მასწავლებლებთან ერთად აჭარის ა.რ. გარემოს დაცვისა და ბუნებრივი რესურსების სამმართველოსა და სსიპ სატყეო სააგენტოს მიერ ორგანიზებულ გამწვანების აქციაში მონაწილეობდნენ. ხელვაჩაურის რაიონის სოფელ აგარის სატყეოს ფართობზე, გამეჩხრებული ტყის ტერიტორიის შესავსებ–აღსადგენად 300–მდე კაკლის ხე დაირგო. აქცია ტყის მნიშვნელობაზე საზოგადოების ცნობიერების ამაღლებას ითვალისწინებდა. 21 მარტი ტყის (ტყის დაცვის) საერთაშორისო დღე გაეროს გენერალურმა ასამბლეამ აღიარა და 1971 წლიდან აღინიშნება.