აჭარის ავტონომიური რესპუბლიკის პროკურატურის პროკურორმა ვლადიმერ თურმანიძემ ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტებისათვის ჩაატარა საჯარო ლექცია თემაზე: „ოჯახური ძალადობა და ტრეფიკინგი“. მომხსენებელმა ახალგაზრდებს წარუდგინა ოჯახურ ძალადობასა და ტრეფიკინგთან დაკავშირებული ფაქტების სტატისტიკა საქართველოში და კონკრეტულად აჭარაში. მან მომავალ სამართალდამცავებს ასევე გააცნო დამთავრებული და მიმდინარე სისხლის სამართლის საქმეთა გამოძიების სტატისტიკა. ლექციის დასასრულს დისკუსია გაიმართა.

იურიდიული ფაკულტეტის II კურსის სტუდენტი გურამ ცინცაძე პროექტის „ბათუმის ახალგაზრდული მერია“ ფარგლებში ბათუმის ახალგაზრდა მერად აირჩიეს. პროექტის ფარგლებში მონაწილეებს შესაძლებლობა მიეცემათ გაეცნონ ქალაქის მთავრობის მუშაობას, მის არსს, ფუნქციებსა და ქალაქის განვითარებაში შეტანილ წვლილს. ბათუმის შოთა რუსთაველის სახელმწიფო უნივერსიტეტი ულოცავს გურამ ცინცაძეს გამარჯვებას და უსურვებს წარმატებებს.

ბათუმის შოთა რუსთაველის სახელმწიფო უნივერსიტეტის აკადემიური საბჭოს სხდომათა დარბაზში გაიმართა იურიდიული ფაკულტეტის სამართალმცოდნეობის სპეციალობის საგანმანათლებლო პროგრამის აკრედიტაციისათვის მზადების მორიგი ეტაპი. საგანმანათლებლო პროგრამა, შიდა მონიტორინგის მიზნით, განსახილველად წარედგინა უმაღლესი საგანმანათლებლო დაწესებულების ხარისხის უზრუნველყოფის სამსახურს. პროგრამის პრეზენტაცია გააკეთა პროგრამის ხელმძღვანელმა ასოცირებულმა პროფესორმა ლევან ჯაყელმა.

ადამიანის უფლებათა ევროპული სასამართლოს მოსამართლემ (1999-2009), ვენეციის კომისიის წევრმა, პროფესორმა მინდია უგრეხელიძემ ბათუმის შოთა რუსთაველის სახელმწიფო უნივერსიტეტში საჯარო ლექციები წაიკითხა სამართლის ფილოსოფიის, ევროპული სასამართლოების და საერთაშორისო სისხლის სამართალის თემებზე. ორი დღის განმავლობაში მომხსენებელმა უმაღლესი საგანმანათლებლო დაწესებულების სტუდენტებსა და პროფესორ-მასწავლებლებს სამართლის, როგორც განზომილებათა სისტემის (ლეგიმეტრიის), ადამიანის უფლებათა ევროპულ სასამართლოში პრეცედენტული სამართლისა და სისხლის სამართლის საერთაშორისო მართლმსაჯულების აქტუალური საკითხები გააცნო. საჯარო ლექციები აჭარის ა.რ. განათლების, კულტურისა და სპორტის სამინისტროს უმაღლესი განათლების ხელშეწყობის პროგრამის „საჯარო ლექციების“ ფარგლებში ჩატარდა.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტები ბათუმის საქალაქო სასამართლოს ეწვივნენ. მომავალ სამართალმცოდნეებს ბათუმის საქალაქო სასამართლოს თავმჯდომარემ დავით მამისეიშვილმა სასამართლოს მუშაობის ატმოსფერო, სასამართლო სხდომის მიმდინარეობის პროცესი, სასამართლოს ცალკეული სტრუქტურების ფუნქციონირების სპეციფიკა და აქტუალური საკითხები გააცნო. შეხვედრის დასასრულს, სამართალმცოდნეობის სპეციალობის სტუდენტები სასამართლო პროცესს დაესწრნენ. ღონისძიება მიზნად ისახავდა ახალგაზრდებში საფუძვლიანი განათლების მიღების მოტივაციის ამაღლებასა და პროფესიული უნარ-ჩვევების ჩამოყალიბებას.