სემინარის თემა ერთი ნაწილია კვლევისა, რომელიც მიზნად ისახავს რიზეს რეგიონის ფაზარის რაიონის სოფელ ჰამიდიეში მცხოვრებ ქობულეთელ მუჰაჯირთა შთამომავლების მეტყველების, ფოლკლორის, ყოფის, ისტორიის, მატერიალური კულტურის შესწავლას.
ჰამიდიეს ქართული ყველაზე ახლოს დგას აჭარის ქობულეთის მეტყველებასთან. ჰამიდიელი ქართველი მუჰაჯირები აჭარულ დიალექტზე, მეტწილად ქობულეთურ კილოკავზე, მეტყველებენ.
ჩვენი მიზანია, დავადგინოთ, თუ როგორ მეტყველებენ ჰამიდიელები, რა ხარისხით ცოცხლობს მათში საკუთრივ ქობულეთური და რით განსხვავდება ჰამიდიეს ქართული სხვა რეგიონებში მცხოვრები ქობულეთელი მუჰაჯირების მეტყველებისგან; როგორია ჰამიდიეს ქართულის ენობრივი სტრუქტურა და კონტაქტები თურქულთან.

„აღმოსავლეთი აღმოსავლეთია, დასავლეთი – დასავლეთი და ისინი ვერასოდეს გაუგებენ ერთმანეთს“ - ასე ფიქრობდა ორივე სამყაროს დიდებული მცოდნე რადიარდ კიპლინგი. რა თქმა უნდა, მას შემდეგ მრავალი ათწლეული გავიდა, პოსტინდუსტრიულმა, ინფორმაციულმა ეპოქამ ეს მკვეთრი განსხვავებანი თითქოს წაშალა აღმოსავლეთსა და დასავლეთს შორის, მაგრამ პოსტმოდერნისტი მწერლები, მათ შორის, ორჰან ფამუქიც, კიპლინგის ციტირებას ახდენს: ჯერ კიდევ „აღმოსავლეთი – აღმოსავლეთია, დასავლეთი – დასავლეთი“, თუმცა თან დასძენს: „ერთიც ალაჰისაა და – მეორეც.“

პროცესების ოპტიმალური მართვის თეორიის ინტენსიური განვითარება დაფუძნებულია მის მრავალმხრივ გამოყენებებზე. პროცესების უმრავლესობა, რომელთანაც გვაქვს საქმე პრაქტიკაში, მართვადია და ამიტომაც მათი რეალიზაციისას მნიშვნელოვანია მივიღოთ ოპტიმალური გადაწყვეტილება. საუკეთესო გადაწყვეტილების პოვნა და შესაბამისი პროგრამული ფუნქციების შექმნის საჭიროება არსებობს ყველგან. ხშირად პრაქტიკულად მნიშვნელოვანი პროცესები აღიწერებიან არალოკა-ლური სასაზღვრო პირობების მქონე კერძოწარმოებულიანი დიფერენციალური განტოლებებით. არალოკალური სასაზღვრო ამოცანები ბუნებრივი სახით მიიღებიან რეალური პროცესებისა და მოვლენების მათემატიკური მოდელების აგებისას სიმკვ-რივის თეორიიდან, დიფუზური პროცესებიდან, ქიმიური რეაქციის კინეტიკის, დრეკადობისა და გარსთა თეორიიდან და სხვა. საკმაოდ ხშირად გვხდება არა-ლოკალური სასაზღვრო ამოცანები მათემატიკური მოდელირებისას ბიოლოგიაშიც. კერძოდ, ასეთი ამოცანები მიიღება მიკრობების პოპულაციის გამრავლების პროცესების მოდელირებისას. ამიტომაც ასეთი სისტემების მართვის პრობლემების შესწავლა, რომელიმე პროგრამულ გარემოში შესაბამისი მართვის სისტემების ფუნქ-ციების შექმნა, მეტად მნიშვნელოვანია.

ხშირად თვლიან, რომ ღირებულებები მოსწავლეს მხოლოდ ზოგიერთი საგნის სწავლებისას უნდა განუვითარდეს (მაგ. ქართული ენა და ლიტერატურა, ისტორია). განათლების თანამედროვე მკვლევრები ამ მოსაზრებას განიხილავენ, როგორც მცდარს. სპეციალისტები თვლიან, რომ ტრადიციული გაკვეთილის მეშვეობით მოსწავლე იძენს მხოლოდ ცოდნას და მას „ასწავლიან“ ღირებულებებს. თანამედროვე გაკვეთილზე კი მოსწავლე იძენს ცოდნას და მას უვითარდება ეთიკური ფასეულობები და ღირებულებები. ასეთ გაკვეთილს ღირებულებებისა და ცოდნის შეძენის (VaKE) გაკვეთილს უწოდებენ, სადაც გამოიყენება სწავლა-სწავლების მეთოდი, რომელიც ცოდნის შეძენასთან ერთად მოსწავლეს ღირებულებებს უვითარებს, სასწავლო პროცესს საინტერესოს ხდის და სწავლა-სწავლების მიზნების მიღწევას აიოლებს.

ფემინიზმი არის მსოფლმხედველობა, რომლის მიხედვითაც ქალებს უნდა ჰქონდეთ ეკონომიკური, სოციალური, სამოქალაქო, პოლიტიკური და კულტურული უფლებები. ამ მიზნის მისაღწევად ქალებს ხანგრძლივი, წინააღმდეგობრივი და საინტერესო გზის გავლა მოუხდათ. ერთი მხრივ, ისინი იაზრებდნენ საკუთარ ადგილს საზოგადოებაში, სახელმწიფოში და მეორე მხრივ, იბრძოდნენ ჩაგვრის განმაპირობებელი კულტურული ნორმების შესაცვლელად.