ბათუმის შოთა რუსთაველის სახელმწიფო უნივერსიტეტში პროექტის „ციფრული-სკოლა საქართველო” შემაჯამებელი კონფერენცია გაიმართა. პროექტი ესტონეთის საგარეო საქმეთა სამინისტროს დაფინანსებით ხორციელდება და მიზნად ისახავს ესტონეთის წარმატებული გამოცდილების გაზიარებას განათლებაში ტექნოლოგიების ეფექტიანად დანერგვის უზრუნველსაყოფად. პროექტის მონაწილე 70 სკოლა, საკუთარი ინოვაციური პროექტი წარმოადგინა, თუ რას ნიშნავს „ციფრული სკოლა” მათ კონტექსტში და როგორ დანერგეს სკოლის ციფრული სტრატეგია. ასევე, ესტონეთიდან და საქართველოდან მოწვეულმა სტუმრებმა პრეზენტაციები გააკეთეს საგანმანათლებლო ტექნოლოგიების უახლესი ტენდენციების შესახებ.

ბათუმის შოთა რუსთაველის სახელმწიფო უნივერსიტეტში ბსუ-ს ბავშვის უფლებათა ცოდნის ცენტრის სამუშაო შეხვედრა გაიმართა, რომელიც მიზნად ისახავდა 2021-2022 სასწავლო წლის განმავლობაში განხორციელებული პროექტების წარდგენას. ღონისძიების ფარგლებში შედგა ბავშვის უფლებათა ცოდნის ცენტრის ტრენინგ-მოდულების, ცენტრისთვის შეძენილი სახელმძღვანელოს, ცენტრის საქმიანობის ამსახველი და თარგმნილი სტატიების, ბუკლეტის და ფოტონახატების გამოფენის ამსახველი მასალების, ვებგვერდის, ლოგოს და Brand Book-ის პრეზენტაცია.

ბათუმის შოთა რუსთაველის სახელმწიფო უნივერსიტეტი პირველ საერთაშორისო კონფერენციას „ადრეული განათლება და ზრუნვა“ მასპინძლობს. კონფერენციის მიზანია, ხელი შეუწყოს ადრეული განათლებისა და ზრუნვის სფეროში ხარისხის, ხელმისაწვდომობისა და ინკლუზიის შესახებ აკადემიურ დისკუსიას, ცოდნის გაზიარებას ადგილობრივი და საერთაშორისო პრაქტიკის გათვალისწინებით. ღონისძიება გახსნეს და მონაწილეებს მისასალმებელი სიტყვით მიმართეს აჭარის ა. რ. უმაღლესი საბჭოს თავმჯდომარემ დავით გაბაიძემ, გაეროს წარმომადგენელმა საქართველოში ღასან ხალილმა, პარლამენტის წევრებმა გიორგი ამილახვარმა და ელისო ბოლქვაძემ, ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და აჭარის ა.რ. განათლების, კულტურისა და სპორტის მინისტრმა მაია ხაჯიშვილმა.

ბავშვთა დაცვის დღესთან დაკავშირებით ბათუმის შოთა რუსთაველის სახელმწიფო უნივერსიტეტში, საქართველოში გაეროს ბავშვთა ფონდსა (UNICEF) და აჭარის განათლების, კულტურისა და სპორტის სამინისტროს შორის გაფორმებული მემორანდუმის ფარგლებში შერჩეულ საპილოტე ბაღებში განხორციელებული აქტივობების შედეგების შუალედური პრეზენტაცია გაიმართა. ღონისძიებაზე მომხსენებლებმა წარმოადგინეს პრეზენტაციები საბავშვო ბაღებში არსებული პრაქტიკის შესახებ, ასევე, მუნიციპალიტეტების გეგმები სკოლამდელი განათლების ხარისხის გაუმჯობესებასთან დაკავშირებით, ჩატარდა ვორქშოფები, გაიმართა ონლაინ ვებინარი.

საქართველოში იუნისეფის წარმომადგენელმა, ბსუ-ს საპატიო დოქტორმა ღასან ხალილმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „ბავშვის უფლებები: იმპერატივი საერთაშორისო დღის წესრიგში“. მომხსენებელმა სტუდენტებსა და პროფესორ-მასწავლებლებს ბავშვის უფლებებათა დაცვის ისტორია და თანამედროვე გამოწვევები გააცნო. ლე ქციის დასრულების შემდეგ, შეხვედრა კითხვა-პასუხის რეჟიმში წარიმართა და დოქტორმა ღასან ხალილმა აქტუალურ შეკითხვებს უპასუხა. ღონისძიება პირველი საერთაშორისო კონფერენციის - „ხარისხიანი ადრეული განათლება და ზრუნვა“ ფარგლებში გაიმართა.