ბათუმის შოთა რუსთაველის სახელმწიფო უნივერსიტეტში სკოლისა და უნივერსიტეტის თანამშრომლობის კლუბის „სკოლა-უნივერსიტეტი” ფარგლებში მეცხრე სამეცნიერო კონფერენცია გაიმართა. სესიაში სტუდენტებთან ერთად, ბათუმისა და სხვადასხვა რეგიონის საჯარო და კერძო სკოლების მოსწავლეებმა მიიღეს მონაწილეობა. ღონისძიება მიზნად ისახავდა უნივერსიტეტისა და სკოლის თანამშრომლობის ხელშეწყობას, მოსწავლეებსა და სტუდენტებში შემოქმედებითი, თანამშრომლობითი და კომუნიკაციური უნარ-ჩვევების განვითარებას, კრიტიკული აზროვნების ჩამოყალიბებასა და ნიჭიერი ახალგაზრდების გამოვლენას. კონფერენციის მუშაობა ექვსი სექციის მიმართულებით წარიმართა, სადაც 121 მონაწილის 81 მოხსენება იყო წარმოდგენილი.

ბსუ-ს ბავშვთა უფლებების ცენტრის ორგანიზებითა და გაეროს ბავშვთა ფონდის, UNICEF-ის მხარდაჭერით ჩატარდა ონლაინ ტრენინგი თემაზე: „ბავშვის უფლებები და უსაფრთხო სკოლა”. ტრენერმა, კლინიკურმა ფსიქოლოგმა მაია ცირამუამ ბსუ-ს სტდუენტებსა და აჭარის 8 სხვადასხვა სკოლის 20 მოსწავლეს უფლებებისა და უსაფრთხო სკოლის აქტუალური საკითხები გააცნო. ტრენინგის ფარგლებში გაიმართა დისკუსია ისეთ მნიშვნელოვან საკითხებზე, როგორიცაა: თანასწორობა და ბავშვთა უფლებები, უსაფრთხო სკოლა, რატომ ჩაგრავენ ბავშვები ერთმანეთს და ვინ შეიძლება აღმოჩნდეს მსხვერპლი, სკოლების უსაფრთხოებასთან დაკავშირებული გამოწვევები და მოგვარების გზები, ფსიქოლოგიური კეთილდღეობა და ბულინგის პრევენციის საუკეთესო გზა. ტრენინგის მონაწილეებს გადაეცათ სერტიფიკატები.

კულტურული მრავალფეროვნების დღეს ბათუმის შოთა რუსთაველის სახელმწიფო უნივერსიტეტში ონლაინ სამეცნიერო კონფერენციით „ბავშვის უფლებები და უსაფრთხო სკოლა“ აღინიშნა. ბსუ-ს ბავშვთა უფლებების ცენტრის ორგანიზებითა და გაეროს ბავშვთა ფონდის, UNICEF-ის მხარდაჭერით გამართულ კონფერენციაზე სტუდენტებმა და მოსწავლეებმა ბავშვის უფლებების დაცვის, უსაფრთხო სკოლისა და დისკრიმინაციის აქტუალური საკითხები განიხილეს. ღონისძიების მონაწილეებს მიესალმნენ ბსუ-ს რექტორის მოადგილე, პროფესორი თამარ სირაძე და ზუსტ მეცნიერებათა და განათლების ფაკულტეტის დეკანი, პროფესორი ლელა თურმანიძე.

ბათუმის შოთა რუსთაველის სახელმწიფო უნივერსიტეტში, ბავშვის უფლებების ცენტრში ტრენინგი ჩატარდა თემაზე: „როგორ შევცვალოთ ძალადობრივი გარემო სკოლაში“. ტრენერებმა, ასოცირებულმა პროფესორმა ნატო შეროზიამ და ასისტენტ პროფესორმა დალი დობორჯგინიძემ აჭარის შვიდი სკოლის (4 საჯარო და 3 კერძო სკოლა) 30 მოსწავლეს უსაფრთხო სკოლის აქტუალური საკითხები გააცნეს. ტრენინგის ფარგლებში, გაიმართა დისკუსია ბავშვთა მიმართ ძალადობის ფორმების შესახებ, ასევე დაისვა კითხვები ისეთ მნიშვნელოვან საკითხებზე, როგორიცაა: უსაფრთხო სკოლის პოლიტიკა საქართველოში; ძალადობა მოზარდებში-გამომწვევი მიზეზები, დაძლევის გზები; ბულინგი სკოლაში; ფსიქოლოგიური ძალადობა სკოლაში; ემოციური უსაფრთხოება; სკოლაში ძალადობის პრევენცია.

ბსუ-ში, „ბავშვის უფლებების ცენტრში“ ტრენერმა, ბიზნეს ადმინისტრირების დოქტორმა გიორგი ქათამაძემ ტრენინგი ჩაატარა თემაზე: „ბავშვთა შრომითი ექსპლუატაცია“. ტრენინგს ესწრებოდა აჭარის ა.რ. 12 სხვადასხვა სკოლის (8 საჯარო და 4 კერძო სკოლა) 21 მოსწავლე. გაიმართა დისკუსია ბავშვთა უფლებების დაცვის, ბავშვთა შრომითი ექსპლუატაციის პრევენციის ღონისძიებების შესახებ, ასევე ამ აქტივობებში სკოლისა და საზოგადოების როლზე. მოსწავლეებმა გამოთქვეს სურვილი, ჩატარდეს დებატები „ბავშვთა შრომითი ექსპლუატაციის“ თემაზე და ასევე დაესწრონ ტრენინგებს ბავშვთა შრომითი უფლებების უფრო სიღრმისეულად გასაცნობად. ტრენინგის ბოლოს ბავშვებმა მოამზადეს სიმბოლური დოკუმენტი „ბავშვების ხმა“, სადაც დააფიქსირეს მათი სურვილები და პოზიცია ბავშვთა უფლებებთან დაკავშირებით.