ახალი ამბები

საერთაშორისო ფესტივალში - „ნიღაბი 2014“ ბათუმის შოთა რუსთაველის სახელმწიფო უნივერსიტეტის სტუდენტურმა თეატრმა „დასმა“ ქალის საუკეთესო როლის შემსრულებლის ნომინაციაში გაიმარჯვა. ბათუმელი სტუდენტები მაყურებლის წინაშე რეჟისორ როინ დვალის მიერ დადგმული კომედიური ჟანრის სპექტაკლით - „ნაფტალინი“ წარსდგნენ. კომპეტენტური ჟიურის გადაწყვეტილებით, ქალის საუკეთესო როლის შემსრულებლად ჰუმანიტარულ მეცნიერებათა ფაკულტეტის ქართული ფილოლოგის სპეციალობის მეორე კურსის სტუდენტი ნინო გაბეჩავა დასახელდა. ფესტივალი „მოყვარულ სტუდენტურ თეატრთა ასოციაციის“ ორგანიზებით თბილისის სახელმწიფო სამედიცინო უნივერსიტეტის თეატრალურ დარბაზში გაიმართა და მასში საქართველოს უმაღლესი საგანმანათლებლო დაწესებულებების თეატრალურ დასებთან ერთად, სხვადასხვა ქვეყნის სტუდენტური თეატრებიც მონაწილეობდნენ. უნივერსიტეტი სტუდენტურ თეატრ „დასს“ ულოცავს გამარჯვებას და უსურვებს წარმატებებს.

აშშ-ს სამოქალაქო კვლევებისა და განვითარების ფონდის (GRDF-Global), შოთა რუსთაველის ეროვნული სამეცნიერო ფონდის და საქართველოს სამეცნიერო-ტექნოლოგიური განვითარების ფონდის (სსგფ) პროგრამის ,,დამოუკიდებელი ექსპერტიზა და მდგრადი მეცნიერება საქართველოსთვის“ ფარგლებში გამოცხადებული ,,კვლევითი გრანტების პროგრამის“ კონკურსში პროექტმა ,,მცენარეთა საკარანტინო ბაქტერიული პათოგენის Ralstonia solanacearum-ის ქართული შტამების სრული გენომის გაშიფვრა“ გაიმარჯვა. პროექტი აშშ-ის დამოუკიდებელი ექსპერტების, დონორი ორგანიზაციების (აშშ თავდაცვისა და საფრთხის შემცირების სააგენტო - US DTRA) წარმომადგენლების შეფასების საფუძველზე დაფინანსდა. ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მცენარეთა დაავადებების მონიტორინგის, დიაგნოსტიკისა და მოლეკულური ბიოლოგიის განყოფილების მკვლევრები კვლევას საბაზო ორგანიზაციის ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის წარმომადგენლებთან ერთად განახორციელებენ.

შოთა რუსთაველის ეროვნული სამეცნიერო ფონდის კონსულტანტმა და სამუშაო ჯგუფის ხელმძღვანელმა ზურაბ ბრაგაძემ ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს დოქტორანტურის საგანმანათლებლო პროგრამების დაფინანსების კონკურსი წარუდგინა. საგრანტო კონკურსის მიზანია დოქტორანტურის საგანმანათლებლო პროგრამების განხორციელების ხელშეწყობისათვის გათვალისწინებული ხარჯების დაფინანსების გზით სტიმული მისცეს სახელმწიფოში ინტელექტუალური პოტენციალის განვითარებასა და მაღალი კვალიფიკაციის სამეცნიერო პერსონალის მომზადებას, უნივერსიტეტში არსებული ინტელექტუალური პოტენციალის მიზნობრივ გამოყენებას და სამეცნიერო კვლევისათვის სათანადო პირობების შექმნას. პროექტი ასევე ითვალისწინებს დოქტორანტებისა და უნივერსიტეტების უცხოეთში არსებულ უმაღლეს საგანმანათლებლო და სამეცნიერო-კვლევით დაწესებულებებთან თანამშრომლობასა და ამ გზით საქართველოში უმაღლესი განათლების ხარისხის ამაღლებას.

ბათუმის შოთა რუსთაველის სახელმწიფო უნივერსიტეტის სტუდენტური თეატრის „დასის“ სპექტაკლ „ნაფტალინის“ პრემიერა შედგა. კომიკური ჟანრის სპექტაკლი ლაშა ბუღაძის პიესის მიხედვით რეჟისორმა როინ დვალმა დადგა და მასში სხვადასხვა სპეციალობის სტუდენტები მონაწილეობდნენ. „ნაფტალინი“ უმაღლესი საგანმანათლებლო დაწესებულების სტუდენტური თეატრის რიგით მეხუთე ნაშრომია და მასზე ახალგაზრდა მსახიობები ორი თვის განმავლობაში მუშაობდნენ. პრემიერის შემდეგ, „დასის“ წევრები თბილისის საერთაშორისო ფესტივალში - „ნიღაბი 2014“ მიიღებენ მონაწილეობას. ფესტივალი „მოყვარულ სტუდენტურ თეატრთა ასოციაციის“ ორგანიზებით გაიმართება.

ღვაწლმოსილი მეცნიერისა და პედაგოგის, ბათუმის შოთა რუსთაველის სახელმწიფო უნივერსიტეტის ემერიტუს პროფესორის რომან ზოსიძის 80 წლისადმი მიძღვნილი საიუბილეო სხდომა გაიმართა შოთა რუსთაველის დარბაზში. მკვლევარს იუბილე მიულოცეს, წარმატებები უსურვეს და მის ღვაწლზე ისაუბრეს უნივერსიტეტის რექტორმა, პროფესორმა ალიოშა ბაკურიძემ, ემერიტუს პროფესორებმა: რევაზ ზოსიძემ, ბიჭიკო დიასამიძემ, სერგო დუმბაძემ, მწერალმა რამაზ სურმანიძემ, კოლეგებმა და მეგობრებმა. მეცნიერის კვლევის ინტერესებში შედის ფილოსოფია, ფილოსოფიის ისტორია, რელიგიათმცოდნეობა. ემერიტუს პროფესორი რომან ზოსიძე ნაყოფიერი სამეცნიერო და პედაგოგიური მოღვაწეობისათვის დაჯილდოებულია ღირსების ორდენითა და სიგელებით.