საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტისა და მტირალას ეროვნული პარკის ორგანიზებით მტირალას ეროვნული პარკში ვორქშოპი ჩატარდა თემაზე: „საქართველოს დაცული ტერიტორიების მდგომარეობა და პრობლემები“. ეკოლოგიის II კურსის მაგისტრანტებმა მარიამ ცეცხლაძემ და ქეთევან მემარნემ მოხსენებები წარადგინეს საქართველოს დაცულ ტერიტორიებზე. მტირალას ეროვნული პარკის შესახებ მონაწილეებს ინფორმაცია მიაწოდეს ბუნებრივი რესურსების უფროსმა სპეციალისტმა თორნიკე ტაბატაძემ და ვიზიტორთა მომსახურების უფროსმა სპეციალისტმა თეონა გვიანიძემ. ვორქშოპში საბუნებისმეტყველო მეცნიერებათა და ჯანდაცვის ფაკულტეტის ეკოლოგიის სპეციალობის I და III კურსის სტუდენტებთან ერთად, მონაწილეობდნენ ჩაქვის №1 და სოფელ გორგაძეების საჯარო სკოლის მოსწავლეები. ღონისძიების დასასრულს, ასოცირებულმა პროფესორმა ნინო ლომთათიძემ, ასისტენტ პროფესორმა გუგული დუმბაძემ და მტირალას ეროვნული პარკის წარმომადგენლებმა ახალგაზრდების შეკითხვებს უპასუხეს.

საჯარო სამართლის იურიდიული პირის - ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის საბჭო ბაკალავრიატისა და მაგისტრატურის საგანმანათლებლო პროგრამების სტუდენტთათვის ავთანდილ ბარათაშვილის სახელობითი სტიპენდიის მოსაპოვებლად აცხადებს კონკურსს

საჯარო სამართლის იურიდიული პირის - ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის საბჭო ბაკალავრიატისა და მაგისტრატურის საგანმანათლებლო პროგრამების სტუდენტთათვის სახელობითი სტიპენდიების მოსაპოვებლად აცხადებს კონკურსს

ბათუმის შოთა რუსთაველის სახელმწიფო უნივერსიტეტში გეოლოგია-მინერალოგიის მეცნიერებათა დოქტორის, საქართველოს ეკოლოგიის აკადემიის აკადემიკოს ალექსანდრე თვალჭრელიძის საჯარო ლექციათა ციკლი დაიწყო თემაზე: „ნედლეულის ეკონომიკა (ნედლეულის როლი მსოფლიო ეკონომიკაში)“. მომხსენებელი სტუდენტებსა და პროფესორ-მასწავლებლებს თანამედროვე ეკონომიკის აქტუალურ საკითხებს გააცნობს. მეცნიერი სამი დღის განმავლობაში ისაუბრებს ნავთობისა და გაზის ეკონომიკასა და გეოპოლიტიკაზე, ოქროს ეკონომიკასა და გეოპოლიტიკაზე; ალმასის ეკონომიკასა და გეოპოლიტიკაზე. აკადემიკოსი ალექსანდრე თვალჭრელიძე ყურადღებას გაამახვილებს აგრეთვე ისეთ მნიშვნელოვან თემებზე, როგორიცაა: ნედლეულის როლი გლობალიზებულ სამყაროში, საქართველო და აჭარის ავტონომიური რესპუბლიკა მსოფლიო სანედლეულო ბაზრებზე: გამოწვევები და პერსპექტივები. საჯარო ლექციათა ციკლი აჭარის არ.განათლების, კულტურისა და სპორტის სამინისტროს ხელშეწყობით იმართება.

დღეს, ბათუმის შოთა რუსთაველის სახელმწიფო უნივერსიტეტში პორტოს (პორტუგალია) უნივერსიტეტის ქიმია-ბიოლოგიის მეცნიერებათა დოქტორის, მკვლევარის, პროფესორ ელიზიუ მანუელ კოშტას საჯარო ლექციათა ციკლი დაიწყო. საჯარო ლექცია თირკმლის ქრონიკულ დაავადებათა გავრცელებას, გამომწვევი მიზეზების დადგენას, დიაგნოსტიკასა და მკურნალობის თანამედროვე მეთოდებს მიეძღვნა. აგრეთვე, საუბარი შეეხო თირკმლის ტერმინალურ სტადიაზე მყოფი პაციენტებისათვის ცხოვრების ხარისხის გაუმჯობესებას.