ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის ასისტენტ-პროფესორმა ნარგიზ ფალავანდიშვილმა, ბსუ-ს მესამე მისიის ფარგლებში, ფერიის საჯარო სკოლაში ჩაატარა საჯარო ლექცია თემაზე: „აღრიცხვა როგორც წარმატების გასაღები ტურიზმის ბიზნესში“.

ფსიქოლოგიის დეპარტამენტის ასოცირებულმა პროფესორმა რუსუდან კეჭაყმაძემ ბათუმის უმაღლეს საზღვაო საინჟინრო სასწავლებელში „ანრი“ ჩაატარა შეხვედრა თემაზე „სტრესი და მისი გავლენა ჯანმრთელობაზე“. ღონისძიება ინტერაქციულ ფორმატში წარიმართა, სტუდენტები აქტიურად ჩაერთნენ დისკუსიაში, დასვეს შეკითხვები და მიიღეს ამომწურავი პასუხები. შეხვედრის დასასრულს, მონაწილეებმა შეასრულეს პრაქტიკული სავარჯიშო, რომელიც სტრესის მართვის უნარების გაუმჯობესებას ისახავდა მიზნად.

ბათუმის შოთა რუსთაველის სახელმწიფო უნივერსიტეტმა ხელვაჩაურის მუნიციპალიტეტის სხვადასხვა საჯარო სკოლის მოსწავლეებს უმასპინძლა. აბიტურიენტებს ბსუ-ს რექტორის მოადგილე თამარ სირაძე შეხვდა, საგანმანათლებლო პროგრამები, სტიპენდიები, სოციალური პროექტები, გაცვლითი პროგრამები გააცნო და დეტალური ინფორმაცია მიაწოდა საუნივერსიტეტო ცხოვრების შესახებ.

1 მაისს, ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის ასისტენტ პროფესორმა თამარ ბერიძემ, მესამე მისიის ფარგლებში, ქედის მუნიციპალიტეტის სოფელ მერისის ფრიდონ თურმანიძის სახელობის საჯარო სკოლაში ჩაატარა საჯარო ლექცია თემაზე: „სოციალური მედია და ტურიზმი“. ღონისძიების მიზანს წარმოადგენდა ახალგაზრდებისთვის სოციალური მედიის მნიშვნელობის გაცნობა ტურიზმის განვითარების კონტექსტში. ლექცია ინტერაქციულ რეჟიმში წარიმართა, რაც მოსწავლეებისთვის საკითხების უკეთ გააზრებისა და აქტიური ჩართულობის შესაძლებლობას იძლეოდა.

ბსუ-ს ზუსტ მეცნიერებათა და განათლების ფაკულტეტის მათემატიკის დეპარტამენტის პროფესორ-მასწავლებლები მათემატიკის გაძლიერებული სწავლების ბათუმის №6 საჯარო სკოლის მე-11 კლასის მოსწავლეებს შეხვდნენ. მათემატიკის დეპარტამენტის ხელმძღვანელმა, პროფესორმა დალი მახარაძემ, პროფესორმა ლელა თურმანიძემ და პროფესორმა ონისე სურმანიძემ შეხვედრაზე ისაუბრეს მათემატიკის როლზე თანამედროვე ტექნოლოგიების განვითარების ეპოქაში, განსაკუთრებით კი, მის მნიშვნელობაზე მომიჯნავე დარგებისთვის.