ჰუმანიტარულ მეცნიერებათა ფაკულტეტის პროფესორ-მასწავლებლებისა და სტუდენტებისათვის ქართულ-ამერიკული უნივერსიტეტის პროფესორმა, რიტორიკის სკოლის დირექტორმა ცირა ბარბაქაძემ ტრენინგი ჩაატარა თემაზე: „სემიოტიკა-მეცნიერება, მეთოდოლოგია, მსოფლხედვა“. პროფესორმა ცირა ბარბაქაძემ ფაკულტეტის აკადემიურ პერსონალს, დოქტორანტებსა და მაგისტრანტებს ისეთი აქტუალური საკითხები გააცნო, როგორიცაა: სემიოტიკა, როგორც მეცნიერება, მეთოდოლოგია, მსოფლხედვა; პოსტმოდერნიზმი და სემიოტიკა; სემიოტიკა, როგორც პოსტმოდერნული სამყაროს სათვალე; სემიოტიკა და სინერგეტიკა; ნიშნები და ნიშანთა სისტემები; ნიშნის ბუნება; ორგვარი რეფერენტი - კონკრეტული და აბსტრაქტული; უმბერტო ეკოს „ექვსი გასეირნება ლიტერატურულ ტყეში“ - როგორც სწავლების მეთოდი; ვიგოდსკისა და პიაჟეს ცოდნის მიღების ორი გზა; გონება და ემოცია, ნარცისი თუ გოლდმუნდი? არაცნობიერი და იზომორფიზმი გენეტიკურ კოდსა და სემიოტიკურ სისტემებს შორის; ენა და ადამიანი და ადამიანი და ენა - მიმართებები შიგნით-გარეთ და პირიქით; პერფორმანსი, როგორც სემიოტიკური ფენომენი.

თეორიული საკითხების პარალელურად მსმენელებმა შეასრულეს პრაქტიკული სავარჯიშოები:

• მხატვრული ტექსტის სემიოტიკური ინტერპრეტაციები;
• მხატვრული ტექსტის მეტაფორები - აუდიალური, ვიზუალური, კინესთეტიკური;
• ერთი ტექსტი - სამ სემიოტიკურ ენაზე;
• როგორ გავისეირნოთ ლიტერატურულ ტყეში?

ტრენინგის მონაწილეებმა წარმოადგინეს ინდივიდუალური პრეზენტაციები.