ბათუმის შოთა რუსთაველის სახელმწიფო უნივერსიტეტი 2020 წლიდან ჩართულია აშშ-ს  საელჩოს მედიაგანთლების პროგრამაში MEDIA EDUCTION PROGRAMI(MEP), რომელიც მიმართულია საქართველოში ჟურნალისტიკის სწავლების გაძლიერებისაკენ. პროგრამის ფარგლებში შესაძლებელი გახდა ბათუმის უნივერსიტეტში ჟურნალისტიკის მიმართულების ჩამოყალიბება და სამაგისტრო და საბაკალავრო პროგრამების შემუშავება. ამავე პროგრამის ფარგლებში აშშ-ის უნივერსიტეტების მედიასკოლებში სამუშაო ვიზიტით იმყოფებოდნენ „ციფრული მედიისა და ინოვაციების“ სამაგისტრო პროგრამის განმახორციელებლები, პროფესორი ინგა შამილიშვილი, დოქტორი ირმა გაბინაშვილი, ხოლო მიმდინარე წლის 2-18 აპრილს ჟურნალისტთა  საერთაშორისო ცენტრის INTERNATIONAL CENTER FOR JOURNALISTS (ICFJ) მიწვევით, სასწავლო ვიზიტით იმყოფებოდა ასისტენტ პროფესორი გვანცა საბაშვილი.

ვიზიტი განხორციელდა ვაშინგტონის ამერიკის უნივერსიტეტის ჟურნალისტიკისა და  ჰემტონის უნივერსიტეტის სკრიპს ჰოვარდის სახელობის ჟურნალისტიკისა და მასკომუნიკაციის სკოლებში და ფენიქსში, არიზონას სახელმწიფო უნივერსიტეტის უოლტერ კრონკაიტის სახელობის ჟურნალისტიკისა და მასკომუნიკაციის სკოლაში. ვიზიტის ფარგლებში განიხილეს მედიაგანათლების სწავლების თანამედროვე თეორიული და პრაქტიკული მიმართულებები, მედია-ეთიკისა და დეზინფორმაციის კვლევის თანამედროვე მიდგომები და  ციფრული მედიის  ინოვაციურ გამოწვევები.