2016 წლის 4-6 ივნისს ურეკში, სასტუმრო „კოლხიდაში“ „ელსა საქართველოს“ რიგით XVI ეროვნული საერთო კრება (NCM) გაიმართა. კრების მუშაობაში მონაწილეობას ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის 13 სტუდენტი ღებულობდა, რომლებიც ამავე დროს „ელსა ბათუმის“ წევრები არიან. კრების გადაწყვეტილებით ელსა ბათუმის ძველი გამგეობა ახალი წევრებით შეიცვალა. ახალი გამგეობის წევრები ძირითადად იურიდიული ფაკულტეტის მე-2 კურსის სტუდენტებით დაკომპლექტდა.

იურიდიულ ფაკულტეტზე სტუდენტთა სამეცნიერო კონფერენცია გაიმართა. კონფერენციაზე იურიდიული ფაკულტეტის მეორე, მესამე, მეოთხე კურსისა და მაგისტრატურის სტუდენტებმა ცხრა მოხსენება წარმოადგინეს, მათგან ერთი მოხსენება რეფერატულ ნაშრომთა კონკურსში გამარჯვებულმა პირველკურსელმა წარმოადგინა.
კომისიის გადაწყვეტილებით პირველი ადგილი პირველკურსელ ნინო ბასილაძეს ერგო თემისთვის „მდედრობითი, მამრობითი და მესამე სქესი (საკმარისია სქესის სამართლებრივი რეგულირებისას მხოლოდ გარეგნული ნიშნებით ხელმძღვანელობა?!)“ (ხელმძღვანელი პროფესორი მურმან გორგოშაძე).
მეორე ადგილზე გავიდა მესამე კურსის სტუდენტი შორენა ქადიძე თემით „საქართველოს სახელმწიფო ენის სამართლებრივი სტატუსის შედარებითი ანალიზი ბალტიისპირეთის (ლიტვა, ლატვია, ესტონეთი) ქვეყნების, აზერბაიჯანის და სომხეთის სახელმწიფო ენათა სამართლებრივ სტატუსთან“ (ხელმძღვანელი პროფესორი მურმან გორგოშაძე). მესამე ადგილი სოფო რიჟვაძემ მოიპოვა თემით „ქალთა უფლებები საქართველოში უძველესი დროიდან დღემდე“ (ხელმძღვანელი მოწვეული სპეციალისტი დავით სამნიძე).

იურიდიული ფაკულტეტის სტუდენტები ქუთაისში, ჰუმანიტარულ სამართალში გამართული ეროვნული შეჯიბრის ფინალისტები გახდნენ. შეჯიბრი საერთაშორისო ჰუმანიტარულ სამართალს ეძღვნებოდა და ის რამდენიმე ეტაპისაგან შედგებოდა. პირველი ეტაპი კაზუსის საერთაშორისო სამართლით კვალიფიცირებას მოიცავდა, რომელიც წარმატებით გაიარა ბსუ-ს სტუდენტებმა: თინათინ კარანაძემ, ლინდა დიასამიძემ და თამთა მაკარაძემ. პირველი ეტაპის დასრულების შემდეგ ონლაინ ლექციები და ტესტირება ჩატარდა, სადაც ბათუმის გუნდთან ერთად მონაწილეობას ქუთაისის აკაკი წერეთლის უნივერსიტეტის ორი გუნდი ღებულობდა. ტესტირების შედეგებით ბსუ-ს გუნდი ფინალურ ეტაპზე გადავიდა.

ბსუ-ს იურიდიული ფაკულტეტის პროფესორი მურმან გორგოშაძე ქვემო მახოს საჯარო სკოლაში მიიწვიეს და როგორც ამ სკოლის კურსდამთავრებული მოსწავლეებს და მასწავლებლებს შეხვდა. შეხვედრა პროფესიის არჩევის თავისებურებებს მიეძღვნა. სტუმარმა აბიტურიენტებს საკუთარი გამოცდილება გაუზიარა და საინტერესო რჩევები მისცა. შეხვედრის დასასრულს, მოსწავლეებმა საქართველოს დამოუკიდებლობის დღისადმი მიძღვნილი კონცერტი გამართეს. მურმან გორგოშაძემ ღონისძიებაში მონაწილე ბავშვებს სამახსოვრო საჩუქრები გადასცა, ხოლო სკოლას „კურსდამთავრებულთა თასი” უსახსოვრა, რომელიც როგორც გარდამავალი თასი სპორტის სხვადასხვა სახეობაში გათამაშდება.

იურიდიული ფაკულტეტის პირველკურსელები იუსტიციის სახლს სტუმრობდნენ. გაცნობითი ხასიათის ვიზიტის მიზანი სტუდენტებისათვის იუსტიციის სახლის მუშაობის სპეციფიკის და სიახლეების გაცნობა იყო. იუსტიციის სახლის მენეჯერმა თამარ სამსონიამ მომავალ იურისტებს „ყველაფერი ერთ სივრცეში“ კონცეფცია და მუშაობის უპირატესობა წარუდგინა, რომელიც ბათუმის იუსტიციის სახლში 2012 წლიდან დაინერგა. ამავე ვიზიტის ფარგლებში, სტუდენტები აჭარა-გურიის სააღსრულებო ბიუროს უფროსს მირიან ხარაბაძეს შეხვდნენ. მირიან ხაბაძემ სტუდენტებს პრაქტიკაში აღსრულების პროცესთან დაკავშირებულ პრობლემებზე ლექცია წაუკითხა და სააღსრულებო ბიუროს მუშაობის სპეციფიკაზე ესაუბრა.