ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის ასოცირებულმა პროფესორმა გივი აბაშიძემ მონაწილეობა მიიღო მეოთხე საერთაშორისო ეკონომიკურ კონფერენციაში - „IEC 2016 - ეროვნული ეკონომიკის განვითარების მოდელები: გუშინ, დღეს, ხვალ“. მკვლევარმა `ეროვნული ეკონომიკის განვითარების სამართლებრივი, პოლიტიკური და ისტორიულ-ფილოსოფიური ასპექტების დარგობრივი სექციის სხდომაზე წარადგინა მოხსენება თემაზე: "საპროცესო შეთანხმების უარყოფითი ასპექტები" და გადაეცა შესაბამისი სერტიფიკატი. საერთაშორისო სამეცნიერო კონფერენცია საქართველოს ტექნიკურ უნივერსიტეტსა და აკაკი წერეთლის სახელმწიფო უნივერსიტეტში ჩატარდა და მის მუშაობაში მონაწილეობდნენ ცნობილი მეცნიერები ლიტვიდან, კვიპროსიდან, პოლონეთიდან, ესტონეთიდან, თურქეთიდან, ლატვიიდან, უკრაინიდა და ყაზახეთიდან.

იურიდიული ფაკულტეტის სტუდენტებს მიგრაციის საერთაშორისო ორგანიზაციი-ს (IOM) ბათუმის ოფისის წარმომადგენლები შეხვდნენ. მომავალი სამართალმცოდნეები საინფორმაციო ხასიათის შეხვედრაზე ვიზალიბერალიზაციის, ლეგალური მიგრაციის, საზღვარგარეთ სწავლის, ევროკავშირის ქვეყნებში თავშესაფრისა და ტრეფიკინგის აქტუალურ საკითხებს გაეცნენ. ასევე მოისმინეს ინფორმაცია ნატოსა და ევროკავშირის საინფორმაციო ცენტრის საქმიანობის პრიორიტეტებსა და IOM-ის მიერ გამოცხადებული ესეების კონკურსზე. ღონისძიების დასასრულს, გაიმართა დისკუსია სტუდენტებისათვის საინტერესო თემებზე. შეხვედრა ნატოსა და ევროკავშირის შესახებ საინფორმაციო ცენტრის აჭარის ბიუროს მხარდაჭერით გაიმართა.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის მოწვეული მასწავლებელი ნიკოლოზ მეგრელიშვილი გერმანიაში პოტსდამის უნივერსიტეტს ეწვია და იურიდიული ფაკულტეტის ხელმძღვანელს როზვიტა შვერდტფეგერსა და პროფესორ უვე ჰელმანს შეხვდა. შეხვედრაზე მხარეებმა უნივერსიტეტების ისტორიასა და საგანმანათლებლო პროგრამებზე ისაუბრეს და სამომავლო თანამშრომლობის პერსპექტივები განიხილეს. სამომავლოდ, ბსუ-ში ტერიტორიული მოწყობის საკითხებზე საერთაშორისო კონფერენციის ჩატარება დაიგეგმა.

ბათუმის შოთა რუსთაველის სახელმწიფო უნივერსიტეტში საერთაშორისო საზაფხულო სკოლა „ევროპეიზაციის წარმოჩენა სამხრეთ კავკასიისა და შავი ზღვის რეგიონში ეკონომიკურ, იურიდიულ და სოციალურ ჭრილში“ გაიხსნა. საზაფხულო სკოლა ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის პირველმა მოადგილემ არჩილ ყარაულაშვილმა, ბსუ-ს რექტორის მოადგილემ ინგა შამილიშვილმა, რელიგიის საკითხთა სახელმწიფო სააგენტოს თავმჯდომარემ ზაზა ვაშაყმაძემ და ბათუმის მერმა გიორგი ერმაკოვმა გახსნეს.

ბათუმის შოთა რუსთაველის სახელმწიფო უნივერსიტეტის მკლავჭიდის ნაკრებმა ‘’უნივერსიადა 2016’’-ის ფარგლებში გამართულ ჩემპიონატზე 3 საპრიზო ადგილი მოიპოვა. ორი ოქროს მედალი 75 წონით კატეგორიაში (მარცხენა , მარჯვენა კატეგორია) ბსუ-ს იურიდიული ფაკულტეტის სამართალმცოდნეობის სპეცილობის სტუდენტმა მახმუდ ჭელიძემ მოიპოვა, ხოლო 80 კგ. წონით კატეგორიაში მესამე საპრიზო ადგილი ბსუ-ს იურიდიული ფაკულტეტის სამართალმცოდნეობის სპეცილობის სტუდენტმა ზაზა ანანიძემ.