2022 წლის 12 აპრილს, 16:00 საათზე, ონლაინ ფორმატში, ბათუმის შოთა რუსთაველის სახელმწიფო უნივერსიტეტის სტუდენტებისთვის გაიმართება „ერაზმუს+“-ის გაცვლითი პროგრამის პრეზენტაცია. ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსის მოადგილე, „ერაზმუს+“-ის გაცვლითი პროგრამების კოორდინატორი ნანა ყურშუბაძე ZOOM-ის პლატფორმის გამოყენებით სტუდენტებს საერთაშორისო გაცვლით პროგრამაში მონაწილეობის პირობებს გააცნობს.

ბათუმის შოთა რუსთაველის სახელმწიფო უნივერსიტეტი გთავაზობთ მონაწილეობის მიღებას ევროკომისიის მიერ დაფინანსებულ ერაზმუს+-ის გაცვლით პროგრამაში 2022 - 2023 სასწავლო წლისთვის ევროპულ უნივერსიტეტებში (იხილეთ დანართი 1 „პარტნიორი უნივერსიტეტები და საგანმანათლებლო პროგრამები“). გაცვლით პროგრამაში მონაწილეობა შეუძლიათ სამივე საფეხურის საგანმანათლებლო პროგრამების სტუდენტებს.

გამოცხადდა კონკურსი ბათუმის შოთა რუსთაველის სახელმწიფო უნივერსიტეტის სამართალმცოდნეობის მიმართულების აკადემიური პერსონალისთვის 2022-2023 სასწავლო წლის შემოდგომის სემესტრისთვის ბიალისტოკის უნივერსიტეტში (პოლონეთი). მობილობის ხანგრძლივობა შეადგენს 5 სამუშაო დღეს.

გამოცხადდა კონკურსი ბათუმის შოთა რუსთაველის სახელმწიფო უნივერსიტეტის აკადემიური პერსონალისთვის 2021-2022 სასწავლო წლის გაზაფხულის სემესტრისთვის შჩეცინის უნივერსიტეტში (პოლონეთი). მობილობის ხანგრძლივობა შეადგენს 5 სამუშაო დღეს. მობილობის განხორციელების ვადა - 2022 წლის 30 ივნისი.

ესტონეთის განათლებისა და მეცნიერების სამინისტროსთან არსებული განათლების და ახალგაზრდობის საკითხთა ბორდი (HARNO) 2022-2023 სასწავლო წლისათვის აცხადებს კონკურსს ესტონეთის მთავრობის მიერ დაწესებული სტიპენდიების მოსაპოვებლად. სასტიპენდიო პროგრამები გათვალისწინებულია საერთაშორისო სტუდენტების, მკვლევარებისა და აკადემიური პერსონალისათვის. განაცხადების მიღება იწარმოებს მიმდინარე წლის 1 აპრილიდან 1 მაისამდე.

სლოვაკეთის რესპუბლიკა, ოფიციალური განვითარების დახმარების ფარგლებში, ქართველ სტუდენტებს სთავაზობს 2 სამთავრობო სტიპენდიას 2022-2023 სასწავლო წლისთვის. სტიპენდიები განკუთვნილია ბაკალავრიატისა და მაგისტრატურის სტუდენტებისათვის. მსურველებს აპლიკაციის ფორმების შევსება შეუძლიათ ონლაინ მისამართზე: https://www.vladnestipendia.sk/en/ მიმდინარე წლის 25 მარტიდან 30 მაისის ჩათვლით.

ლიეტუვის განათლების, მეცნიერების და სპორტის სამინისტროსთან არსებული გაცვლითი პროგრამების მხარდაჭერის ფონდის მიერ გამოცხადდა ლიეტუვის უმაღლეს საგანმანათლებლო დაწესებულებებში 2022 წლის სასტიპენდიო პროგრამები როგორც სამაგისტრო პროგრამებზე, ასევე მოკლევადიან პროგრამებზე. სამაგისტრო პროგრამები და ინტეგრირებული კვლევები განსაზღვრულია სწავლის ხანგრძლივობის 2 წლამდე ვადით. სტუდენტები მიიღებენ ყოველთვიურ სტიპენდიას 420 ევროს ოდენობით და გრანტს, რომელიც უზრუნველყოფს სწავლის გადასახადის სრულად დაფარვას.

CIFE-ს (ევროპული განათლების საერთაშორისო ცენტრი) ორგანიზებით ტარდება საზაფხულო კურსები საბერძნეთში, საქართველოში, რუმინეთში და ჩეხეთის რესპუბლიკაში. პროგრამის სამუშაო ენებია ფრანგული და ინგლისური ენა. პროგრამები მოიცავს ლექციებს, სემინარებს, კონფერენციებს და ვიზიტებს სხვადასხვა ინსტიტუციაში, რაც ხელს უწყობს პოლიტიკური და კულტურული კლიმატის და ცხოვრების წესის უკეთ გააზრებას შესაბამის მასპინძელ ქვეყანაში. თითოეული პროგრამის ბოლოს მონაწილეებს შეუძლიათ, მიიღონ კრედიტები (ECTS).