ბოლო წლები დაინტერესებული ვარ ჩემი აზრით ერთერთი ყველაზე აქტუალური პრობლემით - თანამედროვე ადამიანის ცნობიერების რადიკალიზაციით. ეს პრობლემა ინტერდისციპლინარულ ხასიათს ატარებს და რამდენიმე მიმართულებით შეიძლება იქნას შესწავლილი - პოლიტიკური ფილოსოფია, სოციალური ფილოსოფია, ცნობიერების ფილოსოფია, ფსიქოლოგია. ამ თემაზე ვისაუბრე საერთაშორისო და ადგილობრივ კონფერენციებზე და მიუძღვენი ორი სტატია - ერთი, ქართულ ენაზე, იბეჭდება; მეორე, ინგლისურ ენაზე (ფსიქოლოგიის დეპარტამენტის ეგიდით), გადის რეცენზირებას.

სახელმძღვანელო - მეცნიერების ფილოსოფია - წარმოადგენს მეცნიერების ფილოსოფიის პრობლემების შესახებ არსებული სამეცნიერო ლიტერატურის გადამუშავებული და შეჯერებული სალექციო კურსის ძირითად ნაწილს, რომელსაც მისი ავტორ-შემდგენელი ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ფილოსოფიის მიმართულებაზე კითხულობს.

მოლეკულურმა ბიოლოგიამ ფართოდ გააღო ახალი გზით ემბრიოლოგიის სწავლების კარი და გააძლიერა ჩვენი გაგება ნორმალური და არანორმალური განვითარების შესახებ. ადამიანის გენომის სეკვენირებამ, გენის რეგულაციების შესწავლამ თანამედროვე ტექნოლოგიებით ემბრიოლოგია განვითარების ახალ დონეზე აიყვანა. ამგვარად, ანატომიურიდან დაწყებული ბიოქიმიურითა და მოლეკულური დონით დამთავრებული ემბრიოლოგია განიცდის პროგრესირებას. სემინარში განხილულია ემბრიოგენეზის პროცესში მიმდინარე ზოგადი კანონზომიერებები გენეტიკის თვალთახედვით. ადამიანის სხეული აგებულია დაახლოებით 200 სხვადასხვა ტიპის უჯრედისაგან, მაშინ როცა ადამიანის გენომი ყველა ტიპის უჯრედში ერთიდაიგივეა, რაც ნიშნავს იმას, რომ თითოეულ ინდივიდში ყველა უჯრედს თავისი სპეციფიკური აგებულებისა და ფუნქციის მიუხედავად გააჩნია დნმ–ისა და გენების ზუსტად მსგავსი თანმიმდევრობები. განსხვავებული უჯრედული ტიპები წარმოიშობა ერთეული წინამორბედი უჯრედებისაგან პროლიფერაციის ხარჯზე და საბოლოოდ დიფერენცირდება ისეთ უჯრედად, რომელსაც ახასიათებს უნიკალური სტრუქტურა, ფუნქცია და ქიმიური შემადგენლობა. უჯრედში სპეციფიკური ცილის სინთეზიდან დაწყებული უჯრედული დაყოფის სპეციფიკური ტიპისა და წინამორბედი უჯრედის მიკროგარემოს გათვალისწინებით წარმოიქმნება უჯრედული თაობები. აღნიშნული უჯრედულ მოდგმას შეუძლია როგორც ორგანიზმის შენარჩუნება, ასევე ორგანიზმში სპეციფიკური ფუნქციის შესრულება. სემინარის ფარგლებში დეტალურადაა ახსნილი ემბრიოგენეზის პროცესში მიმდინარე გენების ექსპრესიის თავისებურებანი. ასევე ხაზგასმითაა საუბარი ადამიანის ემბრიოგენეზის დროს ზრდის ფაქტორების უმნიშვნელოვანეს როლზე.

სიმსივნის საწინააღმდეგო იმუნიტეტი საკმაოდ ეფექტურად ფუნქციონირებს, მაგრამ, მიუხედავად ამისა, მაინც არის შემთხვევები, როცა სიმსივნე თავს იძვრენს იმუნური ზედამხედველობისაგან და იგებს ხელჩართულ ბრძოლას იმუნიტეტთან და დაავადება, ამ შემთხვევაში, გარდაუვალია. სემინარის ძირითადი თემა ეძღვნება ანტისიმსივნურ იმუნიტეტს, სიმსივნის წინააღმდეგ არსებულ თავდაცვით მექანიზმებს და სიმსივნის მიერ იმუნური პასუხისაგან თავის დაღწევის გზებს. ასევე, დღეისათვის არსებულ ყველა იმ იმუნურ მეთოდს (კლინიკაში გამოყენებად თუ ექსპერიმენტულ), რაც გამოიყენება სიმსივნის სამკურნალოდ.

ბავშვთა დაცვის სფეროში ერთ-ერთი მთავარი პრობლემა ბავშვთა მიმართ ძალადობაა. ძალადობა გვხვდება ყველგან, ის არ არის მხოლოდ განვითარებადი ქვეყნების პრობლემა.
კვლევებით გამოვლინდა, რომ ძალადობას სერიოზული შედეგები შეიძლება მოყვეს მაშინვე და ასევე, ხანგრძლივი პერიოდის შემდეგ (შორეული შედეგები). სწორედ ამიტომ გადავწყვიტეთ ჩაგვეტარებინა კვლევა იმის დასადგენად, თუ რა პრევენციულ საშუალებებს იყენებენ და რა სტრატეგიების გამოყენება იქნებოდა მიზანშეწონილი ძალადობის შემთხვევაში 9-10 წლის ასაკის მოსწავლეებისთვის, მშობლებისთვის, მასწავ¬ლებ¬ლებისთვის და სკოლის ადმინისტრაციისთვის. კვლევა ჩატარდა ევროკავშირის ფინანსური მხარდაჭერით, საქართვე¬ლოს საზოგადოებრივი ჯანდაცვის ფონდთან თანამშრომ¬ლო¬ბით, პროექტის „უსაფრთხო სკოლა, უსაფრთხო ბავშვობა“ ფარგლებში.