ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის სტუდენტებს საქართველოს ახალგაზრდა იურისტთა ასოციაციის თავმჯდომარე სულხან სალაძე შეხვდა. არასამთავრობო ორგანიზაციის ხელმძღვანელმა შეხვედრაზე სასამართლო სისტემის წინაშე არსებული გამოწვევები, ქვეყანაში არსებული მედია გარემო და 2020 წლის საპარლამენტო არჩევნებთან დაკავშირებული საკანონმდებლო სიახლეები განიხილა. შეხვედრის დასასრულს დისკუსია გაიმართა და სულხან სალაძემ სტუდენტების შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტში სამართლის სკოლა გაიმართა თემაზე: „საზღვაო სამართალის აქტუალური საკითხები“. პროფესორ-მასწავლებლებმა და დარგის სპეციალისტებმა სტუდენტებს ორი დღის განმავლობაში ისეთი აქტუალური საკითხები გააცნეს, როგორიცაა: საზღვაო სამართლის ძირითადი დებულებები (მიმართულებები, რეგულირების საგანი, სუბიექტები, სამართლის წყაროები) საზღვაო სამართლის ადგილი სამართლის სისტემაში, საქართველოს სახელმწიფო პოლიტიკა საზღვაო სფეროში. საზაფხულო სკოლა Elsa Batumi-სა და ბსუ-ს სტუდენტური თვითმმართველობის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის იურიდიულ კლინიკაში სტაჟიორთა შესარჩევი კონკურსი ჩატარდა. საკონკურსო კომისიამ ნარგიზ ცეცხლაძის, ლინდა შალამბერიძისა და ანნა მდინარაძის შემადგენლობით 18 კონკურსანტიდან 14 მონაწილე შეარჩია. მომავალი სამართალდამცავები სტაჟირებას იურიდიულ კლინიკაში გაივლიან. სტაჟირების პროგრამა მიზნად ისახავს სტუდენტთა პრაქტიკული უნარ-ჩვევების დაუფლების ხელშეწყობას.

ბსუ-ს იურიდიული და სოციალურ მეცნიერებათა ფაკულტეტის დეკანმა ლევან ჯაყელმა და სამართლის დეპარტამენტის ასოცირებულმა პროფესორმა მალხაზ ნაკაშიძემ მონაწილეობა მიიღეს 15-18 ოქტომბერს, ლატვიის უნივერსიტეტის 100 წლისადმი მიძღვნილ ღონისძიებებსა და სამართლის სკოლის მიერ ორგანიზებულ საიუბილეო საერთაშორისო კონფერენციაში. ვიზიტის ფარგლებში იურიდიული და სოციალურ მეცნიერებათა ფაკულტეტის დეკანი ლევან ჯაყელი სხვადასხვა ევროპული უმაღლესი სასწავლებლების წარმომადგენლებს შეხვდა. ლატვიის უნივერსიტეტის სამართლის სკოლის დეკანთან ანიტა როდინასთან გამართულ შეხვედრაზე დაიგეგმა სამართალმცოდნეობის პროგრამის სტუდენტების სწავლება, სამეცნიერო პროექტებში ჩართვა და ერაზმუს+-ის გაცვლითი პროგრამის ფარგლებში სტუდენტებისა და აკადემიური პერსონალისთვის საგრანტო განაცხადის ერთობლივად წარდგენა.