ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და კონსულტაციის და ტრენინგის ცენტრის დირექტორმა ირინე ხანთაძემ თანამშრომლობის მემორანდუმს მოაწერეს ხელი. ხელშეკრულება ითვალისწინებს უნივერსიტეტის იურიდიული და სოციალურ მეცნიერებათა ფაკულტეტის საგანმანათლებლო პროგრამებში არჩევითი სასწავლო კურსის „სამოქალაქო საზოგადოების როლი“ ხელშეწყობასა და განვითარებას. კურსის მიზანია, შესაბამისი პროგრამების სტუდენტებს გააცნოს სამოქალაქო საზოგადოების როლი და მნიშვნელობა, მისი ფუნქციონირების ძირითადი პრინციპები და ხელი შეუწყოს აქტიური მოქალაქის ფორმირებას.

იაპონიის საგანგებო და სრულუფლებიანმა ელჩმა საქართველოში იმამურა აკირამ ბსუ-ს იურიდიული და სოციალურ მეცნიერებათა ფაკულტეტის საერთაშორისო ურთიერთობების საგანმანათლებლო პროგრამის სტუდენტებისათვის ლექცია წაიკითხა თემაზე: „საქართველოსა და იაპონიის ურთიერთობები“. დიპლომატიური კორპუსის წარმომადგენელმა ახალგაზრდებს ქვეყნის პრიორიტეტები და განვითარების სტრატეგიები გააცნო. სტუმარმა საუბრისას ხაზი გაუსვა ასევე იაპონიის პოლიტიკურ, ეკონომიკურ, კულტურულ ურთიერთობებსა და ადამიანის უფლებებს. იაპონიის საგანგებო და სრულუფლებიანმა ელჩმა საქართველოში იმამურა აკირამ ლექციის დასრულების შემდეგ სტუდენტების შეკითხვებს უპასუხა და სტიპენდიების მოპოვების და იაპონიაში სწავლის შესაძლებლობები გააცნო.

11 ივნისს ევროპის იურისტ სტუდენტთა ასოციაცია საქართველო UNICEF-ის საქართველოს წარმომადგენლობასა და საქართველოს პროკურატურასთან თანამშრომლობით Google Meeting-ის საშუალებით ატარებს კონფერენციას ბავშვთა უფლებების შესახებ. გაეროს ბავშვთა ფონდის წარმომადგენელი საქართველოში, დოქტორ ღასან ხალილი, გაეროს ბავშვთა ფონდის მართლმსაჯულების პროგრამის ხელმძღვანელი თეონა კუჭავა და პროკურორი ია ჩხეიძე მოხსენებებს წარმოადგენენ ბავშვთა უფლებების დაცვის აქტუალურ საკითხებზე. ღონისძიებაზე დასწრების შესაძლებლობა აქვთ საქართველოს აკრედიტებული უმაღლესი სასწავლებლების იურიდიული ფაკულტეტის ბაკალავრიატის, მაგისტრატურისა და დოქტორანტურის ნებისმიერი კურსის სტუდენტებსა და კურსდამთავრებულებს.

ბათუმის შოთა რუსთაველის სახელმწიფო უნივერსიტეტის ჟან მონეს კათედრის ხელმძღვანელმა მალხაზ ნაკაშიძემ დაბა ქედის საჯარო სკოლაში საჯარო ლექცია ჩაატარა თემაზე „ევროპის კავშირის ფუნდამენტური ღირებულებები - დემოკრატია, კანონის უზენაესობა და ადამიანის უფლებები”. ლექცია მოიცავდა ისეთ საკითხებს, როგოროცაა: ევროკავშირის დამფუძნებელი პრინციპები, მიზნები, ღირებულებები, ევროკავშირის ინსტიტუტები, ადამიანის უფლებების დაცვის ევროპული მექანიზმები, დემოკრატიიის გამოწვევები და საქართველოს ევროკავშირში ინტეგრაციის პროცესი.

ბათუმის შოთა რუსთაველის სახელმწიფო უნივერსიტეტში, იურიდიული და სამართალმცოდნეობის ფაკულტეტზე ორგანიზაცია „მწვანე სექტორის“ ინიციატივით და USAID/PROLoG-ის მხარდაჭერით, იურიდიული კინოკლუბი გაიხსნა. ახალი საინფორმაციო სივრცე ხელს შეუწყობს სასწავლო პროცესში კინოს, როგორც შემეცნებითი რესურსის, აქტიურ გამოყენებას. კინოკლუბი შესაძლებლობას მისცემს სამართალმცოდნეობის სპეციალობის სტუდენტებს, ინტერაქტიულ რეჟიმში განიხილონ მხატვრულ ფილმებში წარმოჩენილი სამართლებრივი და სოციალური საკითხები, იმსჯელონ დემოკრატიულ იდეებისა და ლიბერალური ღირებულებების შესახებ, გამართონ საჯარო დისკუსიები და გაუზიარონ ერთმანეთს შეხედულებები.