აუტიზმის ცნობადობის ამაღლების საერთაშორისო დღე ბსუ-ს იურიდიული და სოციალურ მეცნიერებათა ფაკულტეტმა კონფერენციით აღნიშნა. სესია მიზნად ისახავდა საზოგადოების ცნობიერების ამაღლებას აუტიზმის სინდრომისათვის დამახასიათებელი გამოწვევებისა და საჭიროებების გაცნობა. ღონისძიებას ფსიქოლოგიის საგანმანათლებლო პროგრამის მეოთხე კურსის სტუდენტები, ფსიქოლოგები, აუტიზმის სინდრომის მქონეთა მშობლები, მენტალური ჯანმრთელობის, სამედიცინო კორპორაცია ევექსის, სამედიცინო ასოციაცია „თანას“, ბათუმის საბავშვო ბაღების გაერთიანებისა და საჯარო ბაღების წარმომადგენლები ესწრებოდნენ.

ბსუ-ს იურიდიული და სოციალურ მეცნიერებათა ფაკულტეტის სტუდენტებმა და პროფესორ-მასწავლებლებმა მონაწილეობა მიიღეს პროექტის „მრავალფეროვნების მართვა და ქალთა თანაბარი მონაწილეობის მხარდაჭერა თავდაცვის და უსაფრთხოების ინსტიტუტებში“ ფარგლებში გამართულ ტრენინგში „მრავალფეროვნება, ინკლუზია და თანაბარი შესაძლებლობები თავდაცვის და უსაფრთხოების ინსტიტუტებში“. ტრენინგის მონაწილეებმა უნივერსიტეტის ფოიეში ინკლუზიისა და მრავალფეროვნების აქტუალურ საკითხებზე შექმნილი პოსტერების გამოფენა მოაწყეს.

19-27 მარტს, ბსუ-ს მედიაციის მოკლევადიანი პროგრამის მსმენელთათვის პროფესორი იან ვან ზვიეტენი წარუძღვა ონლაინ-ლექციათა ციკლს მედიაციის ძირითადი ჩარჩოს, ფაზების, ტექნიკისა და უნარ-ჩვევების საკითხებზე. პროფესორი იან ვან ზვიეტენი არის ნიდერლანდების ბიზნეს-აკადემიის რექტორი, გამოცდილი მედიატორი და ტრენერი მედიაციის დარგში. ლექციათა მსვლელობის პროცესში მსმენელებს ასევე ჰქონდათ საშუალება, გაცნობოდნენ ნიდერლანდების გამოცდილებას მედიაციის სფეროში, პრაქტიკულად გაევარჯიშებინათ მედიატორის ტექნიკა როლური თამაშების მეშვეობით და გაეგოთ მეტი დაფარული მოტივების შესახებ მედიაციის პროცესში.

ბსუ-ს იურიდიული და სოციალურ მეცნეირებათა ფაკულტეტის ფსიქოლოგიის სპეციალობის მეოთხე კურსის სტუდენტებმა დაუნის სინდრომის საერთაშორისო დღე ონლაინ კონფერენციის ჩატარებით აღნიშნეს. სესიაზე მომავალმა ფსიქოლოგებმა ისეთი აქტუალური საკითხები განიხილეს, როგორიცაა: დაუნის სინდრომის მახასიათებლები, საქართველოში არსებული გამოწვევები, სერვისები და დახმარების პროგრამები. სტუდენტებმა ასევე ისაუბრეს მშობლების, საზოგადოების ცნობიერების ამაღლებაზე, დაუნის სინდრომის მქონე პირების სოციუმში ადაპტაციასა და დასაქმების ხელშეწყობაზე.

ბათუმის შოთა რუსთაველის სახელმწიფო უნივერსიტეტისა და უკრაინის ეროვნული უნივერსიტეტის ორგანიზებით მსოფლიო საგანმანათლებლო პრაქტიკის მეორე საერთაშორისო სკოლა გაიხსნა. ბსუ-ს იურიდიული და სოციალურ მეცნიერებათა ფაკულტეტის სტუდენტებს უკრაინელი, ებრაელი, ლატვიელი და ბულგარელი ექსპერტები რვა დღის განმავლობაში მედიაციის აქტუალურ საკითხებს გააცნობენ. საერთაშორისო სკოლა ითვალისწინებს უკრაინის, ბულგარეთისა და ლატვიის მედიაციის უახლესი ტენდენციების გაზიარებასა და ამ პროცესის წარმართვისათვის საჭირო კომუნიკაციის უნარების განვითარების ხელშეწყობას.