23-27 მაისს E-PSY-ის - „ფსიქოლოგიური კონსულტაციების ცენტრების გახსნა სტუდენტებისათვის“ - პროექტის ფარგლებში, პოლონეთში, ბიდგოშჩის ეკონომიკურ უნივერსიტეტში (WSG) პროექტის პარტნიორი უნივერსიტეტების წარმომადგენლების სამუშაო ვიზიტი შედგა. ბათუმის შოთა რუსთაველის სახელმწიფო უნივერსიტეტიდან შეხვედრაში მონაწილეობდა ბსუ–ს ფსიქოლოგიის კლინიკის კოორდინატორი ასოცირებული პროფესორი ქეთევან ბერიძე, ბსუ–ს ფსიქოლოგიის კლინიკის ფსიქოკონსულტანტი, დოქტორანტი ქეთევან დევაძე, პრაქტიკოსი ფსიქოლოგი ელენე იმნაიშვილი.

ბსუ-ს იურიდიული და სოციალურ მეცნიერებათა ფაკულტეტის სამართალმცოდნეობის პირველი კურსის სტუდენტთა საინიციატივო ჯგუფის „საგზაო მარშალის” პროექტმა „გახდი საგზაო მარშალი“ IFES-ის კონკურსში გაიმარჯვა. კონკურსი სამოქალაქო განათლების ლექტორთა ასოციაციის (CELA) მხარდაჭერით გაიმართა და მასში საქართველოს სხვადასხვა უნივერსიტეტის სტუდენტურმა ჯგუფებმა წარადგინეს 2021-2022 აკადემიურ წელს განხორციელებული სამოქალაქო ჩართულობის პროექტები. კომპეტენტურმა ჟიურიმ 14 პროექტიდან 6 საუკეთესო პროექტი გამოავლინა. IFES-ის კონკურსში ბსუ-ს სტუდენტთა 8 საინიციატივო ჯგუფი მონაწილეობდა. პროექტს „გახდი საგზაო მარშალი“ ახორციელებენ სტუდენტები: მარიამ სურმანიძე, თემურ ქოქოლაძე, რევაზ ზაქარაძე, არჩილ კეკელიძე და ქრისტინა მეტრეველი.

ბათუმის შოთა რუსთაველის სახელმწიფო უნივერსიტეტში, ჟან მონეს კათედრის ორგანიზებით საჯარო ლექცია და დისკუსია გაიმართა თემაზე „საქართველო და ევროპა: ისტორიული კავშირები და თანამედროვეობა“. იურისტმა, საქართველოს ახალგაზრდა იურისტთა ასოციაციის თავმჯდომარემ (2018-2020), ძველი ევროპული რუკების და გრავიურების კოლექციონერმა სულხან სალაძემ მოხსენება წაიკითხა თემაზე - „საქართველო ძველ ევროპულ რუკებზე, წარსულის პარალელები და თანამედროვეობა“, ხოლო ბსუ-ს იურიდიული და სოციალურ მეცნიერებათა ფაკულტეტის პროფესორმა, ჟან მონეს კათედრის ხელმძღვანელმა მალხაზ ნაკაშიძემ - „საქართველოს 1921 წლის 21 თებერვლის ევროპული კონსტიტუციის დაბადება, ბათუმი და ევროპული ღირებულებები“.

8-12 მაისს, E-PSY - „ერაზმუს+“-ის ინსტიტუციური თანამშრომლობის პროექტ „ფსიქოლოგიური კონსულტაციის ცენტრების გახსნა სტუდენტებისთვის საქართველოს უმაღლეს საგანმანათლებლო დაწესებულებებში“ ფარგლებში, ბრაშოვის (რუმინეთი) ტრანსილვანიის უნივერსიტეტში (UTBV) განხორციელდა პროექტის პარტნიორი უნივერსიტეტების წარმომადგენლების სამუშაო ვიზიტი. ბსუ–დან დელეგაციაში იყვნენ ბსუ–ს ფსიქოლოგიის კლინიკის ფსიქოლოგები: სოციალური ფსიქოლოგიის დოქტორანტი, ფსიქოკონსულტანტი დავით ქათამაძე, კლინიკური ფსიქოლოგიის მაგისტრი, პრაქტიკოსი ფსიქოლოგი მაია თავართქილაძე, კლინიკური ფსიქოლოგიის მაგისტრი, პრაქტიკოსი ფსიქოლოგი სალომე მელაძე.

ბათუმის შოთა რუსთაველის სახელმწიფო უნივერსიტეტის ჟან მონეს კათედრის ორგანიზებით ევროპის დღე აღინიშნა. ღონისძიებაში მონაწილეობა მიიღეს იურიდიული და სოციალურ მეცნიერებათა ფაკულტეტის სხვადასხვა სპეციალობის სტუდენტებმა. შეხვედრის მონაწილეებს ევროპული ღირებულებებისა და ევროკავშირში საქართველოს გაწევრიანების შესახებ ესაუბრა ჟან მონეს კათედრის ხელმძღვანელი პროფესორი მალხაზ ნაკაშიძე. ევროპის დღის აღსანიშნავად გაიმართა ევროკავშირის შესახებ დოკუმენტური ფილმის ჩვენება და დისკუსია.