ბათუმის შოთა რუსთაველის სახელმწიფო უნივერსიტეტში VI საერთაშორისო საზაფხულო უნივერსიტეტი ტარდება თემაზე: „საქართველოს აკადემიური პერსპეტივა უსაფრთხოების და გაუვრცელებლობის კვლევებში“. ღონისძიების გახსნას ბსუ-ს რექტორი, პროფესორი მერაბ ხალვაში, სტოკჰოლმის უნივერსიტეტის პროფესორი დოქტორი ტომას იონტერი, პოლიტიკის მეცნიერებათა დოქტორი ბენუა პელოპიდასი და შვედეთის მთავრობის წარმომადგენლები ესწრებოდნენ. ორდღიანი საზაფხულო უნივერსიტეტის მიზანია უმაღლესი საგანმანათლებლო დაწესებულებების აკადემიური პერსონალის კვლევითი უნარების განვითარების ხელშეწყობა.

2021 წლის 15 ოქტომებრს, ერაზმუსის დღეების ფარგლებში კავკასიის უნივერსიტეტმა უმასპინძლა „Erasmus+“-ის ეროვნული ოფისის მიერ ორგანიზებულ დისკუსიას "როგორ ვასწავლოთ და ვიკვლიოთ ევროკავშირი?". დისკუსიაში მონაწილეობა მიიღეს ჟან მონეს პროექტების განმახორციელებელმა პირებმა თბილისის, გორისა და ბათუმის ცხრა უნივერსიტეტიდან, ხუთი არასამთავრობო ორგანიზაციიდან და ორი ასოციაციიდან. დისკუსია გახსნა საქართველოში ევროკავშირის ელჩმა, ბატონმა კარლ ჰარცელმა. დისკუსიაში მონაწილეობა მიიღო ბათუმის შოთა რუსთაველის სახელმწიფო უნივერსიტეტის პროფესორმა, ჟან მონეს კათედრის ხელმძღვანელმა მალხაზ ნაკაშიძემ, რომელმაც ისაუბრა ბსუ-ში ჟან მონეს კათედრის მიერ განხორციელებული საქმიანობის, ჟან მონეს პროგრამის მნიშვნელობასა და ევროკავშირის სწავლების სფეროში არსებული გამოწვევების შესახებ.

ფსიქიკური ჯანმრთელობის მსოფლიო დღისადმი მიძღვნილი კვირეულის ფარგლებში, ბსუ-ს ფსიქოლოგიის კლინიკა E-PSY-ის პროექტის ეგიდით, რამდენიმე ღონისძიება გაიმართა. ბათუმის შოთა რუსთაველის სახელმწიფო უნივერსიტეტის ფსიქოლოგებმა სტუდენტებს კონკუსლტაციები გაუწიეს სტრესულ მდგომარეობასათან დაკავშირებულ პრობლემებზე. ასევე ჩატარდა E-PSY პროექტის წარდგენა, რომლის მიზანია სტუდენტებისთვის სოციალური და ფსიქოლოგიური დახმარების გაწევა საქართველოს უმაღლეს სასწავლებლებში ფსიქოლოგიური კონსულტაციების ცენტრების შექმნის გზით. პროგრამა ითვალისწინებს უმაღლეს საგანმანათლებლო დაწესებულებებში ფსიქოლოგიური ცენტრების შექმნას.

ბათუმის შოთა რუსთაველის სახელმწიფო უნივერსიტეტის მედიაციის მოკლევადიანი პროგრამის 13 მსმენელი 18-29 ოქტომბერს სტაჟირებით ესპანეთში, ქალაქ მურსიაში მიემგზავრება. პროექტის მონაწილეებს 2 კვირის განმავლობაში ინტენსიური ტრენინგ-კურსი ჩაუტარდებათ მედიაციის აქტუალურ საკითხებზე და მონაწილეობას მიიღებენ სხვადასხვა სასწავლო ღონისძიებაში. სტაჟირების პროგრამა ევროკავშირის მიერ დაფინანსებული პროექტის MEDIATS: „მედიაცია, ტრენინგი და საზოგადოების ტრანსფორმაცია“ ფარგლებში ხორციელდება, რომელშიც ბსუ 2018 წლიდან არის ჩართული. „ერაზმუს+“-ის დღეების ეგიდით, ბსუ-სა და ილიას სახელმწიფო უნივერსიტეტის ერთობლივი შეხვედრა გაიმართა. ღონისძიებაზე პროექტის მენეჯერებმა ქეთი დევაძემ და სალომე გაგნიძემ პროექტის მიმდინარეობა შეაფასეს და შედეგების შესახებ პრეზენტაციები წარმოადგინეს.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და „იურიდიული დახმარების სამსახურის“ დირექტორმა რაჟდენ კუპრაშვილმა თანამშრომლობის მემორანდუმს მოაწერეს ხელი. ხელშეკრულება ითვალისწინებს ერთობლივი პროექტების განხორციელებას, საგანმანათლებლო პროგრამების შემუშავება–განახლების პროცესში თანამშრომლობის უზრუნველყოფას და უნივერსიტეტის კურსდამთავრებულთათვის სტაჟირების ხელშეწყობას. მემორანდუმი ასევე მიზნად ისახავს სამეცნიერო-კვლევითი საქმიანობის განხორციელებას და სხვადასხვა სახის ღონისძიების ჩატარებას.