ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის უფროსმა მასწავლებელმა ინგა ცინცქილაძემ 8-12 აპრილს, პროგრამის Erasmus+-ის ფარგლებში ლექციები ჩაატარა პოლონეთში ნიკოლას კოპერნიკის სახელობის უნივერსიტეტში. ლექციები მოიცავდა ისეთ აქტუალურ საკითხებს, როგორიცაა: საქართველო-ევროკავშირის ურთიერთობები ევროპის სამეზობლო პოლიტიკის ჭრილში და ევროკავშირის სტრატეგიული პარტნიორობა, საერთაშორისო ურთიერთობები პოსტსაბჭოთა სივრცეში.

2019 წლის 4-6 აპრილს, უკრაინის ქალაქ ტერნოპოლში, ნაციონალური ეკონომიკური უნივერსიტეტის იურიდიული ფაკულტეტის ბაზაზე გაიმართა საერთაშორისო კონფერენცია „უკრაინა სამართლებრივი სისტემის რეფორმირების პირობებში: თანამედროვე რეალობა და საერთაშორისო გამოცდილება“. საინფორმაციო კონფერენციის მუშაობაში მონაწილეობა მიიღეს და მოხსენებები წარადგინეს ბსუ-ს იურიდიული და სოციალურ მეცნიერებათა ფაკულტეტის დეკანმა, ასოცირებულმა პროფესორმა ლევან ჯაყელმა, პროფესორმა ადამ მახარაძემ და მოწვეულმა მასწავლებელმა, დოქტორანტმა ნიკოლოზ მეგერელიშვილმა.

ბათუმის შოთა რუსთაველის სახელმწიფო უნივერსიტეტის ფსიქოლოგიის სპეციალობის IV კურსის სტუდენტების მონაწილეობით და მოწვეული სპეციალისტის მარინა მასხულიას ხელმძღვანელობით შეხვედრა გაიმართა. ღონისძიებაზე აუტისტი ბავშვის მშობლებმა ისაუბრეს ამ სპეციფიკური სამედიცინო და ფსიქოლოგიური პრობლემებსა და იმ თავისებურებებზე, რომელიც დაკავშირებულია არამ მარტო ოჯახთან, სპეციალურ დაწესებულებებთან, არამედ მოსახლეობის ფართო ფენების ჩართულობასა და აუტისტი ბავშვების დახმარებასთან. ამ თვალსაზრისით აღსანიშნავია ფსიქოლოგიის სპეციალობის მეოთხე კურსის სტუდენტების პროექტი. 6 თვის განმავლობაში ახალგაზრდები ანაზღაურების გარეშე ყოველდღიურად მუშაობდნენ საკმაოდ რთული ფსიქოლოგიური მდგომარეობის აუტისტ ბავშვებთან.

ბათუმის შოთა რუსთაველის სახელმწიფო უნივერსიტეტში აუტიზმის ცნობადობის ამაღლების საერთაშორისო დღე აღინიშნა. ბიოლოგიის საგანმანათლებლო პროგრამის I კურსის და ფსიქოლოგიის საგანმანათლებლო პროგრამის II კურსის სტუდენტებმა საინფორმაციო შეხვედრა გამართეს. ღონისძიებაზე სტუდენტებმა თემატური პრეზენტაციები და ვიდეორგოლები წარმოადგინეს აუტიზმის გენეტიკის, აუტიზმის სპექტრის დიაგნოსტირებისა და მკურნალობის გზებზე. 2007 წელს გაეროს გენერალური ასამბლეის გადაწყვეტილებით 2 აპრილი აუტიზმის ინფორმაციის გავრცელების მსოფლიო დღედ გამოცხადდა.

უნივერსიტეტში საქართველოს დამფუძნებელი კრების 100 წლისთავისადმი მიძღვნილი სამეცნიერო კონფერენცია გაიმართა თემაზე: „საქართველოს დამფუძნებელი კრება და ბათუმის ოლქის საკითხი“. სხვადასხვა უმაღლესი საგანმანათლებლო დაწესებულების პროფესორ-მასწავლებლებმა და მკვლევარებმა სესიაზე დამფუძნებელი კრების მუშაობის ამსახველი მოხსენებები წარმოდგინეს. კერძოდ, განიხილეს ისეთი აქტუალური საკითხები, როგორიცაა: საქართველოს დამფუძნებელი კრება და სამუსლიმანო საქართველოს ავტონომიის საკითხი, ბათუმის ოლქის კომისრები, ავტონომიის კონსტიტუციური პრინციპების განსაზღვრა საქართველოს დამფუძნებელი კრების მიერ, საქართველოს პირველი პარლამენტის ევროპული მოდელი და იმდროინდელი პოლიტიკური პრესა, დამფუძნებელი კრების უკანასკნელი სხდომა.