შოთა რუსთაველის ეროვნული სამეცნიერო ფონდის მიერ დაფინანსებული პროექტის „ქართველ მუსლიმთა მატერიალური და სულიერი მემკვიდრეობა თურქეთში“ (HE/21/1-10/13; სამეცნიერო ხელმძღვანელი ასოცირებული პროფესორი ზაზა შაშიკაძე) ფარგლებში გაიმართა საანგარიშო შეხვედრა. მკვლევარმა რუსლან ბარამიძემ ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს 2015 წლის პირველ ნახევარში წარმოებული კვლევა-ძიების შედეგები გააცნო. პროექტის მონაწილეებმა იმუშავეს ანკარის თაფუსა და კადასტრის არქივში, თურქეთის საისტორიო საზოგადოების წიგნთსაცავებში, ეროვნულ და ანკარის უნივერსიტეტის ბიბლიოთეკებში. მკვლევრებმა მოიპოვეს მნიშვნელოვანი მასალები და ლიტერატურა, რაც მათ დაეხმარება პროექტით გათვალისწინებული საკითხების უკეთ შესწავლაში.

საქართველოს სახელმწიფოებრივი დამოუკიდებლობის აღდგენის დღისადმი მიძღვნილი კონფერენცია ჩატარდა ბათუმის შოთა რუსთაველის სახელმწიფო უნივერსიტეტში. სესია რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა გახსნა და ისტორიული დღის მნიშვნელობაზე ისაუბრა. ჰუმანიტარულ მეცნიერებათა ფაკულტეტის დეკანმა პროფესორმა მარინა გიორგაძემ სესიის მონაწილეებს 1997 წელს ლევილში გადაღებული ფოტოები წარუდგინა, ხოლო პროფესორმა ოთარ გოგოლიშვილმა 1918-1921 წლების მოვლენების ამსახველი საარქივო ვიდეომასალა გააცნო. კონფერენციაზე ჰუმანიტარულ მეცნიერებათა ფაკულტეტის სტუდენტებმა მოხსენებები წაიკითხეს 1918-1921 წლებში განვითარებულ მოვლენებზე.

ბათუმის შოთა რუსთაველის სახელმწიფო უნივერსიტეტის პროფესორმა, სლავისტიკის დეპარტამენტის ხელმძღვანელმა მარინე აროშიძემ ჩაატარა ლექციების ცხრადღიანი ციკლი (ამა წლის 11 მაისიდან 20 მაისამდე) ჩრდილოეთ-კავკასიის ფედერალური უნივერსიტეტის ჰუმანიტარულ ინსტიტუტში თემაზე: „ანთროპოცენტრული ლინგვისტური პარადიგმა და კულტურული მეხსიერება“. მომხსენებელმა ლექციებზე განიხილა ისეთი დიდი მნიშნელოვანი საკითხები, როგორიცაა: კულტურათშორისი კომუნიკაციის პრობლემები, თარგმანის ლინგვოკულტუროლოგიური და სოციოლინგვისტური ასპექტები, ტექსტლინგვისტური ანალიზი და სხვ. შეხვედრაზე ასევე იმსჯელეს ერთობლივი საგანმანათლებლო პროგრამების შემუშავებაზე და სამეცნიერო დიალოგის შესაძლებლობაზე.

ფაშიზმზე გამარჯვების 70 წლისადმი მიძღვნილი სამეცნიერო სესია გაიმართა ბათუმის შოთა რუსთაველის სახელმწიფო უნივერსიტეტში. ნიკო ბერძენიშვილის ინსტიტუტის მკვლევარებმა, ისტორიის, არქეოლოგიისა და ეთნოლოგიის დეპარტამენტის პროფესორ-მასწავლებლებმა და აჭარის ხარიტონ ახვლედიანის სახელობის მუზეუმის მეცნიერ-თანამშრომლებმა მოხსენებები წარმოადგინეს მეორე მსოფლიო ომის საკითხებზე. კონფერენციის მონაწილეებმა ისეთი მნიშვნელოვანი საკითხები განიხილეს, როგორიცაა „აჭარა მეორე მსოფლიო ომის წლებში“, „მეორე მსოფლიო ომი და თურქეთის მიერ მიტაცებული ქართული ტერიტორიების დაბრუნების საკითხი“, „ჰიტლერის გეგმები მსოფლიოს პოლიტიკური რუკის შეცვლაში“, „ბათუმის შოთა რუსთაველის სახელმწიფო პედაგოგიური ინსტიტუტის წარგზავნილები მეორე მსოფლიო ომში“ და „მეორე მსოფლიო ომში მონაწილე ქალები აჭარიდან“. სამეცნიერო სესია ბათუმის შოთა რუსთაველის სახელმწიფო უნივერსიტეტისა და აჭარის ხარიტონ ახვლედიანის სახელობის მუზეუმის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ქართული ფილოლოგიის სამეცნიერო კლუბის წევრებმა (ხელმძღვანელი ასოც. პროფ. გ. ბახტაძე) ილია ჭავჭავაძის მუზეუმში ჩაატარეს სამეცნიერო კონფერენცია თემაზე: „ჩემო კარგო ქვეყანავ“. სესიაზე სტუდენტებმა ილია ჭავჭავაძის საზოგადოებრივ ღვაწლზე, ცხოვრებასა და შემოქმედებაზე საინტერესო თემები წარმოადგინეს.