ჰუმანიტარულ მეცნიერებათა ფაკულტეტის პროფესორ-მასწავლებლებმა ივანე ჯავახიშვილის სახელობის თბილისის სახელმწიფო უნივერსიტეტში, ჰუმანიტარულ მეცნიერებათა ფაკულტეტის ამერიკისმცოდნეობის ინსტიტუტის მიერ გამართულ მეთხუთმეტე ყოველწლიურ საერთაშორისო სამეცნიერო კონფერენციაში: „შეერთებული შტატების საგარეო პოლიტიკა აღმოსავლეთ ევროპაში“ - მიიღეს მონაწილეობა. სამდღიანი კონფერენცია ამერიკის შეერთებული შტატების საგარეო პოლიტიკის საკითხების, როგორც აღმოსავლეთ ევროპის ცალკეულ ქვეყანაში, ასევე, ზოგადად, რეგიონში კვლევას და ქართულ-ამერიკული ურთიერთობების შესწავლას მიეძღვნა. კონფერენციის მონაწილეებს ამერიკის ელჩი რიჩარდ ნორლანდი მიესალმა, ხოლო პლენარული სესია მისიის უფროსის მოადგილემ ბრიჯით ბრინქმა გახსნა. კონფერენციის მოხსენებების თემატიკა მოიცავდა ისტორიას, პოლიტიკას, განათლებას, რელიგიას, ლიტერატურას, ხელოვნებას, ფილოსოფიას, მასმედიას, სამართალი, ეკონომიკა, სოციალური და ქალთა საკითხები და ა.შ. ევროპეისტიკის დეპარტამენტის ასისტენტ პროფესორმა თამილა დავითაძემ მოხსენება წარადგინა თემაზე: „პროტესტი, როგორც პოეტური განწყობის ხერხი ენ სექსტონის პოეზიაში“, ევროპეისტიკის დეპარტამენტის დოქტორანტმა, მოწვეულმა სპეციალისტმა ანა ჯიოშვილმა - „არქეტიპები ჯონ ფაულზის რომანში „ჯადოქარი“.

მშვიდობის კორპუსის მოხალისეებისა და საერთაშორისო განათლების ცენტრის ორგანიზებით ბათუმის შოთა რუსთაველის სახელმწიფო უნივერსიტეტში ჩატარდა შემოქმედებითი წერის კონკურსი ინგლისურ ენაში. კონკურსში მონაწილეობა მიიღეს ჰუმანიტარულ მეცნიერებათა ფაკულტეტის ინგლისური ენის სპეციალობის I-IV კურსის სტუდენტებმა და 50-მა მაგისტრანტმა. ქვეყნის მასშტაბით პირველობა მოიპოვეს მარიანა აპოსტოლმა, ნანა შავაძემ და მაია პაპიძემ. რეგიონულ უნივერსიტეტებს შორის საუკეთესო ესეების ავტორებად დასახელდნენ: ანა კუსიდუ, ნანა შავაძე, მარიანა აპოსტოლი, მაია პაპიძე, ჯენეტი ლომიძე და თამარ კაიკაციშვილი. გამარჯვებულ კონკურსანტებს სერტიფიკატებთან ერთად სამახსოვრო საჩუქრები გადაეცემათა და მაისში ჩაუტარდებათ ტრენინგი შემოქმედებით წერაში.

ჰუმანიტარულ მეცნიერებათა ფაკულტეტის პროფესორი ნატალია სურგულაძე ერთთვიანი ვიზიტით ერასმუს მუნდუს პროგრამის ფარგლებში საფრანგეთის ქალაქ პუატიეს უნივერსიტეტს ეწვია. პრორექტორთან, საგარეო ურთიერთობათა განყოფილების ხელმძღვანელთან და ადმინისტრაციის წარმომადგენლებთან გამართულ შეხვედრაზე მკვლევარმა ბათუმის შოთა რუსთაველის სახელმწიფო უნივერსიტეტის საგანმანათლებლო პროგრამები, სწავლებისა და შეფასების წესები წარადგინა. ვიზიტის ფარგლებში პროფესორი ნატალია სურგულაძე დაესწრო საერთაშორისო სამეცნიერო კოლოკვიუმს: “Amérindianités&Savoirs” (19/03/2014-21/03/2014), სამეცნიერო კვლევითი ლაბორატორიის საბჭოს სხდომას და მოისმინა უნივერსიტეტის პროფესორ-მასწავლებელთა მოხსენებები პოიტიეს უნივერსიტეტში 2013-14 სასწავლო წლების 1 და 2 სემესტრების კვლევითი შედეგების შესახებ. ასევე გაეცნო მაგისტრატურისა და ლისანსის (ბაკალავრიატის) სასწავლო პროგრამებს, გამოცდის ჩატარების, სწავლების მეთოდებსა და შეფასების კრიტერიუმებს. გარდა ამისა, დაესწრო ლექციებს შემდეგ დისციპლინებში: Expressionecrite, Expressionorale, Comprehensionecrite, Comprehensionorale, Grammaire, Dossier, Atelier poesie, Niveaux B2, C1, C2.

ბათუმის ილია ჭავჭავაძის მუზეუმში 9 აპრილისადმი მიძღვნილი სტუდენტთა კონფერენცია გაიმართა თემაზე: „9 აპრილი - სისხლით დამძიმებული თავისუფლება“. სესიაზე ისტორიის სპეციალობის II კურსის სტუდენტებმა მოხსენებები წარმოადგინეს ისეთ აქტუალურ საკითხებზე, როგორიცაა: ეროვნული ცნობიერების განვითარება და გაძლიერება, ანტისაბჭოთა განწყობილებების ზრდა, კომუნისტური იდეოლოგიის კრახი, პარტიული ნომენკლატურის დეგრადაცია, 1989 წლის 9 აპრილი, საქართველოს სუვერენიტეტის აღდგენა. კონფერენციის დასასრულს, ახალგაზრდებმა დაგმეს 25 წლის წინ, 8-9 აპრილს განვითარებული მოვლენები და პატივი მიაგეს თავისუფლებისათვის დაღუპული გმირების ხსოვნას.

ჰუმანიტარულ მეცნიერებათა ფაკულტეტისა და განათლების ფაკულტეტის პროფესორ-მასწავლებლებმა ბულგარეთში, ველიკო ტირნოვოში გამართულ მეთერთმეტე საერთაშორისო სიმპოზიუმში - МАПРЯЛ 14 - მიიღეს მონაწილეობა. ოთხდღიანი სიმპოზიუმი რუსული ენის თეორიულ-პრაქტიკულ შესწავლასა და მის შედარებით-ტიპოლოგიურ აღწერას მიეძღვნა. თარგმანის თეორიული და პრაქტიკული ასპექტების სექციის ხელმძღვანელმა, სლავისტიკის დეპარტამენტის პროფესორმა მარინე აროშიძემ მოხსენება წარადგინა თემაზე: „მეტაფორული სახეების თარგმნის პრობლემები“, სლავისტიკის დეპარტამენტის ასისტენტ პროფესორმა დალი დობორჯგინიძემ „ენების ინტერფერენცია პოლიკულტურულ სივრცეში“ და პედაგოგიკურ მეცნიერებათა დეპარტამენტის პროფესორმა ლელა თავდგირიძემ „უცხო ენების ფლობის შეფასების თანამედროვე ტექნოლოგიები“.