ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ორგანიზებითა და აჭარის არ განათლების, კულტურისა და სპორტის სამინისტროს მხარდაჭერით საერთაშორისო კონფერენცია „ჰუმანიტარული მეცნიერებები ინფორმაციულ საზოგადოებაში - II“ გაიხსნა. ორდღიანი კონფერენცია 13 სექციაში იმუშავებს და მასში 350-მდე ქართველი, ინგლისელი, ფრანგი, გერმანელი, ამერიკელი, რუსი, პოლონელი, აზერბაიჯანელი, ავსტრიელი, თურქი, ირანელი პროფესორ-მასწავლებელი და მკვლევარი მოხსენებას წარმოადგენს ჰუმანიტარული მეცნიერებების აქტუალურ პრობლემებზე. საერთაშორისო სამეცნიერო სესიის მონაწილეები განიხილავენ ინფორმაციულ საზოგადოებაში ჰუმანიტარული მეცნიერებების ახალ გამოწვევებს და ბოლო პერიოდში წარმოებული კვლევის შედეგებს.

ამერიკელმა პროფესორმა ჯეიმს თორსონმა ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ინგლისური ფილოლოგიის სპეციალობის სტუდენტებისა და პროფესორ-მასწავლებლებისათვის საჯარო ლექცია ჩაატარა თემაზე: „კლასიკური ამერიკული დრამა (Classic American Drama: Eugene O’Neill, Tennessee Williams, and Arthur Miller)“. ნიუ მექსიკოს უნივერსიტეტის ემერიტუს პროფესორმა ისაუბრა ამერიკული დრამის საუკეთესო წარმომადგენლებზე იუჯინ ონილზე, ტენესი უილიამსზე და ართურ მილერზე. ლექციის დასასრულს, პროფესორმა ჯეიმს თორსონმა დასმულ შეკითხვებს უპასუხა.

საქართველოს მეცნიერებათა აკადემიის აკადემიკოსმა ელგუჯა ხინთიბიძემ ბათუმის შოთა რუსთაველის სახელმწიფო უნივერსიტეტის სტუდენტებისა და პროფესორ მასწავლებლებისათვის საჯარო ლექციების ციკლი წაიკითხა. ღვაწლმოსილმა პროფესორმა სამი დღის განმავლობაში ყურადღება გაამახვილა ისეთ მნიშვნელოვან საკითხებზე, როგორიცაა: „ვეფხისტყაოსანი“ შუასაუკუნებრივი და რენესანსული აზროვნების კონტექსტში, „ვეფხისტყაოსნის“ სიყვარული - ახალი ფილოსოფიური კონცეფცია (ტრუბადურები, დანტე, პეტრარკა) და „ვეფხისტყაოსანი“ შექსპირის ეპოქაში და მისი თანამედროვე დრამატურგიის ლიტერატურული წყარო. ფილოლოგიის დოქტორის, პროფესორ ელგუჯა ხინთიბიძის კვლევის საგანია შუასაუკუნეების ქართული ლიტერატურა და ქართულ-ბიზანტიური ლიტერატურული ურთიერთობები, რუსთველოლოგია და წყაროთმცოდნეობის დარგები. საჯარო ლექციები აჭარის ა.რ. განათლების, კულტურისა და სპორტის სამინისტროს “უმაღლესი განათლების ხელშეწყობის პროგრამის” ფარგლებში გაიმართა.

9-დან 12 სექტემბრის ჩათვლით, პარიზის სორბონის უნივერსიტეტში ჩატარდა საერთაშორისო სამეცნიერო კოლოკვიუმი ,,EUROPHRAS 2014 - ფრაზეოლოგია: რესურსები, აღწერა და მონაცემთა დამუშავება’’. სამეცნიერო ღონისძიებაში მონაწილეობდნენ ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის პროფესორები: ნანა სტამბოლიშვილი, ნატალია სურგულაძე, მარინე სიორიძე, ანზორ აბუსერიძე, მაია კიკვაძე, რომლებიც წარმატებით წარსდგნენ მსოფლიოს წამყვანი უნივერსიტეტების ცნობილ მეცნიერებთან ერთად საინტერესო მოხსენებებით ფრაზეოლოგიური კვლევების სხვადასხვა სფეროში. ბათუმის შოთა რუსთაველის სახელმწიფო უნივერსიტეტის პროფესორები საერთაშორისო ფორუმში აჭარის ავტონომიური რესპუბლიკის განათლების, კულტურისა და სპორტის სამინისტროს „უმაღლესი განათლების ხელშეწყობის“ პროგრამის დაფინანსებით მონაწილეობდნენ.

„დიგიტალური ჰუმანიტარიის“ საერთაშორისო საზაფხულო სკოლა „კორპუსლინგვისტიკა და ქართველოლოგიის სპეციალური პრობლემები“ გაიხსნა შოთა რუსთაველის დარბაზში. საერთაშორისო საზაფხულო სკოლა ბათუმის შოთა რუსთაველის სახელმწიფო უნივერსიტეტისა და ფრანკფურტის გოეთეს უნივერსიტეტის ორგანიზებით მესამედ ტარდება. პროექტის ასამდე ქართველი და უცხოელი მონაწილე ათი დღის განმავლობაში ქართული ენის ეროვნული კორპუსის შექმნაზე იმუშავებს. საზაფხულო სკოლის ფარგლებში შეიქმნება დიგიტალური ჰუმანიტარიის პლატფორმა. ევროპელი და ქართველი მეცნიერები შეხვდებიან კვლევის ინოვატორული მეთოდებით დაინტერესებულ ქართველ ჰუმანიტართა ახალ თაობას. სკოლის მონაწილეებისათვის ბსუ-ს საპატიო დოქტორის, პროფესორ იოსტ გიპერტის ინიციატივით ცნობილი ევროპელი მეცნიერები საერთაშორისო ინტერდისციპლინარულ ვორკშოპს გამართავენ.