ფიზიკა-მათემატიკისა და კომპიუტერულ მეცნიერებათა ფაკულტეტის ფიზიკის სპეციალობის 70%-იანი გრანტის მფლობელი სტუდენტი მარიამ ჩხაიძე სამეცნიერო პროექტის მუშაობაში ჩაერთო. ახალგაზრდა მკვლევარი გამოსაცდელი ვადით (ერთი წლით) აყვანილი იქნა უმცროსი მეცნიერ-თანამშრომლის (ექსპერიმენტატორი) პოზიციაზე შოთა რუსთაველის ეროვნული სამეცნიერო ფონდის მიერ დაფინანსებული საგრანტო პროექტის „ოპტიკურად მკვრივი, შემთხვევითი ფაზური ეკრანის ფლუორესცენციის მახასიათებლების რაოდენობრივი და გაბნეული ლაზერული გამოსხივების ინტენსივობის კორელაციური ფუნქციის სტატისტიკური მომენტების სპექტრალური ანალიზი“ (#R/152/9-240/14, სამეცნიერო ხელმძღვანელი პროფესორი ნუგზარ ღომიძე) ფარგლებში. პირველკურსელი სტუდენტი მონაწილეობას მიიღებს ექსპერიმენტულ გაზომვებში და სამეცნიერო ინფორმაციის შეგროვება-გადამუშავებაში.

ბათუმის შოთა რუსთაველის სახელმწიფო უნივერსიტეტში ტემპუსის პროექტის „უნივერსიტეტის მართვის ინტეგრირებული სისტემა: ევროგაერთიანების გამოცდილების გაზიარება“ (INURE) ფარგლებში გახსნილმა „მართვის თანამედროვე მეთოდების პროგრამული უზრუნველყოფის ცენტრმა“ ტრენინინგი ჩაატარა. ცენტრის ხელმძღვანელმა დავით დევაძემ ფიზიკა-მათემატიკის და კომპიუტერულ მეცნიერებათა ფაკულტეტის ადმინისტრაციულ პერსონალსა და სტუდენტებს უნივერსიტეტის მართვის ინტეგრირებული სისტემა, პროგრამის მოდულების მუშაობის პრინციპები და INURE პროექტის ფარგლებში შემუშავებული მეთოდოლოგია გააცნო.

ფიზიკა-მათემატიკისა და კომპიუტერულ მეცნიერებათა ფაკულტეტის რადიო ფიზიკის ლაბორატორია თანამედროვე აპარატურით აღიჭურვა. შოთა რუსთაველის ეროვნული სამეცნიერო ფონდის მიერ დაფინანსებული საგრანტო პროექტის „ოპტიკურად მკვრივი, შემთხვევითი ფაზური ეკრანის ფლუორესცენციის მახასიათებლების რაოდენობრივი და გაბნეული ლაზერული გამოსხივების ინტენსივობის კორელაციური ფუნქციის სტატისტიკური მომენტების სპექტრალური ანალიზი“ (#FR/152/9-240/14, სამეცნიერო ხელმძღვანელი პროფ. ნუგზარ ღომიძე) და ბათუმის შოთა რუსთაველის სახელმწიფო უნივერსიტეტის მხარდაჭერით ლაბორატორიისათვის შეძენილია 40000$ ღირებულების ნაპერწკლურ ლაზერულ სპექტროსკოპიული და ფლუორესცენციული აპარატურა.

პროფესორ მზევინარ ბაკურიძის ინიციატივით ფიზიკა-მათემატიკისა და კომპიუტერულ მეცნიერებათა ფაკულტეტის მათემატიკის სპეციალობის სტუდენტებმა მოინახულეს საპატრიარქოსთან არსებული ფერიის წმინდა მატათა მოციქულის სახელობის ბავშვთა გიმნაზია-პანსიონი. ახალგაზრდებმა ბავშვებს შობა-ახალი წელი მიულოცეს, სამახსოვროს საჩუქრები და ტკბილეული გადასცეს.
ახალგაზრდა მათემატიკოსთა კლუბი საქველმოქმედო პროექტებს მომავალშიც განახორციელებს.

ბათუმის შოთა რუსთაველის სახელმწიფო უნივერსიტეტის განვითარებაში შეტანილი წვლილისათვის, ხანგრძლივი ნაყოფიერი პედაგოგიური და აღმზრდელობითი საქმიანობისათვის ფიზიკა-მათემატიკისა და კომპიუტერულ მეცნიერებათა ფაკულტეტის დამსახურებულ პედაგოგებს ქალბატონ ლამარა თადუმაძეს და ბატონ იოსებ აბაშიძეს ადრესი და საუნივერიტეტო სუვენირები გადაეცა.