ბათუმის შოთა რუსთაველის სახელმწიფო უნივერსიტეტის რექტორის მოადგილე სამეცნიერო დარგში, პროფესორი ნათია წიკლაშვილი, განათლების ფაკულტეტის დეკანი, ასოცირებული პროფესორი მადონა მიქელაძე, ფიზიკა-მათემატიკისა და კომპიუტერულ მეცნიერებათა ფაკულტეტის დეკანი, ასოცირებული პროფესორი გულადი ფარტენაძე ოფიციალური ვიზიტით იმყოფებოდნენ ტალინის სახელმწიფო უნივერსიტეტში. ვიზიტი დაიგეგმა ორ უნივერსიტეტს შორის გაფორმებული ურთიერთთანამშრომლობის მემორანდუმის საფუძველზე
ბათუმის შოთა რუსთაველის სახელმწიფო უნივერსიტეტში ფიზიკა-მათემატიკისა და კომპიუტერულ მეცნიერებათა ფაკულტეტის სტუდენტებისა და აკადემიური პერსონალის მიერ განხორციელებული პროექტების გამოფენა მოეწყო. გამოფენაზე წარმოდგენილი იყო უნიკალური და ტექნოლოგიური სიახლით გამორჩეული პროექტების სადემონსტრაციო მოდელ-მაკეტები: ულტრაბგერითი მეგზური უსინათლოთათვის, რომელიც მათ შენობასა და შენობის გარეთ გადაადგილებაში ეხმარება და ხელსაწყო აგრარული გაზომვებისთვის, რომლის საშუალებითაც მიწისა და ჰაერის ტენიანობის, ტემპერატურის და მიწის მოსავლიანობას გაზომვა ხდება.
22 აპრილს, ბათუმის შოთა რუსთაველის სახელმწიფო უნივერსიტეტის სამეცნიერო ცენტრისა და ფიზიკა-მათემატიკისა და კომპიუტერულ მეცნიერებათა ფაკულტეტის ორგანიზებით რეფერატულ ნაშრომთა კონკურსი ჩატარდა პირველკურსელთათვის. წარმოდგენილი სამი მომხსენებლიდან საპრიზო I- ადგილი მარიამ გუბელიძემ დაიკავა თემით „კარნოსცხრილები “ხელმძღვანელი - ასოცირებული პროფესორი ომარ გივრაძე. II- ადგილი დავით გახოკიამ, თემით „Remix OS თანამედროვე ოპერაციული სისტემა“, ხელმძღვანელი - ასისტენტ პროფესორი გრიგოლ კახიანი. III - ადგილი ლევან დავითაძემ, თემით „მინიმუმის და მაქსიმუმის ცნებები გეომეტრიაში“, ხელმძღვანელი ასოცირებული პროფესორი ანზორ ბერიძე. გამარჯვებული თემის ავტორი მარიამ გუბელიძე მონაწილეობას მიიღებს სტუდენტთა საფაკულტეტო კონფერენციაში.
20 აპრილს, ფიზიკა-მათემატიკისა და კომპიუტერულ მეცნიერებათა ფაკულტეტმა მემორანდუმი გააფორმა ბათუმის კერძო სკოლა „თაობა“-სთან. მემორანდუმი მიზნად ისახავს მეცნიერების პოპულარიზაციას, სასწავლო და პედაგოგიური საქმიანობისა და მოსწავლეთა პროფესიული ორიენტაციისათვის ხელშეწყობას. მემორანდუმი საჯარო ლექციების ციკლში აქტიური მონაწილეობის გათვალისწინებით გაფორმდა. ფაკულტეტმა სკოლას საჩუქრად გადასცა ფაკულტეტის ფიზიკის დეპარტამენტის ლაბორატორიებში შერჩეული სასკოლო სადემონსტრაციო დანიშნულების 14 დასახელების ხელსაწყო, ხოლო სკოლის დირექტორს უნივერსიტეტის რექტორის მ/შ-ს სახელით გადაეცა უნივერსიტეტის სასაჩუქრე პაკეტი.
19 აპრილს, ფიზიკა-მათემატიკისა და კომპიუტერულ მეცნიერებათა ფაკულტეტის დეკანი და ხარისხის უზრუნველყოფის სამსახურის უფროსი ფაკულტეტის სტუდენტებს შეხვდნენ. შეხვედრა საინფორმაციო ხასიათს ატარებდა. სტუდენტებს კიდევ ერთხელ გააცნეს საჭირო ვებ-გვერდების მისამართები, ინფორმაცია გაცვლითი, სოციალური და სხვა პროგრამების მოძიების შესახებ. აგრეთვე პასუხი გაეცა სტუდენთა გამოკითხვის შედეგად გამოკვეთილ საკითხებს, აღინიშნა მათი მოგვარებისა და გამოსწორების გზების შესახებ.
