19-20 ივნისს ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტები ასისტენტ პროფესორ რამინ ცინარიძის ორგანიზებით ფინანსთა სამინისტროს შემოსავლების სამსახურის შემეცნებით-საგანმანათლებლო პროექტის ფარგლებში საბაჟო გამშვებ პუნქტს „სარფი,“ გაფორმების ეკონომიკურ ზონას -„ბათუმი" (ადლია) და შემოსავლების სამსახურის ბათუმის სერვის-ცენტრს ეწვივნენ. სტუდენტები (ფინანსები III კურსი, IV კურსი - დამატებითი სპეციალობა და საბუღალტრო-საგადასახადო საქმე II კურსი) გაეცნენ საბაჟო საზღვრის კვეთის პროცედურებს, ფიზიკური პირის, საქონლისა და სატრანსპორტო საშუალებათა დათვალიერებას (სკანირებას), მათ იდენტიფიკაციას, ვეტერინალური, ფიტო-სანიტარიული და სანიტარული კონტროლის პროცედურებს, სამოსამსახურეო დანიშნულების ძაღლებით ნარკოტიკების აღმოჩენის შემთხვევებსა თუ დეკლარაციების შევსების წესს.

ბსუ-ს ეკონომიკისა და ბიზნესის ფაკულტეტის ხელშეწყობით აჭარის დებატების კლუბმა ყოველწლიური დებატების ტურნირი ჩაატარა. შეჯიბრში სტუდენტებთან ერთად მოსწავლეებიც მონაწილეობდნენ. აჭარის პირველობა საპარლამენტო და ღირებულებითი ფორმატის დებატებში 9-10 ივნისს მიმდინარეობდა. სტუდენტებს შორის პირველობა თამარ გვარიშვილმა და ნიკა ცეცხლაძემ მოიპოვეს, ხოლო მოსწავლეებს შორის ხულოს მუნიციპალიტეტის გუნდმა გაიმარჯვა. ტურნირის გამარჯვებულებს ფასიანი საჩუქრები გადაეცათ. ტრადიციული პროექტი სპორტისა და ახალგაზრდობის საქმეთა დეპარტამენტის ორგანიზებით ხორციელდება.

ეკონომიკისა და ბიზნესის ფაკულტეტის მენეჯმენტის სპეციალობის II კურსის სტუდენტებმა (მ. მახარაძე, თ. შავაძე, ც. ნაკაშიძე, ნ. წულაძე) განახორციელეს სოციალური პროექტი - „ხელოვნება ადამიანის ცხოვრებაში“. პროექტი მიზნად ისახავს ხელოვნების ნიჭით დაჯილდოებული ბსუ-ს სტუდენტების გაცნობას და მათი ნიჭის რეალიზებისათვის გამოფენის მოწყობას. სასწავლო კურსის -პროექტების მართვის ფარგლებში ამავე კურსის სტუდენტებმა (თ. საფარიძე, მ. ტყემალაძე, შ. ჩავლეიშვილი, ლ. დავითაძე, ნ. პაპიძე) ასევე განახორციელეს სოციალური პროექტი - “გავულამაზოთ ერთი დღე მოხუცებს“. სტუდენტური ინიციატივა ემსახურება სტუდენტთა პრაქტიკული უნარ-ჩვევების გამომუშავებას.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტებისათვის დ. ა. ცენოვის სახელობის ეკონომიკის აკადემიის, (სვიშტოვი, ბულგარეთი) საერთაშორისო ეკონომიკური ურთიერთობების დეპარტამენტის უფროსმა, ასისტენტმა, დოქტორმა ივაილო პეტროვმა ერთკვირიანი საჯარო ლექციების ციკლი წაიკითხა. 28 მაისიდან 4 ივნისის ჩათვლით ბულგარელმა მომხსენებელმა ლექციები წაიკითხა თემებზე: საერთაშორისო ეკონომიკური ურთიერთობები, საჯარო ფინანსები დამ საერთაშორისო სავაჭრო ურთიერთობები.

15-19 მაისს, ბათუმის შოთა რუსთაველის სახელმწიფო უნივერსიტეტის ბიზნესისა და ეკონომიკის ფაკულტეტის სტუდენტმა ზურაბ ჯეგნარაძემ და ასევე სხვა ფაკულტეტის სტუდენტებმა მონაწილეობა მიიღეს სასტუმრო შერატონში გამართულ საერთაშორისო კონგრესზე “Worldwide SCIF Congress”, რომელიც წელს ბათუმში პირველად ჩატარდა. კონგრესზე მსოფლიოს 50-მდე ქვეყნის სხვადასხვა მოწინავე კომპანიამ განიხილა თანამედროვე ტექნოლოგიური მიღწევები, ინოვაციები და პერსპექტივები აგრარულ სფეროში.