ბათუმის შოთა რუსთაველის სახელმწიფო უნივერსიტეტში ეკონომიკისა და ბიზნესის ფაკულტეტის დეკანის არჩევნები გაიმართა. ფაკულტეტის საბჭომ სიის შემადგენლობის უმრავლესობით მეორე ვადით პროფესორი ვლადიმერ ღლონტი აირჩია. ეკონომიკისა და ბიზნესის ფაკულტეტის პროფესორ-მასწავლებლები, ადმინისტრაცია და სტუდენტები პროფესორ ვლადიმერ ღლონტს ულოცავენ წარმატებას და უსურვებენ ნაყოფიერ საქმიანობას.
ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის პროფესორმა ასიე ცინცაძემ ინტერდისციპლინარული საგრანტო პროექტის ფარგლებში შესრულებული სამუშაოს პრეზენტაცია წარადგინა. ანგარიში მოიცავდა ჩატარებული კვლევის შედეგებს, რომლის მთავარი მიზანი იყო აჭარის მოსახლეობის მოკვდაობის ცხრილის აგება და მოკვდაობის მაჩვენებლის გავლენის დადგენა რეგიონის ეკონომიკურ განვითარებაზე. სამუშაო შეხვედრა გაიმართა კითხვა-პასუხის რეჟიმში.
ბათუმის შოთა რუსთაველის სახელმწიფო უნივერსიტეტის რექტორის მოადგილე, პროფესორი ნათია წიკლაშვილი და ეკონომიკისა და ბიზნესის ფაკულტეტის ასოცირებული პროფესორი ბადრი გეჩბაია უკრაინის ეროვნულ საავიაციო უნივერსიტეტში იმყოფებოდნენ. შეხვედრაზე მხარეებმა განიხილეს სამომავლო თანამშრომლობის მიმართულებები. დაიგეგმა ერთობლივი კვლევითი პროექტების განხორციელება, სამეცნიერო კონფერენციების ორგანიზება, სამეცნიერო-კვლევითი ბაზების განვითარება, სხვა პარტნიორებთან ქსელის ხელშეწყობა, ერთობლივი მრგვალი მაგიდების გამართვა, ერთობლივი სამეცნიერო სტატიების მომზადება, სადისერტაციო ნაშრომების ექსპერტიზა, საჯარო ლექციების, ტრენინგებისა და მასტერკლასების ჩატარება. ვიზიტის ფარგლებში ხელი მოეწერა თანამშრომლობის მემორანდუმს ბათუმის შოთა რუსთაველის სახელმწიფო უნივერსიტეტსა და კიევის ეროვნულ საავიაციო უნივერსიტეტს შორის.
კიევის ვადიმ ჰეტმანის ეროვნულ ეკონომიკურ უნივერსიტეტში ერთობლივი მონოგრაფიის „უკრაინისა და საქართველოს განვითარების სტრატეგიული პრიორიტეტები: ინოვაციები და თანამშრომლობა“ („Strategic Priorities for Developing Ukraine and Georgia: Innovation and Partnership“) წარდგენა გაიმართა. მონოგრაფიის მომზადებაში სხვა ქართველ და უკრაინელ კოლეგებთან ერთად, მონაწილეობა მიიღეს ბსუ-ს პროფესორებმა ნათია წიკლაშვილმა, გელა მამულაძემ, ასოცირებულმა პროფესორებმა ბადრი გეჩბაიამ და პაატა აროშიძემ. მონოგრაფიის პრეზენტაციას უძღვებოდა კიევის ვადიმ ჰეტმანის ეროვნული ეკონომიკური უნივერსიტეტის რექტორი პროფესორი დიმიტრი ლუკიანენკო. ღონისძიებაში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის რექტორის მოადგილემ, პროფესორმა ნათია წიკლაშვილმა და ეკონომიკისა და ბიზნესის ფაკულტეტის ასოცირებულმა პროფესორმა ბადრი გეჩბაიამ. წარდგენის ფარგლებში დაიგეგმა ახალი ერთობლივი პროექტების განხორციელება.
6-30 ნოემბერს ევროპული საგანმანათლებლო ცენტრის მიერ ორგანიზებული შემოქმედებითი ინკუბატორის პროექტის ფარგლებში შერჩეული იდეის ავტორებისთვის ბათუმის შოთა რუსთაველის სახელმწიფო უნივერსიტეტში კრეატიული სტარტაპების სარწვთნელი ბანაკი BootCamp-ი მოეწყო. საწვრთნელი ბანაკი სტარტაპერებისთვის სპეციალურად შექმნილ სასწავლო პროგრამას მოიცავდა, რომელიც მიზნად ისახავდა პროექტის ფარგლებში წარმოდგენილი ბიზნეს იდეების დახვეწას და ავტორებისთვის სამეწარმეო, ეკონომიკური ანალიზის უნარების შეძენას.
შემოქმედებითი ინკუბატორის პროექტი აჭარის ა.რ განათლების, კულტურისა და სპორტის სამინისტროს ფინანსური მხარდაჭერით გაიმართა.
