უნივერსიტეტში საქართველოს ახალგაზრდა იურისტთა ასოციაციის ანგარიშის - „სისხლის სამართლის საქმეთა სასამართლო მონიტორინგის ანგარიში №12“ წარდგენა გაიმართა. ასოციაციის წარმომდგენლებმა იურიდიული და სოციალურ მეცნიერებათა ფაკულტეტის სტუდენტებს სისხლის სამართლის სასამართლო პროცესების მონიტორინგის შედეგები გააცნეს. ანგარიშში გაანალიზებულია სასამართლოსა და პროკურატურის მიდგომები აღკვეთის ღონისძიების შერჩევასთან, საქმის სასამართლოში განხილვის სხვა ეტაპებთან და ოჯახურ, ნარკოტიკულ დანაშაულებთან დაკავშირებით. შეხვედრაზე მომავალი სამართალდამცავები ასევე გაეცნენ იმ სასამართლო პროცესების ანალიზს, სადაც იკვეთება სასამართლო კონტროლის პრაქტიკაში არსებული პრობლემები და საკანონმდებლო ხარვეზები.

საქართველოს იურიდიული ფირმების ასოციაციის პროექტის „იურიდიული კლინიკების გაძლიერება უმაღლეს განათლებაში“ ფარგლებში ბათუმის შოთა რუსთაველის სახელმწიფო უნივერსიტეტში შეხვედრა გაიმართა. ასოციაციის აღმასრულებელმა დირექტორმა თინათინ შუღაროვამ და პროექტის ექსპერტმა, პროფესორმა ნინო ბოგვერაძემ იურიდიული და სოციალურ მეცნიერებათა ფაკულტეტის იურიდიული კლინიკის სტუდენტებს საქართველოში არსებული იურიდიული კლინიკების კვლევის შედეგებთან ერთად სწავლების მეთოდოლოგია გააცნო და საერთაშორისო პრაქტიკა გაუზიარა. შეხვედრის ფარგლებში პროფესორმა ნინო ბოგვერაძემ მომავალ სამართალდამცავებს ხელშეკრულების შედგენის მეთოდიკის მოკლე კურსი ჩაუტარა.

ფსიქოლოგმა, საქართველოს ფსიქიკური ჯანმრთელობის კოალიციის წევრმა ნატალია ჩირიკაშვილმა ბათუმის შოთა რუსთაველის სახელმწიფო უნივერსიტეტში ფსიქო-სოციალური რეაბილიტაციის პროგრამის მეორე მოდული ჩაaტარა თემაზე: „არტთერაპია ფსიქიკური აშლილობების მქონე პაციენტებისათვის“. სამდრიანი სემინარი მიზნად ისახავდა ფსიქიკური ჯანმრთელობის სფეროში მომუშავე სპეციალისტების ცოდნის გაღრმავებასა და მომავალი სპეციალისტების განათლებას მკურნალობის ფსიქო–სოციალურ მეთოდებში.

10-13 დეკემბერს, ასტანაში, ყაზახეთის იურიდიულ ჰუმანიტარული უნივერსიტეტის, OSCE-სა სოროსის ფონდის ორგანიზებით გაიმართა IV საერთაშორისო ახალგაზრდული იურიდიული ფორუმი “ადამიანის საყოველთაო უფლებები და ნაციონალური უშიშროება“. კონფერენციაში მონაწილეობა მიიღო ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის მეოთხე სასწავლო წლის სტუდენტმა ლიანა ნიჟარაძემ. კონფერენციაში მონაწილე 40 სტუდენტის ნაშრომებს ლიანა ნიჟარაძის მოხსენებამ მესამე ადგილი მოიპოვა, რომელიც დაჯილდოვდა საერთაშორისო ხარისხის დიპლომითა და ფულადი საჩუქრით.

29 ნოემბრიდან 2 დეკემბრის ჩათვლით ბსუ-ს საზოგადოებრივ და პოლიტიკურ მეცნიერებათა დეპარტამენტის ხელმძღვანელმა ლაშა ბაჟუნაშვილმა მონაწილეობა მიღო ვარშავის უნივერსიტეტის საერთაშორისო ურთიერთობათა ინსტიტუტის მიერ დაგეგმილ 10 ევროპული უნივერსიტეტისგან შემდგარი კონსორციუმის საერთაშორისო ვორქშოპში. ღონისძიება მიზნად ისახავდა ერასმუს+-ის ახალი საგრანტო პროექტის "სტრატეგიული კავშირები ევროკავშირსა და აღმოსავლეთის სამეზობლო ქვეყნებს შორის“ ფარგლებში საერთაშორისო ურთერთობებსა და ევროპისმცოდნეობაში ერთობლივი სამაგისტრო კურიკულუმის შემუშავება და მათი პარტნიორ უნივერსიტეტებში დანერგვა (Strategic Bridges between the European Union and the Eastern Neighborhood – development of MA curricula in International Relations and European Studies in Partner Countries HEI’s). ვორქშოპის მონაწილეებმა ერთობლივად შეიმუშავეს საპროექტო წინადადება, რომელიც 2019 წლის თებერვალში დაფინანსების მოპოვების მიზნით წარედგინება ევროკომისიას.