ბსუ-ს ჰუმანიტარულ მეცნიერებათა ფაკულტეტის „არქეოლოგიის“ სადოქტორო პროგრამის დოქტორანტმა ლანა ბურკაძემ 2017-2019 წლებში სტაჟირება ვარშავის ეროვნულ მუზეუმში გაიარა, კონსერვაციისა და რესტავრაციის განყოფილებაში, რესტავრატორების ასისტენტად; დაეუფლა არქეოლოგიური არტეფაქტების რესტავრირების ტექნიკას, თანამედროვე მეთოდებს. პროექტში, რომელშიც ლანა ბურკაძე რესტავრატორებთან ერთად მუშაობდა და სწავლობდა, დაფინანსებული იყო ევროკავშირის მიერ. 2021 წლის იანვარში ვარშავის ეროვნულ მუზეუმში გაიხსნა პროექტის ფარგლებში რესტავრირებული არქეოლოგიური არტეფაქტების გამოფენა.

გამოიცა ბსუ-ს ასოც. პროფ. ნანა ტრაპაიძის წიგნი „ლიტერატურა ლიტერატურის შესახებ“. წიგნი ორი ნაწილისაგან შედგება, პირველი ნაწილი საავტოროა, გამოირჩევა დასმული საკითხების ორიგინალური რეფლექსიით, ლიტერატურა განხილულია ფართო კულტურულ, სოციალურ, ისტორიულ კონტექსტში; მეორე ნაწილი -კრიტიკულ-თეორიული ანთოლოგიაა - რომელიც შედგება გარკვეული კონცეფციით შერჩეული ქართველი და უცხოელი მეცნიერების, კრიტიკოსებისა და მწერლების ლიტერატურულ-კრიტიკული წერილებისგან.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა გერმანული ფილოლოგიის სტუდენტი მარიამ ჩხარტიშვილი, მიმდინარე სემესტრში, „ერაზმუს+“-ის გაცვლითი პროგრამის ფარგლებში, სწავლას გერმანიის ქალაქ დიუსელდორფის ჰაინრიხ ჰაინეს სახელობის უნივერსიტეტში განაგრძობს. მარიამ ჩხარტიშვილი წარმატებით ეუფლება გერმანული ენის ფონეტიკას, სემანტიკას, ლირიკას, ასევე ინგლისურსა და რუსულს ენებს. მიუხედავათ არსებული ეპიდვითარებისა, მიმდინარე სწავლების ონლაინ ფორმატი მისთვის ძალიან საინტერესო და მრავლის მომცემი აღმოჩნდა, რადგან ლექციებს მაღალკვალიფიციური და დიდი გამოცდილების მქონე ლექტორები უკითხავენ.

25-27 იანვარს და 4 თებერვალს „Erasmus+“-ის ინსტიტუციური განვითარების პროექტის „რეგიონალური უნივერსიტეტების როლი რეგიონის განვითრებაში (RURD)“ ფარგლებში, კონსორციუმის წევრი უნივერსიტეტებისთვის პირველი ონლაინ ტრენინგი „სტრატეგიული გეგმა და საერთაშორისო თანამშრომლობის სტრატეგია“ ჩატარდა. ღონისძიება TEAMS-ის პლატფორმის საშუალებით გაიმართა და სანტიაგო დე კომპოსტელას უნივერსიტეტის მკვლევრები და პროფესორები უძღვებოდნენ. ოთხდღიანი სამუშაო შეხვედრების მონაწილეები გაეცნენ ადგილობრივი, რეგიონული საჭიროებების ანალიზის ევროკავშირის გამოცდილებას, უნივერსიტეტის მისიას, ხედვას, სტრატეგიული გეგმის განვითარებას, SWOT ანალიზს.

გამოიცა ბსუ-ს ჰუმანიტარულ მეცნიერებათა ფაკულტეტის პროფესორ ოთარ გოგოლიშვლისა და „ისტორიის“ სამაგისტრო პროგრამის მაგისტრანტ გიორგი ბაციკაძის ერთობლივი ნაშრომი „ბათუმის ოლქი 1917-1921 წლებში, გიორგი მაზნიაშვილი". წიგნში დეტალურადაა განხილული მოცემულ პერიოდში რეგიონის პოლიტიკური, სოციალური, კულტურული და ა.შ. ცხოვრების მნიშვნელოვანი და საყურადღებო ასპექტები. წიგნში აგრეთვე, წარმოჩენილი არის იმპერიების ინტერესების ჭიდილი, ბათუმის ოლქში მიმდინარე საბრძოლო მოქმედებები და გენერალ გიორგი მაზნიაშვილის მოღვაწეობა.