ბათუმის შოთა რუსთაველის სახელმწიფო უნივერსიტეტში არტ-სტუდია „ანდამატისა“ და ბათუმის მე-2 საჯარო სკოლის მოსწავლეთა საახალწლო ნამუშევრების გამოფენა-გაყიდვა გაიმართა. საქველმოქმედო აქციით შემოსული თანხა თამუნა ბენდელიანს გადაეცა. სამი შვილის დედა ავთვისებიანი პროგრესირებადი მელანომით არის დაავადებული, რომლის სამკურნალო ხარჯები აღემატება ოჯახის ფინანსურ შესაძლებლობებს. საქველმოქმედო აქცია ბათუმის შოთა რუსთაველის სახელობის სახელმწიფო უნივერსიტეტისა და სტუდენტური თვითმმართველობის მხარდაჭერით ჩატარდა.

ჰუმანიტარულ მეცნიერებათა ფაკულტეტის პროფესორ-მასწავლებლებისა და სტუდენტებისათვის ქართულ-ამერიკული უნივერსიტეტის პროფესორმა, რიტორიკის სკოლის დირექტორმა ცირა ბარბაქაძემ ტრენინგი ჩაატარა თემაზე: „სემიოტიკა-მეცნიერება, მეთოდოლოგია, მსოფლხედვა“. პროფესორმა ცირა ბარბაქაძემ ფაკულტეტის აკადემიურ პერსონალს, დოქტორანტებსა და მაგისტრანტებს ისეთი აქტუალური საკითხები გააცნო, როგორიცაა: სემიოტიკა, როგორც მეცნიერება, მეთოდოლოგია, მსოფლხედვა; პოსტმოდერნიზმი და სემიოტიკა; სემიოტიკა, როგორც პოსტმოდერნული სამყაროს სათვალე; სემიოტიკა და სინერგეტიკა; ნიშნები და ნიშანთა სისტემები; ნიშნის ბუნება; ორგვარი რეფერენტი - კონკრეტული და აბსტრაქტული; უმბერტო ეკოს „ექვსი გასეირნება ლიტერატურულ ტყეში“ - როგორც სწავლების მეთოდი; ვიგოდსკისა და პიაჟეს ცოდნის მიღების ორი გზა; გონება და ემოცია, ნარცისი თუ გოლდმუნდი? არაცნობიერი და იზომორფიზმი გენეტიკურ კოდსა და სემიოტიკურ სისტემებს შორის; ენა და ადამიანი და ადამიანი და ენა - მიმართებები შიგნით-გარეთ და პირიქით; პერფორმანსი, როგორც სემიოტიკური ფენომენი.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ისტორიის სპეციალობის IV კურსის სტუდენტების მონაწილეობით აზიისა და აფრიკის ქვეყნების ახალ და უახლეს ისტორიის საკითხებზე ინტელექტუალური შეჯიბრი გაიმართა. სტუდენტებმა სილაბუსით გათვალისწინებული სასწავლო პროგრამა შეაჯამეს და დარგის აქტუალურ საკითხებზე იმსჯელეს. ყოველწლიური ღონისძიება ჰუმანიტარულ მეცნიერებათა ფაკულტეტის პროფესორის, აღმოსავლეთმცოდნეობის დეპარტამენტის ხელმძღვანელის ემზარ მაკარაძის ორგანიზებით ჩატარდა.

ბათუმის შოთა რუსთველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ქართულ ენაში მომზადების პროგრამის სტუდენტი ზარინე მელტონიანი ესეების კონკურსის: „მე ვარ ტოლერანტი - თავისუფალი ადამიანი მრავალფეროვან სამყაროში“ გამარჯვებულია. კონკურსში საქართველოს სხვადასხვა უმაღლესი საგანმანათლებლო დაწესებულების სტუდენტები მონაწილეობდნენ. ღონისძიება „თსუ ახალგაზრდული ცენტრის“ ორგანიზებით „გაეროს ასოციაციის“ პროექტის PITA-ს ფარგლებში ეუთოს ეროვნულ უმცირესობათა უმაღლესი კომისრის ოფისის ფინანსური მხარდაჭერით განხორციელდა. ბათუმის შოთა რუსთველის სახელმწიფო უნივერსიტეტი ზარინე მელტონიანს ულოცავს გამარჯვებას და უსურვებს წარმატებებს.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის პროფესორმა ოთარ გოგოლიშვილმა აჭარის ხარიტონ ახვლედიანის სახელობის სახელმწიფო მუზუმში ქართული ფილოლოგიის საგანმანათლებლო პროგრამის პირველი კურსის სტუდენტებისათვის საჯარო ლექცია წაიკითხა თემაზე: „საქართველო XIX საუკუნისა და XX საუკუნის I ნახევარში“. მომხსენებელმა ისაუბრა რუსეთის იმპერიის მიერ საქართველოს ოკუპაციაზე, ეროვნულ-განმათავისუფლებელ მოძრაობაზე, თერგდალეულებსა და XIX საუკუნის ბოლოს გამართულ დიდ ეროვნულ, პოლიტიკურ და სოციალურ-ეკონომიკურ მდგომარეობაზე. ასევე დიდი ყურადღება გაამახვილა XX საუკუნის I ნახევარში გამართულ საზოგადოებრივ-პოლიტიკურ მოვლენებზე, განსაკუთრებით 1918-21 წლებზე.