ლადო ასათიანისა და ნელი დუმბაძის დაბადებიდან 100 წლის იუბილეს მიეძღვნა საღამო „ლადო ასათიანი და მისი მეგობრები“. ჰუმანიტარულ მეცნიერებათა ფაკულტეტის ქართული ფილოლოგიის მიმართულების სტუდენტებმა ლიტერატურულ-მუსიკალური კომპოზიციით გაიხსენეს ლადო ასათიანისა და ნელი დუმბაძის მეგობრობის ისტორია. ახალგაზრდებმა საიუბილეო საღამოზე წაიკითხეს ლადო ასათიანისა და ნელი დუმბაძის წერილები, ლექსები, შეასრულეს პოეტის ლექსებზე შექმნილი სიმღერები და დადგეს სცენა დავით კლდიაშვილის პიესიდან „დარისპანის გასაჭირი“.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ორგანიზებით, პროფესორ გიგი თევზაძის საჯარო ლექცია ჩატარდა თემაზე: „ვეფხისტყაოსანი, როგორც სოციალური პროექტი“. მომხსენებელმა შოთა რუსთაველის პოემა "ვეფხისტყაოსანი" განსხვავებული სოციალური თვალთახედვით განიხილა, რამაც დამსწრეთა ინტერესი გამოიწვია და შეხვედრა საინტერესო დისკუსიაში გადაიზარდა.

ნიკოლოზ ბარათაშვილის 200 წლის იუბილეს მიეძღვნა ცირა ბარბაქაძის საჯარო ლექცია თემაზე: „არ დაიჯერებ, თუ ვით სატრფო ხარ“ ციკლიდან - „პოეტები და მუზები“. ილიას სახელმწიფო უნივერსიტეტის პროფესორმა ცირა ბარბაქაძემ ლექციაზე პოეტის ბიოგრაფიაზე, შემოქმედებასა და მე-19 საუკუნის საქართველოს პოლიტიკურ-სოციალურ ვითარებაზე ისაუბრა. ღონისძიების ფარგლებში შოთა რუსთაველის სახელმწიფო უნივერსიტეტის სტუდენტებმა და ილიას სახელმწიფო უნივერსიტეტის პოეზიის კლუბის წევრებმა ნიკოლოზ ბარათაშვილის ლექსები წაიკითხეს. საჯარო ლექცია ბსუ-ს ჰუმანიტარულ მეცნიერებათა ფაკულტეტის ორგანიზებით გაიმართა.

ილიას სახელმწიფო უნივერსიტეტის პროფესორ გიგი თევზაძის წიგნის „საბოლოო ფილოსოფია“ წარდგენა გაიმართა ბათუმის შოთა რუსთაველის სახელმწიფო უნივერსიტეტში. ავტორი მკითხველს წიგნის საშუალებით ადამიანის მიერ სამყაროს შემეცნების ახალ აღწერას სთავაზობს. ნაშრომის პრაქტიკული მიზანი განათლებაა, გიგი თევზაძე მსჯელობს თუ როგორი უნდა იყოს განათლება იმ სამყაროში, სადაც დაფარული ცვლილებები ცხადი და საყოველთაო გახდება; როგორი უნდა იყოს განათლება, რომელიც ამ ცვლილების გამოაშკარავებას და ინტენსიურობას შეუწყობს ხელს.

ბათუმის შოთა რუსთაველის სახელმწიფო უნივერსიტეტის სააქტო დარბაზში აკა მორჩილაძის საჯარო ლექცია გაიმართა თემაზე: „მწერლების ყოველდღიურობა და ყოფა მე–19 საუკუნეში: ილია, აკაკი, ვაჟა, ყაზბეგი და სხვ“. მწერალი სხვადასხვა ფაკულტეტის სტუდენტებს კლასიკოსების ბიოგრაფიასა და მათ მიერ საზოგადოებრივ ცხოვრებაში შეტანილ წვლილზე ესაუბრა. საჯარო ლექცია კომპანია „ჯეოსელის“ სტუდენტური პროექტის „ვიცი“ ფარგლებში ჩატარდა, რომელიც სხვადასხვა ტიპის საგანმანათლებლო აქტივობისა და შეხვედრების ციკლს მოიცავს.