ნიკოლოზ ბარათაშვილის 200 წლის იუბილესადმი მიძღვნილი საღამო გაიმართა ბათუმის შოთა რუსთაველის სახელმწიფო უნივერსიტეტში. პოეტის ცხოვრება და შემოქმედება გაიხსენეს ჰუმანიტარულ მეცნიერებათა ფაკულტეტის დეკანმა, პროფესორმა მარინა გიორგაძემ, ასოცირებულმა პროფესორმა ნანა ტრაპაიძემ, მიხეილ თუმანიშვილის სახელობის კინომსახიობთა თეატრის მსახიობმა პაატა ბარათაშვილმა, ბსუ-ს საპატიო დოქტორმა ავთანდილ ბარათაშვილმა, საერთაშორისო საქველმოქმედო ფონდის „მამულიშვილთა გახსენება“ პრეზიდენტმა ბონდო კობაძემ, მწერლმა რამაზ სურმანიძემ, ბსუ-ს პროფესორ-მასწავლებლებმა და საზოგადოების წარმომადგენლებმა. საიუბილეო საღამოს ფარგლებში ასევე გაიმართა კრებულის - „ნიკოლოზ ბარათაშვილი - 200“ - წარდგინება.

ბათუმის შოთა რუსთაველის სახელმწიფო უნივერსიტეტის პროფესორმა მალხაზ ჩოხარაძემ საჯარო ლექცია წაიკითხა თემაზე: „ქართული ენა და სოფლები თანამედროვე თურქეთში“. ლექცია ეხებოდა ქართული ენის გეოგრაფიას თურქეთში, ასევე, ქართველთა თვითშემეცნების საკითხებს, ისტორიას და თანამედროვე რეალობას. წარმოდგენილი იყო სამეცნიერო მივლინებების დროს შეკრებილი მრავალი ახალი მასალა; ლექცია შოთა რუსთაველის ეროვნული სამეცნიერო ფონდის საგრანტო პროექტის („ტაო“- ისტორიულ-ფილოლოგიური გამოკვლევა) ფარგლებში ჩატარდა.

ცნობილი ქართველი ფილოსოფოსის ნიკო ჭავჭავაძის ხსოვნისადმი მიძღვნილი სამეცნიერო კონფერენცია ჩატარდა ბათუმის შოთა რუსთაველის სახელმწიფო უნივერსიტეტში. სესიაზე საქართველოს სხვადასხვა უმაღლესი საგანმანათლებლო დაწესებულებების პროფესორ-მასწავლებლებმა და მკვლევრებმა მოხსენებები წარმოადგინეს ფილოსოფიის აქტუალურ საკითხებზე, ნიკო ჭავჭავაძის სამეცნიერო ღვაწლი შეაფასეს და ბოლო პერიოდში წარმოებული კვლევის შედეგები განიხილეს. კონფერენცია ჰუმანიტარულ მეცნიერებათა ფაკულტეტის ფილოსოფიის დეპარტამენტის ორგანიზებით გაიმართა.

ბსუ-ს სტუმრად საფრანგეთის ელჩი საქართველოში პასკალ მენიე ეწვია. ელჩი რექტორს, მერაბ ხალვაშს, ჰუმანიტარულ მეცნიერებათა ფაკულტეტის დეკანს, მარინე გიორგაძეს, რომანისტიკის მიმართულების პროფესორ-მასწავლებლებსა და სტუდენტებს შეხვდა. საუბარი შეეხო ბსუ-სა და საფრანგეთის უმაღლეს საგანმანათლებლო დაწესებულებებს შორის თანამშრომლობას, კერძოდ, კანის, რუანისა და რენის უნივერსიტეტებთან ერთობლივი პროექტებისა და პროგრამების განხორციელებას. დიპლომატიური კორპუსის წარმომადგენელი ასევე ესაუბრა სტუდენტებს და მოისმინა ინფორმაცია მათი სურვილებისა და მომავალი გეგმების შესახებ.

ფილოლოგიის დოქტორმა შოთა ჯიჯიეშვილმა მონაწილეობა მიიღო თბილისში, სასტუმრო „ქორთიარდ მერიოტში“ რელიგიის საკითხთა სახელმწიფო სააგენტოს ორგანიზებით გამართულ II კონფერენციაში - „ინტერრელიგიური დიალოგი მშვიდობისათვის“. „რელიგიური ტოლერანტობა საქართველოში“ თემაზე ჩატარებული სესიის მუშაობაში საქართველოს უმაღლესი საგანმანათლებლო დაწესებულებების პროფესორ-მასწავლებლებთან ერთად, ჩართული იყვნენ რელიგიური ორგანიზაციების ლიდერები, დიპლომატიური კორპუსის წარმომადგენლები, პარლამენტისა და მთავრობის წევრები. მონაწილეებმა სამეცნიერო მასალაზე დაყრდნობით, წარმოადგინეს საქართველოს სხვადასხვა რეგიონში, რელიგიური ტოლერანტობის ამსახველი კონკრეტული ისტორიული თუ თანამედროვე მაგალითები და პრობლემები. შოთა ჯიჯიეშვილმა კონფერენციაზე მოხსენება - „მშვიდობიანი რელიგიური თანაცხოვრებისათვის აჭარაში“ - წაიკითხა და მიმოიხილა რეგიონში არსებული მდგომარეობა.