საქართველოს უნივერსიტეტისა და ბათუმის შოთა რუსთაველის სახელმწიფო უნივერსიტეტის ერთობლივი საზაფხულო სკოლის „კონსტიტუციური მართლმსაჯულების აქტუალური საკითხები" მონაწილეები საგანმანათლებლო ვიზიტით საქართველოს საკონსტიტუციო სასამართლოს ეწვივნენ. ვიზიტის ფარგლებში სტუდენტები გაეცნენ საქართველოს საკონსტიტუციო სასამართლოს სტატუსს, სტრუქტურას, უფლებამოსილებებს და სასამართლო პრაქტიკას. სტუდენტებთან ერთად ღონისძიებაში მონაწილეობდნენ საზაფხულო სკოლის ორგანიზატორები, საქართველოს უნივერსიტეტისა და ბათუმის შოთა რუსთაველის სახელმწიფო უნივერსიტეტის პროფესორები: მალხაზ ბაგიაშვილი, მარი მარინაშვილი, მალხაზ ნაკაშიძე.

ბათუმის შოთა რუსთაველის სახელმწიფო უნივერსიტეტისა და საქართველოს უნივერსიტეტის სამართლის სკოლის ერთობლივი პროექტის ფარგლებში, საზაფხულო სკოლა „კონსტიტუციური მართლმსაჯულების აქტუალური საკითხები" გაიხსნა. საზაფხულო სკოლაში მონაწილეობს საქართველოს სხვადასხვა უნივერსიტეტის სამართლის საბაკალავრო და სამაგისტრო პროგრამის 40-მდე სტუდენტი. საზაფხულო სკოლის მიზანია, ხელი შეუწყოს საკონსტიტუციო მართლმსაჯულების საკითხებზე სტუდენტების ცოდნის გაღრმავებას და უნარების განვითარებას.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და საქართველოს ადვოკატთა ასოციაციის თავმჯდომარემ დავით ასათიანმა თანამშრომლობის მემორანდუმს მოაწერეს ხელი. ხელშეკრულება ითვალისწინებს ბსუ-ს სამართალმცოდნეობის პროგრამის სტუდენტთა პრაქტიკული საქმიანობის ხელშეწყობასა და იურიდიული და სოციალურ მეცნიერებათა ფაკულტეტის იურიდიული კლინიკის ბაზაზე ადვოკატთა პროფესიული ეთიკის კლინიკის დაფუძნებას. კლინიკის ფარგლებში სტუდენტებს შესაძლებლობა ექნებათ, აქტიურად ჩაერთონ ადვოკატთა პროფესიული ეთიკის სტანდარტებისა და დისციპლინური წარმოების პროცესის შესწავლის პროცესში.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის დეკანმა, პროფესორმა ლევან ჯაყელმა და სამართლის მულტიფუნქციური განათლებისა და ექსპერტიზის ცენტრის მართლმსაჯულების სახლის დამფუძნებელმა, პროფესორმა ეკა ბესელიამ თანამშრომლობის მემორანდუმს მოაწერეს ხელი. ხელშეკრულება ითვალისწინებს სამართალმცოდნეობის საბაკალავრო და სამაგისტრო პროგრამების სტუდენტებისათვის პრაქტიკული სასწავლო ტრენინგების ჩატარებას, სასწავლო-საგანმანათლებლო პროექტების განხორციელებას და პროფესიული უნარ-ჩვევების განვითარების ხელშეწყობას. მემორანდუმის ფარგლებში სტუდენტები პრაქტიკასა და სტაჟირების კურსს გაივლიან მაღალი კომპეტენციის მქონე პრაქტიკოს იურისტებთან დარგობრივ ორგანიზაციებში.

11-16 ივლისს, რუმინეთის ქალაქ ბუქარესტში, ცენტრალურ და აღმოსავლეთ ევროპის სტუდენტურ ფესტივალში მონაწილეობა მიიღეს ბსუ-ს ფრანგული ფილოლოგიის III კურსის სტუდენტმა ირინა ფუტკარაძემ და საერთაშორისო ურთიერთობების I კურსის სტუდენტმა ანა კომახიძემ. ფესტივალის მიზანი იყო ფრანგული ენისა და კულტურის პოპულარიზაცია. სტუდენტები დაესწრნენ პრესისა და პოდკასტ-აუდიო ატელიებს, სადაც შეისწავლეს საკუთარი მოსაზრების, სტატიის, ინტერვიუს სწორად ჩამოყალიბება. ასევე მონაწილეობა მიიღეს კონფერენციებში, მათ შორის ერთ-ერთს დიპლომატიის მნიშვნელობაზე, რომელიც რუმინეთის საგარეო საქმეთა მინისტრმა ჩაატარა. გარდა ამისა, ორგანიზებული იყო გასართობი აქტივობები-ცეკვის, სიმღერის, ფოტოგრაფიის და სპორტის სახელოსნოები. ერთ-ერთი ყველაზე გამორჩეული აქტივობა საქართველოს წარდგენა იყო, ქართული სამზარეულოს დაგემოვნება და ქართული კულტურის წარმოჩენა.